¹ Lewak Hollum ŋanyimu ettok la fadirihien, egielu inyia tuŋani to hiji ho hiyyo. Tuŋani lia ohu higiama to Hollum to hiyyo; tuŋani lia ohu hisiara hisiorita to Hollum ojio hidofe esio ciaŋi to honyie to hiyyata inno hiyyo. ² Ohu ettok lia hetimojok nyalami to hiyyo ille oyyen kai hiram no Hollum ojio hidofe to hiyyo ille eyyau to honyie. ³ Ara nia iyya elik ettok lo hetimojok to wan to lohonyie ho hiyyata, eyyani nia to honyie hesiara inyia ciaŋi ahisiorita hijo eyyau inyia iyya egiama hiyyo daŋ. ⁴ Hotobiaŋa lobo tuŋani ta wan nohonyie eyari lohuo inna. Ati Hollum ellilloŋu inyia, iyya nafa ha Arone. ⁵ To hikoi nia, obe ifa Kristo ta wan nohonyie emak wan nohonyie a fadiri le ettok. Ati, ojo tuŋani lafa ero to honyie hijo, "Iyye Lonyi hanaŋ; ena era nayya tohoi a Monye.'' ⁶ Ara iyya nafa nia ojitari inyia to nobo mai hijo, "Era iyye a fadiri tulaŋ, ta halu ho hipali no Melkisedek.'' ⁷ Nafa amanyari Kristo ta fau, omojo inyia to Hollum atta hifia inyia lo oyo to honyie to hidenya. Efi inyia Hollum, ille oremik etiluahu inyia to oyori. ⁸ Etira Hollum to honyie to nyo abaŋ Kristo Hollum. Hara hido Yesu lonyie Hollum, amijak inyia baŋi Hollum to hitigiemita ojo to ye. ⁹ To hesahak nohonyie hirro bidaŋ innafa ojio Hollum to honyie igiama. ¹⁰ Onyimu ifa Hollum inyia hatara ettok la fadirihien iyya tekoi ta nafa asarari Melkisedek ettok la fadirihien. ¹¹ Owuon hirro aria inno Yesu inna awak nayya elimak ta hatai, ati ogol to hiro nyo obolo hibolit ta hatai, obe itai eremik etiru. ¹² Ati ne era ida itai iyyania hetiyanak, hedule itai wahan lobo tuŋani hetiyanai itai hirro illo odicio inno Hollum. Ewak itai le, obe ara ŋiria no ogol! ¹³ To tuŋani lo odule mata le, oremik hiro hirro inno ibisiti, nyo halara inyia ahiito le ettin. ¹⁴ Ati ara ŋiria no hiyyo hullo hittaha. Isia ilia hiyyo hullo ogol to himaruak nohosie emak hosi innohosie to hitiyana atta egigielu libe tara irruti.