¹ Ta halu ho hiro huna, ata Paulo ediahari Athen ata eno a Korinto. ² Dia ata inya eboŋohini iko lobo lo Judei la ara fure nohonye Akwila, to doŋe no Pontu, lafa hetek awoŋ to Itali iko oŋoruo honye Prisila, nyo elimak ifa Klaudio hijo isiara hiyo ino Judei hebusak Roma. Ata Paul eno to hosie, ³ ati to higiama nohonye te igem nobotie, ata inya eno hitole iko isia ata higiama daŋ iko isia musiamat. ⁴ Etirisa ifa Paulo to sinagog ta far na Sabato iko Judei. ⁵ Ata inya esoŋu hiyo ilo Judei iko Grik daŋ. Ifa afanu Sila iko Timoteo to Masedonia, ata Paulo wahan hitiyana to Judei hijo ara Yesu Kristo. ⁶ Ifa emor Judei inya, ata Paulo hililik boŋo nohonye to hosie ata hijo to isia, "Isiara hoto nahatai hotowuana to hosi hatai; Alama naya tara hatai. Man ena ahosiere, awu iso naya hiro to hiyo ilo Jentails.'' ⁷ Ata inya eno teya ahaji no Tito Justo, tuŋani lafa etihabwo Hollum. Owuon ifa haji nohonye aŋati ho sinagog. ⁸ Ata Krispo etok lo sinagog, huruk ta Habu, iko hiyo daŋ ilafa owuuon ta haji honye; ata hiyo ariaii ino Korinto ilafa etiru sayye ino olibo huruk ojo omoju batisimo. ⁹ Ata Habu hijo to Paulo to ofirie nohonye ta tari nya, "Baŋa abaŋ, ati irara ojo hotobiaŋa iye edua. ¹⁰ Awuon naya iko hoi, obe lobo tuŋani oremik eriafu iye, awoun naya iko hiyo to doŋe ina ariaii.'' ¹¹ Amanya ifa Paulo dia hiŋa nobotie iko yafajin ile, le etiyana hiram no Hollum to hiji hosie. ¹² Ifa era Gallio amamur na Aciaya, ata Judei ta mai daŋ diote no oru to Paulo ata eyani inya ahosiere ta haŋotok; ¹³ ata isia hijo, "Enyaba halaŋ ile hiyo hijo anyar etihabwo hiyo Hollum, olufa tara hifahi nohoi.'' ¹⁴ Ifa ewak Paulo hiro, ata Gallio hijo to Judei, "Itai Judei, la ara hiram no hipali iko hatohe, no ero ida naya iko itai. ¹⁵ Ati to hira nohosie hiro ino hifiita iko fureta ino hifahi nahatai, irara itai ta wati te inahatai. Abe naya awak hira haŋotoni lo hiro inia.'' ¹⁶ Ata Gallio hisio isia hebusari hara no iŋotit. ¹⁷ Ata isia daŋ eniefu Sostenes, hekumoni lo sinagog ata hilum inya to hosiere hahaŋotok. Ati obe ifa Gallio etira to hiro ino egiama isia. ¹⁸ To hitole na Paulo dia holoŋitek ariaii ta halu, ata inya ebusari ilasira ata eno to fuluga a Siria iko Prisila ojo Akwila. Holobe inya ebusari otifor na hari netok no Cencria, ata inya agitu hofir inohonye ade, nyo elama ifa inya beren ania. ¹⁹ Ifa afanu isia Efisa, ata Paulo ebusari Prisila iko Akwila dia, ati eno inya ta wan nohonye a sinagog ata hitirisa iko Judei. ²⁰ Ifa efia isia Paulo hettolojo iko isia kai ahosiere, ata inya hibo. ²¹ Ati to heno nohonye tara hosie, ata inya hijo, "Aciohini iso naya ta hatai la ara wahan no Hollum.'' Ata inya eno ade te Efisa. ²² Ifa esurok Paulo to Kesariai, ata inya eno efonyari kelesia nya to Jerusalem ata eno aŋolon ta Antioka. ²³ Ifa esok inya holoŋitek inak teya, ata Paulo ebusari ata eno to oko misihi ino Galatia iko. Firigia le ettigolo hejufutak daŋ. ²⁴ Ata lobo lo Judei, fure nohonye Apolo, ta Alesandria awoŋ Efisa. Oyen ifa inya hiro bino iko hiro ino egioro to Buk no Hollum. ²⁵ Eyiyenu ifa inya hitiyenita ino Habu. Ojo efut to oyiri, ata inya hiro ojo ero no obis to hiro ino Yesu, ati oyen ifa inya batisimo no Yoani hamai. ²⁶ Ero ifa Apolo to golon to sinagog. Ifa etiru Prisila iko Akwila inya etiyana, ata isia eyari inya oger ata hihum elimak to honye no obis hiram no Hollum. ²⁷ Nafa ewak inya hilaŋ to oko Aciaya, ata halasira ilo owuon to huruk egiorok waraga to hisiŋa hijo anyar omoju heruhok ilo Aciaya inya to bolioŋ. Ifa eba inya, ata inya dede huluak heruhok to hamaihini no Hollum. ²⁸ Omir ifa Apolo hiyo ilo Judei to hosiere he iluluŋ to hitirisa, etuhuta to buk no Hollum hijo ara Yesu Kristo.