¹ Ajiŋak Festo ta ŋati nobo ojo ta halu ho holoŋitek hunik, eno inya Kasariai man aYerusalam. ² Ata lettok lo fadirihien iko etaha iloJudei eyani irositi ino Paulo to Festo, atati isia hifi inya. ³ hijo anyar emak Paulo to yeyero anyar Eliloŋu Festo Paulo a Yerusalem hijo anyar efu isia attohe inya to hikoi. ⁴ Ati etiraŋ Festo to hose hijo efita Paulo to Kesari, ojo inya to wan honye iso owu aciahari kokwak ade. ⁵ Iyani, lo oremik ilak, "ejo inya iso efie iko hoi adia. Owoun ilakhipalita to tuŋani ile, eremik iso hido tai arosok inya." ⁶ Ta halu ho holoŋitek hotowunik iko tomon ino letolojori inya, eno inya a Kesariai. To holoŋ hitarihi, Ettole inya to hitoloji no okiko ata elimak heyani hiyo Paulo to honye. ⁷ Nafa eba inya, Oweta hiyo iloJudei ilafa afanu to Yerusalem ata eyani hirositi ino oru bino obe nobo sihin no letuhutak. ⁸ Ifa ero Paulo to wan nohonye ata hijo, "Obe naya egiem nobo hipali no oru to hifahita kuya hidofe to Judei, iko ta haji imojit kuya ojo to Kesari." ⁹ Ati awak ifa Festo hijo anyar omuno Judei inya. Ata inya hitiraŋ to Paul ata hijo, "Ewakiye eno a Yerusalem anyar ahu naya hikumiye to hiro inia?" ¹⁰ Ata Paulo hijo, "Aweta naya to lokiko no letolojori Kesari hekumori naya. Abe naya epal inak hiro to Judei iya eyen hido itai daŋ nalanyar. ¹¹ Ara ida hido hijo egiem naya hipali kuya egiem naya no osiru ye, abe naya ebo ye. Ati lara irositi inohosie asai obe iso lobo tuŋani esio naya to hose. Eliloŋo naya weta to Kesari." ¹² Ifa attowu Festo hiro iko etaha, ata inya hitiraŋ, "Ewakiye weta to hosiere ho Kesaari. Ewu isoiye to Kesari!'' ¹³ Nia ta halu ho holoŋitek inak, ata Habu Agripa iko Bernice hiba to Kesari ata isia efie hiwolo Festo. ¹⁴ Ta halu ho hitole nohonye dia holoŋitek ariaii elimak Festo hiram no Paulo ta Habu. Ejo inya, "Owuon ifa lobo tuŋani lafa ebusari Felis ini le efita. ¹⁵ Nafa awuanari naya to Yerusalem, eyani ettok lo fadirihien iko maruak iloJudei hipalita ino tuŋani lia ta nanaŋ. Ata isia wahan hipali hatara nohonye. ¹⁶ To nia etiraŋ naya to hosie. Ata isia hifia hijo anyar oŋotok to honye ye. Ata naya hitiraŋ to hosie hijo, obe imohit no hiyo iloRoma awak hijo anyar oŋotohini ye to tuŋani holobe inya aruaŋahini iko harosok ilohonye anyar hidofe egieru tuŋani inohonye. ¹⁷ Nya, nafa afanu isia anobotie eni, abe ifa naya etila. Ata naya ifa motie nohonye hitole to okiko ajitari naya hiram heyani tuŋani lia enni. ¹⁸ Nafa odiote hetipalak ahide ata elimak hipalita ino honye, egigilo naya hijo hitipalita ino eyani isia ara ino lofiak. ¹⁹ Ati owuon ifa isia ho hiram no himojiti hose ojo hirram no lobo Yesu lafa oye, lia lelima Paulo hijo owuar. ²⁰ Ogol ifa ta hanaŋ hefiari hiro inia, ata naya hifi inya hijo horemik inya eno a Yerusalem anyar honye hiram no hiro huna efu hiŋot Teya. ²¹ Ati nafa eliloŋini Paulo hijo odule hiyo hiriria anyar ettok oŋot hiram no honye, elimak naya heririe inya man efahahimi naya to Kesari." ²² Ero Agripa to Festo, "Awak naya daŋ hitira to tuŋani lia." "Motie, ejo Festo, etira isoiye to honye." ²³ Nia ifa motie no honye, Afanu Agripa iko Bernice amununi; afanu isia iko oseŋer ojo etaha ilobore gala. Nafa elimak Festo, ero ifa Paulo to hosie. ²⁴ Ejo Festo,, "Habu Agripa, ika itai hiyo hulo ewuon ini iko hoi, egonyu ifai, tuŋani ile; naya iko iluluŋ no Judei daŋ efi iyohoi teni daŋ a Yerusalem, ewiwuŋita isia hijo hotobiaŋa tuŋani ile owar. ²⁵ Ati arumu naya hijo obe nobo hiram no owoun hatohori tuŋani ile; Ati nyo Eliloŋo Lettok inya to honye awak naya efahak inya. ²⁶ Ati abe naya awuon iko inak hiro no lobis hegiorohini te etok. Hiram nia, eyani naya inya ta hatai, agalik no to hoi Habu Agrippa, hijo anyar honye naya awuon iko inak hiro ino legiorok naya to hiro inia. ²⁷ Obe iso osiru ta nanaŋ hefahahini-hefitani obe ehum hiyen hipalita inohonye.