¹ Iyyania man to hitieri ne imor owuon ifa mai no hitihabuo ta fau ojo hisiŋita inno hitihabuo. ² Nyo to altari ehuhumahini ifa mai imojit, teko bali ara ifa mai nolodua. Dia ta manya nafa owuanari, teremeja ojo imune ara ifa no wuana. ³ Ojo to holoŋ hitarihi no boŋo owuon nobo gutiya, nafa ara mai nolodua. ⁴ Ara ifa yiel no attagog. Ara ifa hidofe togoli ne imwor, nafa ara bi- daŋ owuon iko yiel. To hotwe ara ifa yiel te hulo namanna, hali nafa ha Arone obolo, iko moru no himwara. ⁵ To hide hotogoli ne imwor ara hihiana no kuatan nolo owoun to hide nolojo etiwet inyi nolobe oremik higiorok arumek to to hiram. ⁶ Ta halu ifa adiarak isia hirro inia, olot ifa fadiri hesiŋari anyar ojiŋu inyia abali na haji imojit anyar oremik hisio wan nohonyie to higiemita. ⁷ Ati ojiŋak fadirir le ettok hame ta haji hitarihi inyia lobotie to hiŋa, ojo obe esio nobo hisio no hoto nyo to wan nohonyie nyo obe awak himor isia. ⁸ To nia, etuhutek Loyiri lo Olibo te iyyohoi hijo obe nobo mai no odua binno nafa holowueta haji hitieri nia. Nyo ara inyia rijori no holoŋitek inia. ⁹ Nyo ettallik hisiorita iko hihumita innafa esiarahini man he iyyania horemik hitilibo higigilita inno hetihabwok. ¹⁰ Nyo ara hifahita hunna to wan no tuŋani hame iyya to daha iko mata ojio hillilla. Esiarahini hifahita inia te iyyohoi man ottuni Kristo. ¹¹ Ati olew Kristo iyya fadiri le ettok lo hirro inno olibo inna afanu iso. Ojiŋak inyia ta haji ne ettok no obe oduhohini ta has nalagalik haji nafa nyia, nyo obe inyia la fau nyia. ¹² Obe ifa ara to hoto no hine ojo to hoto no tawo, ati ara ifa to hoto nohonyie nafa ojiŋahini Kristo tamai inna odua to okit nobotie tolobo lia ojo etilahu iyyohoi to hitilahita inno hicuŋitak. ¹³ Nyo kuyya noremik hoto no hine ojo no husuŋ arwasak te ilia hullo etidiara hijo anyar elibo isia ojo hidofe ojo hijo anyar etilibo wati innohosie, ¹⁴ Hara bajai iso hoto no Kristo, lia ille esio wan nohonyie to oyiri nolobe hibwoti to Hollum, lofie higigilita innohoi tara higiemita inno ye anyar egiem to Hollum ille owuar? ¹⁵ nyo to higigilo nia, ara Kristo hetimwarani ille ŋejuk le imwor. Ara nia hijo owuana ye to masik hunna owuon imwor to hitieri he-iyyau, nyo ilia hullo ellilloŋ Hollum hijo omoju itieriti inno manya no ruta no odule.anyar ¹⁶ Iyya aji amanya lobo lia tahalu ho hiruk, ara iso dede hijo anyar eyyen itai no tuŋani lia ille ehumak iyya. ¹⁷ Nyo olibo waraga no tuŋani harutani, hijo loye monye lohonyie; obe inyia egiama holowuar inyia le egioro inyia ta wan. ¹⁸ Teyya to hitieri obe ifa imwor etiarahini holobe hoto. ¹⁹ Nyo nafa esio Musa hifahita inno bisan to hiyyo, Odumu inyia hoto no hiteŋ ojo no hine, iko hifioŋ atta ewuasak to hiyyo iko; to higierita. ²⁰ Teyya ejo inyia, ara inna hoto himori nafa esio Hollum ta hatai.'' ²¹ To koi inia, arwasak inyia hoto to haji ojo to tobwaha innafa egiamari fadirihien. ²² Ojo iyya nafa ojo ibisiti, hirro bi-daŋ olibo to hoto. Lobe wo no hoto obe nobo hahehini no hiyyata. ²³ Tonia ara ifa dede hijo hegiorihini no hirro nia te ido anyar olibo to hoto no hibuluci no ciaŋi. Teyya, hirro inno ido to wati innohosie olibo iso nalanyar to hibulucuta. ²⁴ Nyo obe ifa Kristo ojiŋak ta mai no odua hunna ehumak hani, hunna egiorohini iyya ara dede. Ati iyya to honyie hajiŋahini te ido hamai, inyia nia olieu inyia iyyania to hosiere ho Hollum te iyyohoi. ²⁵ Obe ifa inyia owu adia hijo anyar esio inyia wan nohonyie holoŋitek daŋ, iyya ara fadiri lettok, ille ojiŋak to mai inna odua ta ŋasi iko hoto nobo. ²⁶ Kuyya lara ifa nia dede, inyia ati nia oremik inyia iso hetabana hinyiahita arriai man to hitiari ha fau. Ati iyyania ara bi daŋ ania to hicuŋi no ŋasi nafa etilieu inyia hijo anyar efiyak ade to hiyyata inno hibuluci inno wan nohonyie. ²⁷ Iyya esio ifa Hollum to hiyyo hayori hinyiahi nobotie, ojio ta halu nia atta ŋoto hawoŋ. ²⁸ Esiarahini hidofe Kristo hinyiahi nobotie hadihuni hiyyata inno hiyyo arria; ojio hidofe inyia ottu hinyiahi hitarrihi, obe ara to hiram no hiyyata, ati hetilohini hiyyo ille etila inyia.