¹ Nafa holowuon Apolo to Korinto, owu ifa Paulo a doŋe nya to hide Otuni hiba te Efisa. Ata arumu ilak hejufutak dia. ² Ejo Paulo to hose, "Omoju ifa itai Loyiri lo Olibo nafa eruk itai?" Ejo isia to honye, "Obe, obe iyohoi etiru hiram no Oyiri lo Olibo." ³ Ejo Paulo, "To nyo ifa ati Lomoju itai batisimo?" Eijo isia, "To hitifwoto no Yoani." ⁴ Nia etiraŋari Paulo, "Etifwoto Yoani hebusahini no hiyata. Elimak inya hiyo hijo anyar leruk to lia lOtu ta halu honye, inya ŋai, Yesu." ⁵ Nafa etiru hiyo nia, ata isia omoju batisimo to fure na Habu Yesu. ⁶ Ati nafa atirok Paulo hani nohonye to hosie. Ata Oyiri lo Olibo awoŋ to hosie ata isia hiro to ŋadiefa ino lolufa ekilari. ⁷ Ara ifa isia daŋ tomon harik. ⁸ Eno ifa Paulo ahaji a sinagog herarari bino man hafajin hunik. Ara ifa inya hetidihoni lo hiyo hijo etiyana hiyo hiro ino obie no Hollum. ⁹ Ati nafa etigolo ojo ebo, Etiara isia hiro hipalita to hikoi no Kristo to hosiere eluluŋ. Ebusari Paulo isia. Ata eyari hejufutak ade tara hose. Etiara inya hiro to hosie holoŋitek daŋ to hotwai ahaji hitiyeni to Tirano. ¹⁰ Odule ifa man ŋasi arik. Hijo anyar letiru hiyo ilo amanya ta Asia etiru hiram na habu lo Judei ojo Girik. ¹¹ Egiama ifa Hollum higiemita ino honye ta hani no Paul. ¹² anyar olibo haŋwak. Nafa adumu isia hipotit no homom ojo boŋojin to wan na Paulo. Olibe ifa isia ata oyirihien ino ebwot hefie ade tara hosie. ¹³ Ati Owuon ifa ilak heyorok ilo Judei ilo afanu isia eyari fure no Yesu hegiamari hiro inohose. Eliotok isia to liya owuon iko miniaŋa. Ojo isia, "Elimak naya iye to fure no Yesu lia etiyanari Paul hijo ino ade." ¹⁴ Ilafa egiem ina isia ifa onyirok ha fadiri lo Judei hulo hatarik, Skefa. ¹⁵ Etiraŋ miniaŋati isia, "Yesu nayen naya ojo Paulo nayen naŋ. Ojo itai habaŋai?" ¹⁶ Ata miniaŋati nia tara tuŋani lia esurok to hefuhitani ho miniaŋa ata agalik isia ata lumo isia man erwatu ahaji nya aŋature iko horoŋon ¹⁷ Afanu hiyo ilo Judei ojo Girik hiyen. ilo amanya te Efisa. Afanu ifa isia baŋi bi no, man ohwori fure no Habu Yesu. ¹⁸ Hidofe ata heruhok ariaii afanu hisio man eruhok iruti ariai to hiro inafa egiem isia. ¹⁹ Eyani hiyo buhi ino egiorori isia hiro ino bwanya ahosiere ho hiyo daŋ ata asuahak to hosiere ho hiyo. Nafa ehen isia hinyaŋita hose oremik luŋa alif miet ino yiel. ²⁰ Nia esarik hiram no Hollum amisihi ariai to hikoi nefiriwa. ²¹ Nia ta halu ho esahak no Paulo igem te Efisa, ata inya eno to oyiri a Masedonia ojo Aciaya to hikoi no Yerusalem; Ejio inya "Ta halu no hiba nanaŋ dia. Awak naya daŋ egonyu Roma." ²² Efahak Paulo hejufutak ilo honye lohorik, Timoteo iko Erasto a Masedonia, ilafa oluak inya. Ata inya hitole ta Asia kai. ²³ Teya odiote ifa hiram netok to hiram no hikoi nolowu Efisa. ²⁴ Owuon ifa lobo hedoŋoni lara fure Dimitrio, lafa ehuhumu rijori to yiel no Diana, eyani poco nettok to hegigiamak. ²⁵ Nia Eliloŋu inya hegiamak ilomai nya amai nobotie, ata hijo, "Huloŋ eyen itai egiem nia erumu iyohoi arobiyaha ariai." ²⁶ Egonyu itai ojo etiru hijo. Obe ara to Efisa hamai ati man to Asia daŋ. Paulo ile etito ojo hidofe enyahu hiyo ariaii. Ojo inya hijo obe inamuk johin ino oyeuni ta has. ²⁷ Obe ara saŋ ino oru ta hapociok hamai ebusak. Ati ojo haji imojit no johin no Diana owu iso ebusahini. Hidofe owu hilohitok no honye alitek. Inya nia omojo Asia iko hiyo ta fau daŋ.'' ²⁸ Nafa etiru isia ania, efut ifa isia ho jore, ata yio, hijo, "obolo inya Diana ne Efisa." ²⁹ Efut ifa bore na gala daŋ ho jore. Ata hiyo arruhari anobotie afwara. Eniafari ifa isia hiyo ilo olot iko Paulo haba Gayio iko Aristarko ilafa afanu ta Masedonia. ³⁰ Awak Paulo ajiŋak to hiji he iluluŋ no hiyo. Ati etik ifa hejufutak inya. ³¹ Ojo hidofe hegiamak ilak ilafa ara motiarak ilo Paulo efahu hiro to honye hijo hotobiaŋa ojiŋak to fwara. ³² Eloŋojita ifa hiyo ilak obe oyen hijo heyorita hiyo nyo ojo ilak ilo hose, Nyo efufunia ifa hiyo. Obe ifa iluluŋ no hosie oyen hijo nyo mawu otuba isia nobotie. ³³ Eyani Judei Alesander a hiji he iluluŋ, etiwetik inya to hosiere ho hiyo. Ehaf Alesander hani nohonye to hose hotodwai hiyo hijo hetirai to honye. ³⁴ Ati nafa aheru isia hijo ara ifa inya lo Judei. Oyio isia daŋ nobotie man saat arik "obo inya Diana ne Efisa." ³⁵ Nafa etidwek hegiorok iluluŋ nya, ata inya hijo, "Itai hiyo ile Efisa, ŋai tuŋani lia obe oyen hijo ara bore na gala ne Efisa hitubit no Diana netok, iko arijori no odou te ido? ³⁶ Legonyu ati itai hijo ara hiro huna dede, anyar edwa itai ojo itai ebe eruk inak hiro. ³⁷ Eyani itai tuŋani lia ini alokiko lia ara kuya lohoho la haji imojit ojo hidofe ara hamoroni lo jiok lohoi. ³⁸ To mai nia awoŋ Dimitrio iko hayyak ho rijorihien ilo owuon iko inya hebalahari lobo tuŋani, owuon lokiko dia iko hekumok, ibusak isia hotoros wati inohosie. ³⁹ Ojo letufa itai ilak hiro ino olufa. Ehuhumahini iso to hadufa no etubari to holoŋi. ⁴⁰ Dede ewuon iyohoi to run no orosok iyohoi hiyo ta far nafa ejoriari hiyo. Obe nobo libe to hifufunia ina, ejo iyohoi ebe eremik hatifu. Nafa ejo inya ania, ata inya efuhak iluluŋ.