¹ Iyania to holoŋitek hunna, ifa lobolo iluluŋ ne hejufutak, odiote hiram to hiji ho hiyo ino Yuda ojo isia ara ino Greece, etiara isia aliwari hiyo ino Iberei, nyo egigiala ifa hiyo isia holoŋitek daŋ to hara no ŋiria. ² Elilloŋ hejufutak tomon ho lohorik iluluŋ no hejufutak to hosie ata hijo, "Obe obis to hoi hebusak hiram no Hollum hijo anyar egiama to tarafejaha. ³ Anyar enyimu itai, halasirak, hiyo hatarik to hiji hatai, hiyo ilo ogeny, ile lefut ho oyiri ojo ofioroho, ile eremik iyohoi ahutu te igem ina. ⁴ Iya tohoi, edule iso iyohoi to mojo iko to hitiyana no Hiram no Yesu.'' ⁵ Etumuno ifa hiro nohosie iluluŋ. Niya anyimu isia Stifen, tuŋani le efut iko hiruk ojo oyiri lo olibo, ojo Fillipo, Prokoro, Nikanora, Simone, Paramena, ojo Nikola, la Antioka. ⁶ Eyani heruhok hiyo ilia ahosire ho hejufutak, ilo omojo ata atirok has inohosie te isia. ⁷ Nia ata hiram no Hollum essarik bino; ojo iluluŋ no hejufutak ofonihini to Yerusalem na agalik; man, ata iluluŋ netok na fadirihien afanu hujufuta hiruk. ⁸ Iyania, ara ifa Stifen tuŋani efut iko hamaihini ojo golon, man egiama idwariti ojo hituhutita to hiji ho hiyo ariaii. ⁹ Ati odioto ifa elamuk hiyo iloSinagog, ilafa ojo isia hiyo ilobolioŋ, ojo isia ara ilo Sirina iko Alexandria ojo ilamuk hidofe iloSilisia ho Asia. Orijita ifa hiyo ilia he Stifen holoŋitek daŋ. ¹⁰ Ati obe ifa isia oremik attulu ofioroho ojo oyiri nafa erarari Stifen. ¹¹ Man ofu isia hiro te ilamuk hiyo ile eruk hijo, "Etiru iyohoi Stifen ero hirorita ino oru to fure no Muse iko no Hollum.'' ¹² Ata isia hisusu hiyo, maruak, ojo hegiorok man opunyahini isia Stifen, eniefu inya, ata eyani inya a hosiere he iluluŋ ne etaha. ¹³ Ata isia emumunak to honye hipalita ariaii hijo, "Obe tuŋani ile awak hitiwet moro imojiti ojo hifahi nohoi. ¹⁴ Etiru iyohoi inya lojo hijo 'Etihar iso Yesu lo Nazareth mai ina ata hiloit imohiti inafa esio Muse te iyohoi." ¹⁵ Oriŋa ifa hiyo ilafa etole dia ata egonyu homom nohonye eloito iya homom na anjilo.