¹ Ojio ifa Hollum hijo efi iyyohoi eyyomu, ati anyar ehum iyyohoi riŋa, nyo efi iyyohoi nyai helerumu mai hiyomi no Hollum. ² ŋetiru iyyohoi sayye no olibo hijio esio Yesu to hoi hiyomi no Hollum, ofe iyya nafa etirini Isarail hijio no Hollum to hosie hijo ofu isia hiyiri to fau ho Kanaan. Ati obe ifa sayye ne oluak Isararail to nyo obe isia owuon ho hiruk to Hollum iyya egiem Josua ho Kaleb, obe sayye no olibo oremik hiluak iyyohoi lebe iyyohoi eruk to Hollum. ³ Iyyohoi hullo eruk hame eremik ajiŋak to yiri no Hollum, iyya ojio inyia hijo, "Iyya ettuŋo ifa nayya to jore, hijo obe iso isia enyiak ajiŋak to yiri.'' La ara ania, esaha ifa igem nohonyie to hitieri na fau inna man beren. ⁴ Ero inyia to nobo to hiram no hitahatarihi no holoŋ hijo, "Oyiri ifa Hollum to holoŋ no hitahattarihi tara igemita innohonyie.'' ⁵ Enyiak inyia hijo, "Obe iso isia oremik ajiŋak to yiri nanaŋ.'' ⁶ Enyiak illak hiyyo ajiŋai eyyomori no Hollum. Ati Isarail illafa etiru hosiere hijo no Hollum hijo ofu iso isia hiyyom- obe isia ojiŋak mai nafa ho hiyyom, nyo obe isia eruk to Hollum. ⁷ Ati emak Hollum holoŋ nobo ne efuyeri iyyohoi ajiŋari mai nyia no hiyyom. Holoŋ nyia innaŋ! Eyyen iyyohoi dede ati nafa ta halu ebo Isarail Hollum to waha, emak Hollum haboloni Davide hegiorok nyo nia ejio inyia ifa, ''Iyyania, etiru itai hutuk nohonyie, ibaŋa etigol tajia innahatai.'' ⁸ La ara ifa Josua esio to hosie hiyyom, no obe ifa Hollum enyiak hiro to nobo far. ⁹ Iyyania, holowuon hiyyom to hiyyo illo Hollum. ¹⁰ To tuŋani lo ojiŋak to hiyyom no Hollum, eyyom hidofe inyia ta wan nohonyie tara higiemita innohonyie iyya nafa eyyomori Hollum tara innohonyie. ¹¹ Iyyania hetijiŋak to hiyyom nyia, hijo hotobiaŋa lobo tuŋani ohuyik to miasa nafa egiem isia. ¹² Owuar hiram no Hollum ojio hidofe egiama, no ofi agalik fijan no demio arik. Ocuk man obuany oholio tara oyiri, obuany huttulita tara het. Oremik hiyyen higigilita inno owuon ta taji. ¹³ Obe nobo sihin nafa oyyeu Hollum beren oremik eŋofohini. Ati oliew hirro bidaŋ to honyiehite inno tuŋani la afanu iyyohoi hisio higiemita innohosie. ¹⁴ Iyya ewuon iyyohoi iko fadiri lettok lafa ojiŋak eido, Yesu Kristo Lonyi Hollum, heniafa no ogol to huruk nohoi. ¹⁵ Obe iyyohoi ewuon iko lobo fadiri le ettok lo obe aremik hamelehini te iyyohoi. Ati ewuon iyyohoi iko tuŋani lafa eba te iciemiti arria iyya iyyohoi, ati obe ifa inyia owuon heyyau. ¹⁶ Isiara iyyohoi hafanu to hiŋere to hittoloji no hamehini, anyar efwotu iyyohoi hamelehini ejio hidofe errumu hamehini no oremik hiluak iyyohoi to holoŋ ne ewak iyyohoi luaha.