¹ Owuon ifa lobo tuŋani lara fure nohonye Anania, iko Safira oŋorwuo honye, etinyaŋai ifa isia nobo iruta nohosie, ² Ata inya eŋofok hinyaŋita (ojo hidofe noŋoruo honye oyen), ata inya eyani kai ina arobiyaha ata hisio to hejek ino efahat. ³ Ata Peturu hijo, "Anania, nyo etufutak Sitan taji no hoi hototeleroiye to Oyiri lo Olibo hijo anyar ebusak iye inak hinyaŋita ino fau? ⁴ Nafa holobe inyi etinyaŋari, obe ifa inya ara nohoi? Ta halu ho hetinyaŋari no honye, obe ifa isia owuon to hoi? Nyo ifa hidonyi egigilo iye hiram nia ta taji nohoi? "Ebe iye eteler to tuŋani, ati to Hollum." ⁵ To hetiru nohonye hirorita huna, ahuye Anania afau ata hiyyehita nohonye hicuŋ. Ata baŋi no obolo awoŋ to hiyo ilafa etiru daŋ. ⁶ Ata nyarhalu afanu ahosiere ata hihaf inya ahide, ojo ata akafari inya ade ata anuhak inya. ⁷ Ta halu he inak sahien hunik, ata oŋorwuo honye ajiŋu ahotwai, obe inya oyen nyo nia oru. ⁸ Ata Peturu hijo to honye, "Ilimak ta nanaŋ kuya etinyaŋak itai fau ta arobiyaha ariaii. "Ata inya hijo "Ee, ta arobiyaha ariaii." ⁹ Ata Peturu hijo to honye, "Nyo hidonyie daŋ eruk itai hijo anyar eciem itai Oyiri na Habu? Towolo, hejek ino hiyo te ikat ilara ofu anuhak oliawa hoi, ojo hidofe iso isia akafariiye ade." ¹⁰ Ata inya kwak ahuyek to hejek inohonye, ata hiyek hiyyehi hicuŋi, ata nyarhalu ilia afanu ahotwai haji afanu arumu inya oye; ata isia ahafari inya ade ata efi anuhak inya iko oliawa honye. ¹¹ Awoŋ baŋi netok awoŋ ahiji he kelesia, ojo ahiji ho hiyo ilafa etiru hiro inia daŋ. ¹² Owuon ifa hutuhututa iko hililihita ariaii to hiji ho hiyo ta has ino efahat. Owuon ifa isia to bore no Solomone. ¹³ Ati obe ifa lobo owuon iko dihan no ojiŋahini to hosie; ati owuon ifa hiyo ho baŋi netok. ¹⁴ Ati arasa ifa heruhok ariaii afonihini ta Habu, obolo ifa iluluŋ no liawa iko ŋorwo, ¹⁵ anyar akafari isia haŋwak ahikoi ata etiferik isia te ijotiti, iko hitolojita anyar lawoŋ Peturu hoto tir ohidis nohonye isia. ¹⁶ Ojo hidofe iluluŋ no hiyo ata atubahini to bore na gala no Yerusalem, eyani ilooŋwai iko iloowuon ho Oyiri ne ebwot, ojo isia ata libe daŋ. ¹⁷ Ati odiote fadiri lettok ahide, iko ilafa owuon iko inya daŋ (nafa arra iluluŋ no hiyo iloorrisa hebuhu no Yesu); ojo ifa hidofe isia owuon iko haini, ¹⁸ ata isia atirok has te efahat, ata efitak isia ta babus. ¹⁹ Ati ta tari to nya ata anjilo la Habu hiŋa ikatin ino babus ata edihini isia abali ata, hijo ²⁰ "Ifeti, ahaji imojit ejo itai elimak to hiyo daŋ hiram no wuaran." ²¹ Ifa etiru isia, ata isia ajiŋak omojori to motie ata hitiyana. Ata etok lo fadirihien awoŋ iko ilafa owuon iko inya, ata hililoŋ hesiŋak bi daŋ, maruak ilo etaaha ilo Isarail daŋ, ata efahak hijo anyar eyani efahat ta babus. ²² Ata hegiamak ilafa ofu ababus enyie holorumu isia to hotwai babus, ²³ "Erumu iyohoi ikat na babus esiono ojo heririak oweta te hikat, ati nafa eŋa iyohoi, obe iyohoi erumu lobo tuŋani to hotwai." ²⁴ Iyania nafa etiru ettok lo heririak lo omojori iko habu hetimojok etiru hirorita inia, ata higilita ino hosie litai to hiro hosie hijo nyo mahu iso Otu tara honye. ²⁵ Niya awoŋ lobo tuŋani elimak isia hijo, "Hiyo ilafa efitak itai ta babus liya oweta ta haji imojit ojo etiyana hiyo." ²⁶ Ata ettok lo hegiamak eno iko hegiamak, ata enyahini isia, ati obe ifa etiŋalafa isia, nyo abaŋ ifa isia hijo hotobiaŋa hiyo erwoŋo isia. ²⁷ Nafa eyani isi isia, ata etihunyik isia to hosiere ho hekumok. Efi fadiri letok isia, ²⁸ hijo, "Dede ekum iyohooi itai hijo hotobiaŋa itai enyak hitiyana to fure nia, ati ehum itai etufutak hitiyana nahatai to Yerusalem, ejo itai ewak eyani hoto no tuŋani lia te iyohoi." ²⁹ Ati etiraŋ Peturu iko efahat, "Anyar ebaŋ iyohoi Hollum tara tuŋani. ³⁰ Hollum lo monyie hohoi etidiet Yesu ahide, lafa ettohe itai, to hayihahini nahatai inia to yani. ³¹ Ehumak Hollum inya to hani inyat anyar ara ahito la Habu iko a Hetilahani, anyar ebusak hiyo ile Isarail hiyata inohosie ojo ohohini. ³² Era iyohoi sutin ino hiro inia, ojo to Oyiri lo Olibo, nafa esio Hollum te ilafa abaŋ inya." ³³ Ifa etiru iluluŋ no hekumok ania, ejoria ifa isia ojo hidofe awak attohe efahat. ³⁴ Ata hetiyanani lo hifahita lo Farisei lara fure Gamaliel, lafa abaŋ hiyo bi daŋ, diote ahide ata elimak he eyari efahat abali kai. ³⁵ Niya ata inya hijo to hosie, "Hiyo ile Isarail, itire ta nanaŋ to hiro ino ewak itai higiem to hiyo hulo. ³⁶ Ifa beren, Odioto Taudesio ahide hijo inya lobo tuŋani, ojo iluluŋ no hiyo, iya hisihe aŋwan attubahini iko inya. Ottohe ifa isia inya, ojo ilafa eruk to honye ata esarrik ata pwahan ania. ³⁷ Ta halu ho tuŋani lia, ata Judas lo Galilea diote ahide to holoŋitek ino ehianari iluluŋ no hiyo ata eyari ilak hiyo iko inya. Ojo hidofe inya ata ye ojo ilafa eruk to honye daŋ ata essarrik. ³⁸ Iyania ajo naya te hatai, ibusak hiyo ilia ade ejo itai ebusak isia hamai, hijo lara higigilo nohosie iko igem nohosie no hiyo, owuye iso. ³⁹ Ati lara no Hollum, ebe iso itai eremik etuhuye isia; Eremik itai arumu hijo errem itai iko Hollum." Ati eruk ifa isia. ⁴⁰ Niya, ata isia hililoŋ efahat ahiji ata hibak isia ata elimak isia hotobiaŋa inyak hiro to fure no Yesu ata ebusak isia hefi. ⁴¹ Ata isia ebusari hekumok iloomuno hijo osiru to hosie hetabanari to Fure nia. ⁴² Dia tahalu ho holoŋitek daŋ, ta haji imojit, man ta haji odule ifa isia hitiyana, ero to fure no Yesu hijo inya Kristo.