¹ Nia eyari Pilato Yesu atta hisio hatabak hiyyo. ² Atta oseŋer ayiru ihita no hukwa. Atta ehumak to hoo honyie' ojo eticiofok inyia boŋo no ara iŋiri. ³ "Moŋ Habu lo Yudea!" atta hinnaŋ inyia ta has hosie. ⁴ Enyiak Pilato eno abali atta hijo to hiyyo, "Itiwolo, eyyani naŋ tuŋani ille ta hatai abali hijo anyar egonyu itai hijo obe naŋ arumu nobo hipali to honyie." ⁵ Nia awoŋ Yesu abali; eciefita ifa inyia ihita no hukwa iko boŋo iŋiri. Atta Pilato hijo to hosie, "Itiwolo, ille tuŋani lia!" ⁶ Nafa egonyu lettaha illo hetimojok iko hejiamak Yesu, oyio isia atta hijo, "Isihok inyia , isihok inyia!" Atta Pilato hijo to hosie, iyari inyia to wati innahatai ifeti isihok, abe naŋ arrumu nobo hipali to honyie." ⁷ Etiraŋ Yudei Pilato, "Ewuon iyyohoi ho hifahi, ojo to hifahi nyia ara inyia ottohoti nyo ehumak inyia wan nohonyie Lonyi Hollum." ⁸ Nafa etiru Pilato hiro nia hosie. ⁹ Atta inyia baŋi nno atta inyia hinyiak ajiŋak ahotwe haji atta hijo to Yesu, "Hetu iyye tai, ati obe Yesu etiraŋ inyia. ¹⁰ Atta Pilato hijo to honyie, "Obe iyye ewak hiro ta hanaŋ? Obe iyye eyyen hijo awuon naŋ ho golon hahehini iyye, iko golon no hesihohini iyye?" ¹¹ Etiraŋ Yesu inyia, " Obe iyye ewuon ho nobo golon to hanaŋ man lesio Hollum to hoi. Nyo tuŋani lo etuhutek nayya ta hatai owuon he iyyau no lobolo." ¹² To hitiraŋi nia, atta Pilato hijo nahou inyia, ati oyio Yudei atta hijo, ' "Lahek iyye tuŋani lia, obe iyye era mote Kesari: Hiyyo bidaŋ illo ehumak wati illohosie ahabuok obe awak Kesari." ¹³ Nafa etiru Pilato hiro nia, atta inyia eyyani Yesu abali atta ahunyia to mai he iŋotit tamai inna ellilloŋo hiyyo hijo hutuhuti, ati to Ebrei, ara Gabata.'' ¹⁴ Ara ifa far no ehuhumari hiyyo far no Laŋan, to sahien ile. Atta Pilato hijo to Yudei, "Ituwolo Habu lahatai ille!" ¹⁵ Oyio isia atta hijo, "Iyari inyia ade, iyari inyia ade; isihok inyia!" Atta Pilato hijo to hosie, "Anyar esihok naŋ Habu lahatai?" Etiraŋ habu lo hetimojok, " obe iyyohoi ewuon holobo habu ati Kesari." ¹⁶ Nia atta Pilato eloitok Yesu to hosie hesihok. ¹⁷ Eyari isia Yesu, ojo esio inyia hatahafitai kuruce no honyie to wan no honyie, amai nobo no eliloŋo isia hijo mai nohet, ojo eliloŋo hijo Gologota to Ebrei. ¹⁸ Esihok isia Yesu dia iko ilak hiyyo lohorik, lobotie toko hani ho ihorroŋ, lobotie toko inyiet ojo Yesu to hiji. ¹⁹ Egiorok ifa hidofe Pilato hutuhuti atta ehumak to kuruce: YESU LO NASARIT, HABU LO YUDEA. ²⁰ Yudea aria ehina hutuhuti nia nyo mai nafa esihohini isi Yesu eliaha ifa iko bore na gala nettok. Egioro ifa hutuhuti nia to Ebrei, to Latin ojo to Girik. ²¹ Atta lettok lo hetimojok lo Yudea hijo to Pilato, "Baŋa egiorok hijo, 'Habu lo Yudea,' ati nojo inyia, ''Naya Habu lo Yudea.''' ²² Etiraŋ Pilato, " ino egiorok naŋ egiorok naŋ." ²³ Tahalu nafa esihok oseŋer Yesu, atta isia adumu jolofiya no honyi atta huŋuŋut amasik aŋwan, atta hisio abotie abotie to oseŋer illafa lia, ojo hidofe gemis daŋ. obe gemis owuon iko higierita inno obiaŋarik isie man to hide man aŋolon. ²⁴ Atta isia hijo to wati innohosie, hotobiaŋa ida egugwas inna, ati hetibak mwaŋa hijo hara iso ŋai ohu eyari." Ara hijo anyar etufut higierita hunna ojo, "Ebubwanyak isia boŋojin innanaŋ to wati innohosie ojo gamis nanaŋ abaha isia mwaŋa." ²⁵ Egiem oseŋer iyya egioro. Hotonye Yesu, hanasi hotonye honyie, Maria oŋoruo kolopas, ojo Maria Madalina-isia inafa oweta aŋati ho kuruce no Yesu. ²⁶ Nafa egonyu Yesu hotonye honyi iko heyiyanak hullo omuno inyie oweta aŋati honyie, atta inyia hijo to hotonye honyie, "Tuŋani inna, towolo, onyi hoi ille!" ²⁷ Atta hidofe hijo to heyiyanak, "Itiwolo, nia hotonye hatai nia!" Ta saa nyia atta heyiyanak eyari inyia ahaŋ honye. ²⁸ Tahalu ho hirro inia daŋ, nyo oyyen inyia hijo esaha hirro bidaŋ, hetuhutehini higierita hatara dede. Atta Yesu hijo, ''Eboto naŋ.'' Owuon ifa moti ne efut ho balu na ajalaŋi ²⁹ dia, atta isia awohu gin to fede atta akafak ahide to hutuk honyie. ³⁰ Nafa emat Yesu, atta inia hijo, "Esaha." Atta eruŋok hoo no honyie atta hisio Oyiri no honye. 31Adiarak isia hijo hotobiaŋa wati inia arasa ³¹ Adiarak isia hijo hotobiaŋa wati inia arasa to kuruce man toholoŋ no Sabato ( ara Sabato holoŋ nololibo binoo), etitif Yudei Pilato hijo awak efie huwur hejiek lia esihohini, atta etulu wati innohosie afau. ³² Nia atta oseŋer afanu huwur heju no tuŋani hitieri iko hitarihi inno hiyyo illafa esihohini iko Yesu. ³³ Nafa afanu isia to Yesu, egonyu isia hijo oye inyia beren, nia enyai isia holour hejek innohonyie. ³⁴ Ati, ocuk lobo lo oseŋer inyia to fere, atta hoto iko hifioŋ hidoŋ teyya. ³⁵ Tuŋani lia egonyu ara inyia asut, ojo hilosut no honyie ara dede. Oyyen inyia hijo inia egonyu inyia ara dede anyar hidofe eruk itai. ³⁶ Afanu hirro inia daŋ hijo anyar etuhutek hirro inafa egiorohini, " hijo obe iso lobo heito lohonyie lobotie ouro." ³⁷ enyiak ofe nobo higioro hijo, "Afanu iso isia riŋa to honyie lia ocuk isie." ³⁸ Tahalu ho hirro inia Yosefu lo Arimatea, efahati lo Yes, aliabari to baŋi no Yudei, atta hifi Pilato hijo awak inyi eyari wan no Yesu. Ojo Pilato ata huru to honyie. Nia atta Yosefu awoŋ eyari wan no honyie. ³⁹ Awoŋ hidofe Nikodemo, inia lafa ottu hiteri to Yesu tatari. Eyani inyia attagoŋi iko innak yanik inno oŋuo girgir oremik hulur to icemit no ara hisihai nobotie. ⁴⁰ Eyari isia wan no Yesu atta isia hububun wan no honyie to boŋo iko hitiŋuojita, ara ifa imohit no Yudei hanuhahini tuŋani. ⁴¹ Owuon ifa mana tamai nafa esihohini hiyyo inyia; ojo dia to hotwai mana owuon ifa ilume ŋejuk inna holobeŋ lobo tuŋani anuhahini dia. ⁴² Nyo ara ifa holoŋ nafa ehuhumaru Yudei far no Sabato ojo hidofe eliha ifa ilume nia dia aŋati, etiferik isia Yesu dia.