¹ Tahalu etiliek ifa Yesu wan nohonyie to heyiyanak ta hari no Tiberia, etuhutek inyia wan no honyie tiji: ² Owuon ifa Simone Peturu ojo Tomasu lo ililoŋo hiyo hijo Didimo inna etuhutek hijo 'Ituret, ojo Nataniele to Kanan no Galilea, iko durre ohorik illo Sebedeyo ojo ilak heyiyanak illohonyie lohorik. ³ ojo Simone Peturu to hosie, "Eno naŋ egalari ham." Atta isia hitiraŋ hijo, "Efi daŋ , atta isia alik ahotwe togoli, atta efie egallari. Egalla isia harie daŋ ati obe isia egalau lobo. ⁴ Ati nafa aciale motie oweta Yesu totifor hahari, ati obe heyiyanak oheru hijo Yesu lia. ⁵ Ojo Yesu to hosie, "Ilasirak hanaŋ, owuon ilak hirro ilo edaha itai?" Etiraŋ isia to honyie hijo, "Obe." ⁶ Atta inyia hijo to hosie , " ibirok imutuk iyafohit nahatai ahani he inyiet ho togoli, ati errumek iso itai." Atta isia ebirok imutuk nyia hosie, ati obe ifa isia oremik epihu imutuk ahotwai togoli nyo emunyia ifa ham dia arie. ⁷ Atta heyiyanak hullo omuno Yesu hijo to Peturu hijo, "Habu lia." Nafa etiru Simone Peturu hijo habu lia, atta adumu boŋojin atta eciofok nyo obe gamis tara honyi atta esurok ahotwai hari. ⁸ Atta heyiyanak illafa ilak afanu to togoli illo epiho imutuk iyafohit ne efut iko ham nyo obe ifa otifor nahari alama. ⁹ Alu isia to hotwai togoli, egonyu isia hima oulo to otifor ojo ham omuda dia iko imune ¹⁰ Atta Yesu hijo do hosie, "Iyyani ham inia eniefu itai." ¹¹ Atta Simone Peturu eno ahide atta epihu boi otifor ahari, nefut ho ham, 153. Obore ifa ham ati obe ifa boi oremik futo. ¹² Atta Yesu hijio to hosie, ''Ifanu adaha, obe lobo le heyiyanak le eŋere inyia hijo, 'ŋai iyye? Nyo oyyen isia hijio Habu lia.'' ¹³ Atta Yesu eno ŋadumu imune iko hami atta hisio to hosie. ¹⁴ Ara inna hinyiahi hitahunihi netiliehini Yesu wan nohonyie to heyiyanak ta halu he hebuhuni nohonyie to ye. ¹⁵ Esok isia daha ŋiria, efi Yesu Simone Peturu hijio, ''Simone, lonyi Yoani, hemuno iyye nayya agalik hirro hunna? Ojio Peturu to honyie hijo, 'Eee Habu, eyyen iyye hijo amuno nayya iyye.' ¹⁶ Atta Yesu hijio to honyie, ''Irribitai kioro innanaŋ.'' Enyiak Yesu hifia inyia hitarrihi hijio, ''Simone, lonyi Yoani, 'Emuno iyye nayya?' Atta Yoani hitirraŋ hijo, "Eee Habu, eyyen iyye hijio amuno nayya iyye." ¹⁷ Efia Yesu inyia hitahunihi hijio, "Simone lonyi Yoani, 'Emuno iyye nayya dede?' Ejiriŋa ifa Peturu to hifii hitahunihi nefiari inyia hijio, ''Emuno iyye nayya dede? Attati inyia hitirraŋ hijio, 'Lettok, eyyen hirro daŋ hidofe eyyen iyye hijio amuno naŋ iyye.' Ojio Yesu, "Irribitai kioro innanaŋ.'' ¹⁸ Elimak nayya iyye dede, dede, naffa helera iyye hiito, eciefita ifa boŋo nohoi hidofe elocie amai ne ewak iyye; ati lahimaruak iyye, erriomok iso iyye has innohoi ojio lobo eticiofok iyye boŋo to hoi atta eyari iyye anobo mai nobe iyye ewak awuye." ¹⁹ Ojio inyia inna hetahutahini ye no Peturu ne etihabuo iso Hollum. Ta halu ojio inyIa to honyie, "Ijufutai nayya." ²⁰ Atta Peturu yitoi hidofe egonyu heyiyenani lo omuno Yesu arrasa hijufuta. Inyia heyiyenani lafa otirok wan to Yesu ta adahari, hidofe efia hijo, "Habu ŋai iso lia letinyaŋak iyye?" ²¹ Egonyu Peturu inyia atta hijio to Yesu, "Habu, hara mahu ille?" ²² Atta Yesu hijio to honyie, "Kuyya anyimu nayya hijo anyar arasa inyia man attuni nayya, hara ati inyia to hoi anyo?'' ²³ Essarik hiro te ilasira hijo anyar lobe heyiyenani lia oye. Ati obe Yesu ojio, obe iso inyia oye, ati ojio inyia, kuyya anyimu nayya hijo arrasa inyia man attuni nayya, ''Hara ati inyia to hooi anyo?" ²⁴ Inyia heyiyenani ille le etuhutek hitimijani to hirro hunna hidofe egiorok isia, atta iyyohoi hiyyen hijio, ara hitimijani nohonyie dede. ²⁵ Owuon hirro inno oluŋa innafa egiema Yesu. Negioro ifa hirro hunna daŋ, egigilo nayya hijo, obe fau inna oremik attubu hirro inne egioro to buhi.