¹ Iyya, ojo ifa Hollum hijo efi iyyohoi yiri, ati anyar ehum riŋa, anyar ewon nalanyar hotobiaŋa lobo tarahatai ohuyek to hiro huna. ² elimak ifa tohoi sayye no olibo inya owoun. Ati obe ifa sayye nia oluak hetirak to nyo obe isia owuon ho hiruk iko lia ilo obe eruk. ³ Iyyohoi hullo eruk hame eremik ojiŋak to yiri no Hollum, iyya ojio inyia hijo, "Iyya ettuŋo ifa nayya to jore, hijo obe iso isia enyiak ajiŋak to yiri.'' La ara ania, esaha ifa igem nohonyie to hitieri na fau inna man beren. ⁴ Ero inyia to nobo to hiram no hitahatarihi no holoŋ hijo, "Oyiri ifa Hollum to holoŋ no hitahattarihi tara igemita innohonyie.'' ⁵ Enyiak inyia hijo, "Obe iso isia oremik ajiŋak to yiri nanaŋ.'' ⁶ Iyyania, enyiak illak hiyyo ajiŋai eyyomori, Ati liya ilafa etiru sayye nalanyar nafa elimahini tohoi obe isia ojiŋak nyo obe isia eruk. ⁷ Ati enyak Hollum ehumu holoŋ nobo, na ara "ena" ifa lero inya to Davide egioroni ifa hiro nia: ''Iyyania, etiru itai hutuk nohonyie, ibaŋa etigol tajia innahatai.'' ⁸ La ara ifa Josua esio to hosie yiri, no obe ifa Hollum enyiak hiro to nobo far. ⁹ Iyyania, holowuon yiri to hiyyo illo Hollum. ¹⁰ To tuŋani lo ojiŋak to yiri no Hollum, oyiri hidofe inyia ta wan nohonyie tara higiemita innohonyie iyya nafa oyiriari Hollum tara innohonyie. ¹¹ Iyyania hetijiŋak to yiri nyia, hijo hotobiaŋa lobo tuŋani ohuyik to miasa nafa egiem isia. ¹² Owuar hiram no Hollum ojio hidofe egiama, no ofi agalik fijan no demio arik. Ocuk man obuany oholio tara oyiri, obuany huttuluta tara het. Oremik hiyyen higigilita inno owuon ta taji. ¹³ Obe nobo sihin nafa oyyeu Hollum beren oremik eŋofohini. Ati oliew hirro bidaŋ to honyiehite inno tuŋani la afanu iyyohoi hisio higiemita innohosie. ¹⁴ Iyya ewuon iyyohoi iko fadiri lettok lafa ojiŋak eido, Yesu Kristo onyi Hollum, heniafa no ogol to huruk nohoi. ¹⁵ Obe iyyohoi ewuon iko lobo fadiri le ettok lo obe oremik hamelehini te iyyohoi. Ati ewuon iyyohoi iko tuŋani lafa eba te iciemiti ariai iyya iyyohoi, ati obe ifa inyia owuon heyyau. ¹⁶ Isiara iyyohoi hafanu to hiŋere to hittoloji no hamehini, anyar emoju iyyohoi hamelehini ejio hidofe errumu hamehini no oremik hiluak iyyohoi to holoŋ ne ewak iyyohoi luaha.