¹ Ara ifa hifahita arrijori no hirro hunna olibo, hunna afanu iso, ati obe ara isia hirro inia luŋa, Tonia obe iso isia oremik etibisak hiyyo hullo afanu to hihumita hunna odule fadiri hisiara ŋasi daŋ. ² Kuyya etibisak ta hido isia hiyyo, opuak iso isia hesiarari to higemita nyo kuyya etilibo hihumita hiyyo hullo esiara, ³ obe ida isia enyiak higigilo to hiyyatta innohosie. Ati to hihumita ŋasi daŋ to hiyyata hosie ⁴ nyo obe hoto no husuŋ kuyya no hine no oremik ŋeyari hiyyata ade. ⁵ Niyya, nafa awoŋ Kristo afau ojio inyia hijio, "Ebe iyye lewak hisiorita iko hihumita, ati ehuhumak iyye wan ta nayya. ⁶ Obe hidofe iyye limuno hihumita hunna osuahak iko hunna hiyyata. ⁷ Atta Nayya, "Itiwolo Hollum, attu naŋ egiamari wahan nohoi, iyya egioro ifa to buk nohoi ta nayya." ⁸ To hosiere ojio inyia hijio: "Obe iyye emuno hisiorita iko hihumita, obe hidofe iyye ewak hihumita inno osuahahini iko inno hiyyata inne esiarari iyya egioro to hifahita. ⁹ Ta halu ojio inyia hijio, "Dede attu naŋ egiamari wahan nohoi, tonia, etupuak inyia itierit hitieri hijio, "Anyar etigol inyia hitarrihi. ¹⁰ To wahan to no Hollum, errumek iyyohoi libe nyo esio Yesu Kristo wan nohonyie hinyiahi hitieri to hiyyo daŋ. ¹¹ Holoŋitek daŋ owueta fadirihen hesiarari hihumita hosie gaga, ati obe hihumita innia oremik eyyari hiyyata inno hiyyo daŋ adde. ¹² Ati esio ifa Kristo hihumi nobotie no odule mak to hiyyata, atta inyia hittole oko inyiet no Hollum. ¹³ Etila man ehumari miorok illohonye iyya ebalori no hejek innohosie. ¹⁴ To hihumi nobotie etilib inyia onyimot honyie tulaŋ. ¹⁵ Hidofe ara Oyiri lo Olibo asut hohoi atta inyia hijio, ¹⁶ "Ojio Habu, 'Ara naŋ himwara ne esio iso naŋ to hosie ta halu ho holoŋitek nia. Efiyak iso naŋ hifahitai inneti da tajia innohose, hidofe egiorok iso naŋ higigilita innanaŋ to tajia innohosie, ajio hidofe egiorohini ta higigilita innohose."' ¹⁷ Ojio hidofe inyia hijio, "Abe iso naŋ enyiak agilu hiyyata innohosie iko irruti innohosie." ¹⁸ Tonia, lowuon hebusak no hiyyatam obe lobo tuŋani enyiak hisio hihumi to hiyyata. ¹⁹ Tonia ilasira hanaŋ, ewuon iyyohoi iko hiŋere hajiŋare tamai no odua binno to hoto no Yesu, ²⁰ to hikoi ŋejuk na aŋa te iyyohoi hajiŋari aboŋo no orita nara iyya wan nohonyie. ²¹ Nyo ewuon iyyohoi iko fadiri lettok binno lara ettok lo hiyyo illo Hollum. ²² Tonia hehutok aŋati ta tajia hunna obis, inne efut iko hiruk, ojio hidofe inne ellilauni te iwahiti inno orru, hidofe hehutok iko wati inne ellillani to hifioŋ inno olibo. ²³ Hetigolik to heyyik nohoi to biaŋan no hikuyya, nyo obe iso lia lafa ociorok hirro inne etipuak itieriti innohonye. ²⁴ Hidofe anyar egigilo iyyohoi to halasirak illohoi hetuwulori isia hamunori halasirak hosie ojio hidofe egiamari no olibo. ²⁵ Hidofe anyar iyyohoi ebe etupuak tubai no wati innohoi iyya egiama hiyyo hilak, ati hesiŋai halasria hohoi na agalik iyya egonyu itai holoŋ no Kristo eliaha. ²⁶ Kuyya omoju tuŋani bisan ojio ta halu, odule hiyya ojio inyia hidofe omuno hiyyata, obe nobo hihumi no oremik hefufuse hiyyata inne. ²⁷ Ati orrumek iso inyia ŋoto no lorru binno ojio hidofe hima no owulo binno noremik hitattur iso miorok illo Hollum. ²⁸ Ottohe ifa tuŋani to biaŋan no hamehini lia lebo lobo hifahita inno Musa lafa ero suti lohorik kuyya lohunik. ²⁹ Ati osiru iso haŋotori no obolo binno agalik to lia lebo Lnyi Hollum, lia lo omiana inyia to hoto ne emwarari no oremik hitilibo inyia, ojio hidofe omoro Oyiri lo hamehini. ³⁰ Nyo eyyen iyyohoi lia lafa ojio hijio, "Elienyu iso nayya ajio hidofe, "Aduma iso nayya." Enyiak hidofe inyia hijio, "Oŋot iso Habu hiyyo illohonye." ³¹ Dede, hahuyek ta has ho Hollum hauarani, ara hiram ne eyyani baŋi binno! ³² Ati itigilu holoŋitek innafa ellaŋ beren, nyo nafa eruhori itai hitigiemita inno ogol. ³³ Te innak holoŋitek ellohitari ifa hiyyo itai te imoriti iko ibahiti, ojio te innak holoŋitek ettole ifa itai nobotie iko hiyyo illo orrumek hitigemita. ³⁴ Nyo emehini ifa itai to liyya ille efita to kijan, ojio hidofe itai emuno nafa eyari hiyyo rori innahatai adde nyo eyyen itai hijio owuon hirro inna olibo agalik, ojio hidofe hiruk odule ta hatai fur. ³⁵ Tonia heruasak heyyik nahatai ade nyo errumek iso itai duma no obolo binno. ³⁶ Anyar ewuon iyyohoi ho dihan na tajia da hatai hijio lia lehuma to wahan to no Hollum, orrumek iso isia itierit. ³⁷ "Nyo ojio higierita hijio, 'Eba iso lia lo ottu, ati obe iso inyia elliŋa. ³⁸ Ati amanya iso hegiamani hanaŋ lo olibo to hiruk, ati loyite inyia, abe iso naŋ amuno inyia." ³⁹ Ebe iyyohoi era iyya liyya illo oyitori atta ye, ati ewuon iyyohoi iko hiruk hetilohini oholioho innohoi.