¹ Itai heruhok hulloŋ, emak Hollum itai to oger atta anyimu itai hatara illohonyie. Ati itiwolo Yesu. ² Ara inyia efahati lo Hollum to hoi ojio hidofe ara fadiri le ettok lafa eruk iyyohoi bi daŋ nobotie. Egiem inyia hirro dede to Hollum, lia onyimu inyia, iyya nafa egiamari Musa to hiyyo illo Hollum, ille ellilloŋo iyyohoi hijo haji no Hollum. ³ Ati iyyania oyyeu inyia illak hiyyo hajik bidaŋ, oyyeu Hollum hirro bidaŋ. ⁴ Ati oduhohini hajik daŋ te illak, ati Hollum lia oduho hajik bidaŋ. ⁵ Etilik ifa Muse taji to higiama to Hollum ojio hidofe oluak hiyyo illo Hollum, iyya hegiamani le etilik taji te ettok lo honyie. Ati elimak Musa hijo nyo iso nia owu Yesu hijio. ⁶ Ati ara Kristo onyi Hollum ille ara hekumoni ho hiyyo ilo Hollum, Ejio iyyohoi era hiyyo hullo ekumo inyia efi iyyohoi adule ho ŋere no hiruk to Kristo ejo iyyohoi edule ha tajia hijo owu Hollum higiem hirro innafa ojio inyia hijo awu inyia higiem tohoi. ⁷ Atta Oyiri no Olibo etuhutek hegiorok ho waraga hijo hegiorok hirro inno to Baibol te Isarail: ''Iyyania, ⁸ etiru itai Hollum ero tohoi, hotobiaŋa itai ettuho ojio hidofe ebe ebaŋ inyia, iyya nafa obiaŋari mamanyiok illahatai omiasari inyia nafa ociamari Hollum isia to waha. ⁹ Edas ifa mamanyiok illahatai hiciem nayya, hijo kuyya awu iso nayya mahu hidik daŋ hosie, hara hido ŋasi tomwana aŋwan egonyu isia hirro hunna olibo ino agalik ino egiem nayya. ¹⁰ Ati atta nayya hiloyito to hiyyo ilia, atta nayya hirro te isia, 'Obe isia nobo eruk ta hanaŋ, ojio hidofe obe etiru hawak isia hehumak imanyiti innohosie jai.' ¹¹ Ejoria ifa nayya daŋ hosie atta nayya elimak dede to hosie bidaŋ, 'Obe isia ofu ajiŋak ta fau no Kanaan na awu nayya hisio isia eyyomori!''' ¹² Atti, heruhok huloŋ, ihuma riŋa tok obe elak illahatai eruk to Kristo to nyo to run na tajia innahai, ino ehumak itai hebuara Hollum hayyani ile dede owuon. ¹³ Itudule hitigol wati inahatai holoŋitek daŋ, halawak Hollum itai. Hijo hotobiaŋa lobo tara hatai etigol taji nohonyie to hinyiaba iko iyyau. ¹⁴ Efi iyyohoi iyyania tubai iko Kristo le edule iyyohoi eyyik ta tajia te innohoi hiruk to honyie, man to holoŋ to nyia nafa etiarari iyyohoi eyihini to honyie man to far nyia eyori iyyohoi. ¹⁵ Egiorohini ifa to higierita hijo ojo Hollum, Iyyania, etiru itai nayya ero ta hatai, hotobiaŋa itai ettuho ojo hidofe emiasa nayya iyya nafa egiem mamanyo illahatai atta hibo nayya.'' ¹⁶ ŋai lafa lia eyyen itai lafa etiru Hollum atta hidefer? Obe ifa ara lia daŋ illafa afanu ade ta Masir tara Musa? ¹⁷ Ejoria ifa inyia iko ŋai ta ŋasi innafa tomwana aŋwan? Hobe ifa ara liyya ille eyyau, atta isia ahuyik to waha? ¹⁸ Hettuŋo ifa inyia ta ŋai hijo ebe iso isia ojiŋak yiri, lobe ifa hiyyo illafa omiasa inyia? ¹⁹ Obe ifa isia oremik ajiŋak to yiri nohonyie to biaŋan no huruk nohosie.