¹ Nafa otuho hidefer, etisarrik Paulo efahat ata hitigolo isia. Ata inya hijo to hosie itolojo na lanyar ata inya eno a Masedonia. ² Nafa eno inya to iko misihi niya ata inya hiro hirorita ariaii eigolori isia, ata inya eno a Grik. ³ Nafa esok inya yafajin hunik Teya, oros hiyo iloYudea inya hijo ejo inya awu a Siria, ata inya acahari teko Masedonia. ⁴ Henyamitak ilo honye ifa man Asia ara Sopato lo Berea, onyi Pyrrhus; Aristoko iko Sekundo, ara isia daŋ heruhok ile Tesalonika; Gayos lo Derbe; Timeteo; ojo Tikiku iko Trofimo ile Asia. ⁵ Ofwo hiyo ilia to hosiere hohoi ata hitila iyohoi to Trosa. ⁶ Efi iyohoi ifa ta babur a Filipi ta halu ho bwanya ne imune ina obe bula, ati ta halu ho holoŋitek miet ata iyohoi hiba dia hosie to Trosa. Ata iyohoi hitole to holoŋitek hatarik. ⁷ To hitieri no holoŋ ne isabit, nafa atubahini iyohoi nobotie hijio anyar ebuny imune, ero Paulo to heruhok. Ewak ifa inya eno ifa motie ati ata inya adule hiro man ifa harie tinŋ. ⁸ Owuon ifa lomot ariaii ta haji no hide nafa etubari iyohoi ara nobotie. ⁹ Etole ifa lobo lanyar halu hito letiŋ te ituli na haji ile ara fure Eutiko, ata inya ajiotori. Iya nafa erarari Paulo man fuur, ojo hito lanyar halu arasa jiote, to hiyebi hitahunihi ahuyu afau ata hiyo ahafu inya ile oye. ¹⁰ Ati ata Paulo eno, afau ata hirafa aŋati honye, ata atirok has inohonye ata mojo to honye. Ata inya hijio, ''Ibaŋa inyak higigilo no, nyo owuar inya.'' ¹¹ Ata Paulo hinyak acahari ahide ata hibuny imune ata hinya. Ta halu ho hiro nohonye no man ifa motie beren, eno inya. ¹² Enyahari isia oŋeye lia lo owuar ojo tajia inohosie ata hilik bino ¹³ Efi iyohoi to hosiere ha Paulo ta babur man ta Assos, mai ne ewuahari iyohoi eyari Paulo daŋ ta babur. Hisin nafa nya awak inya higiem to wan nohonye eno ta fau. ¹⁴ Nafa eboŋ isia iko hoi ta Assos, ata iyohoi ahafak inya ta babur ata iyohoi efie a Metilene. ¹⁵ Ata iyohoi efie Teya ata iyohoi hiba ifa motie aŋati ho Cios. Ifa motie to doŋe no Samos, ojo ta halu hafar nafa nya ata iyohoi hiba to bore gala no Mileto. ¹⁶ Nyo awak ifa Paulo agalari Efisa, hijio anyar obe inya etole ta Asia fuur; awak ifa inya aruhari a Yerusalem to holoŋ no Pentekoste, lo oremik inya higiem iso. ¹⁷ To Mileto efahak inya liawa ilak man efisa heliloŋo henyamitak ile Kelesia. ¹⁸ Nafa afanu isia to honye, ata inya hijo to hosie, ''Itai eyen to wati ilahatai, man to hitieri no holoŋ nafa ariehini naya hejek inanaŋ ta Asia, esok Naya saat jai daŋ ikahatai. ¹⁹ Adulei naya higiama ta Habu lohoi to dicio no hoo nanaŋ ojo to hidenya, iko ho hitigiemita ino ofu hidoŋ ta nanaŋ to hiram ne awak Yudea attohori naya. ²⁰ Eyyen itai nyo abe naya etik hiro bidaŋ hunna olibo ta hatai, ojo hidofe hetiyen naya itai jai to hiji to hiyo ajo naya awu ta haji ahaji. ²¹ Elimak to daŋ to Jews iko girik angar eruk isia Hollum ojo owuon iko huruk tahabu Yesu Kristo. ²² Iyania itiwolo, awu naya a Yerusalem, nyo oyiri awak naya dia, ati abe naya ayen hiro ino ofuo hidoŋ ta nanaŋ dia, ²³ ati odule Oyiri lo Olibo hilima ta hanaŋ ta masik huna eba naya dia hijo etila naya aririk iko hitigiemita dia. ²⁴ Ati abe naya egigilo to wan nanaŋ ahosiere, la aremik naya esahak nyieta ajo esahak igiem nafa omoju naya tara Habu Yesu, helimahini sayye ino hamehini no Hollum. ²⁵ Itiwolo, nayen naya hijo itai ifa ilia ero naya hiram no obie, ebe iso itai enyak egonyu homom nanaŋ. ²⁶ Ati elimak naya ta hatai toholonŋ ina, hijo abe naya nayen nobo hoto no lobo tuŋani. ²⁷ Abe ifa naya eyumo hiro ta hatai hiram no Hollum daŋ ta mai. ²⁸ Ati iyania, ihuma riŋa wati inahatai na anyar, iko kioro daŋ ino esio Loyiri lo Olibo hijo anyar era itai etaha to hosie. Ihuma hirribita kelesia no Habu, nafa enyaŋu inya to hoto nohonye. ²⁹ Nayen naya hijo ta halu ho heno nanaŋ, afanu iso ewuoho ahiji hatai obe iso ebusak kioro. ³⁰ Nayen hidofe naya daŋ to hiji hatai afanu iso ilak hiyo hitihar hiro huna obis anyar ofu hejufutak ta halu hosie. ³¹ Iyania, ihuma riŋa na anyar. Itiyyen hijo abe ifa naya etiwet hitiyana lobo tara hatai to hidenya ta tari iko ta far ta ŋasi inafa hunik niya. ³² Ati iyania esio naya itai to hosiere ho Hollum iko to hiram no hamehini nohonye, no oremik hitidiet itai ojo esio ta hatai iruta to hiji ho hiyo bidaŋ ilafa etilohini. ³³ Abe ifa naya adaya yiel no lobo tuŋani, dahab iko boŋoo. ³⁴ Eyyen ifa itai hijo egiemu has inanaŋ hiro ina awak naya iko iwahiti ilo lia owuon ikanaŋ. ³⁵ To hiro bidaŋ esio nya itai hutuhuti anyar eremik itai aluahari hiyo hunno etaban te iggiem, ejo eremik agiilu rori ino Habu Yesuu, hori inafa ero inya ta wan nohonye hijo: "Obore ijohiti to tuŋani le esio agalik tuŋani lo omoju.'' ³⁶ Ta halu no hiro nohonye tohikoi nia, origoŋo inya ta afau ata mojo daŋ iko isia. ³⁷ Obolo ifa yio bi no to hosie ata isia atirok wati inohosie to honye, ata isia hujur Paulo bino. ³⁸ Ejiriŋa ifa isia to hiro inafa ero inya, to hijo nohonye to hosie hijo, obe iso isia enyak egonyu homom nohonye. Ata isia daŋ enyamari inya ahotwe babu.