¹ Nafa efie isia teya to bore gala ho Ampipolis, ojo Apollonia ata isia afanu abore gala ho Tesolonika, teya owuon ifa nobo mai no Yudei no oŋotori hiro. ² Paulo iya nafa owuanari imanyiti inohosie, eno to hosie to holoŋitek hunik ino Sabato etirisari iko isia daŋ to buk no Hollum. ³ Aŋa ifa inya buk no Hollum ata elimak hijo ara de de to Kristo anyar etigiama, anyar ebuhu inyak tara hayok. "Ata inya hijo, Yesu lia etiyana naya ta hatai, inya ara Kristo.'' ⁴ Eruk ifa ilak Yudei ata ejufari Paulo iko Sila, iko iluluŋ nobo nettok no Grik, obe ifa ara inak ŋoruo ino edihita isia. ⁵ Ati ojo Yudei ilo obe eruk, ata hayini man ofuo adumu ilak monyiemiji to suk ilo oru, ata atubak isia amai nobotie, ata esusutak hiyo hotodiote no oru. Ata isia efi eburahini haŋ no Jasone, nyo awak ifa isia eyani Paulo iko Sila ade to hiyo. ⁶ Ifa enye isia horumu isia dia, ata isia epihini Jasone ade iko ilasira honye ilafa owuon ta haji honye ahosie iko etaha ilo bore gala nya, ilo oyio hijo, "Afanu hiyo huloŋ ile eloit fau aŋolon te iyohoi. ⁷ Hiyo hulo ile omoju Jasone, obe egiamari hifahita ino Kesari; ojo isia hijo owuon lobo habu hamai lo obe ara Kesari, inya Yesu.'' ⁸ Ifa etiru iluluŋ no hegiamak no bore gala hiro ino ejoria ifa isia. ⁹ Ta halu, ata etaha hisio Jasone he ilak hotodumak arobiyaha to heririak, ata isia ebusak isia efie. ¹⁰ Ifa tatari nya afanu halasira ho Paulo ojo Sila aBerea. Ifa eba isia dia efie isia amai no oŋotori no Yudei rori. ¹¹ Ati ara ifa hiyo hulo ho Berea hiyo hulo obis hosi, omoju ifa isia hiram nya ojo hosi inohosie aŋa, ojo ehiana hiram no Hollum holoŋitek daŋ kuya la ara hiro niya dede. ¹² Ata ilohosie ariaii huruk, iko ilak etaha ilo Grik, liawa iko ŋoruo. ¹³ Ifa eyen Yudei liya to Tesalonika hijo etiyana ifa Paulo hiram no Hollum to Birea, ata isia efie adia etidiotori iluluŋ no hiyo hetiŋalafa. ¹⁴ Teya kokwak ata halasira iko Paulo efahak Paulo heno ahari nettok ata Sila ho Timeteo wuana dia. ¹⁵ Ata hiyo ilafa edihori Paulo, eyari inya alamarai ade to bore gala na Athens. Ifa ebusari isia Paulo dia, ata isia omoju tara honye hituhutita ino Sila iko Timoteo hafanu to honye kokwak. ¹⁶ Iya nafa heletilari Paulo isia ta Athene ata oyiri nohonye ahieru iruti inafa owuon dia ata inya egonyu hijo efut hada bore na gala iko rijorihien. ¹⁷ Ata inya hiro to hotwai ho sinagog nohosie iko Yudei iko ilak ile etihabwo Hollum, iko ta masik inia etinyaŋari hiyo hiro iko hiyo ilo owuon dia. ¹⁸ Ata ilak ilo ojo hiyo Epikuria iko Stoika herarak hiboŋ he inya. Ata ilak hijo, "Nyo nia awak ogogoŋo lia hiro?" Ata ilak hijo, "Ara inya iya lobo tuŋani lawak hijo anyar ejufuta hiyo ilak johin," nyo etiyana inya to fure no Yesu iko hebuhu. ¹⁹ Eyani isia Paulo ta Arepago, ata hijo to honye, "Ewak iyohoi hiyen hitiyana ŋejuk nia etiyana iye? ²⁰ Eyani iye inak hiro ino olufa to yohe hohoi. Iyania, ewak iyohoi hiyen hojo isia nyo." ²¹ (Omuno ifa hiyo ina amanya to Athene hititira to hiro ina ara ŋejuho.) ²² Ata Paulo diote to hiji ha Arepago ata hijo, "Itai hiyo ila Athene, awolo naya hijo ara hada itai hiyo hulo owuon iko huruk te ikota ariaii. ²³ Iya lahu naya to hikoi, egonyu naya hiro ino etihabwo itai, man arumu naya nobo sihin no egioro dia hijo, "To Hollum lo obe oliew.'' Ile etihabwo itai ejio itai ebe eyen, ati awak naya elimak ta hatai. ²⁴ Hollumlo oyeu fau iko hiro huno owuon ta fau, to hira to nohonye a Habu le ido iko fau, obe amanya ta hajik ino oyeuni ta has. ²⁵ Obe inya oremik egiemuni ta has ino tuŋani iya awak inya inak hiro, inya lia to to nohonye esiara to hiyo wuaran iko hiyehita iko inamuk hiro daŋ. ²⁶ Tara tuŋani lobotie, ata inya ayeu hiyo bi daŋ ha amanyari to hide ha fau, ojo oyen masik ino ofu isia amanyari, ²⁷ anyar ofuo isia siaha Hollum, hijo bahati anyar eba isia to to honye ejio erumu inya. Ati obe inya alama tara iyohoi. ^{29 28} Te inya, ata iyohoi manya ejo elot ata arumu wuana nohoi ahiyo, iya ero lobo herarani lohoi hijo, 'Era iyohoi adure ilohonye.' 29Iyania, to hira nohoi adure ilohonye, hotobiaŋa ida iyohoi enyak higigilo hijo anyar ocialari ida inya iko dahab, kuya yiel iko moru, kuya rijorihien ino oyeuni to higigilita ino tuŋani. ³⁰ Nyo etifiak ifa Hollum holoŋitek ino tume, ati iyania elimak inya hijo hotoyite hiyo daŋ hiyata inohosie ade. ³¹ Anyimok inya far no owu inya aŋotori fau to bisan to tuŋani lo onyimu inya. Etibisak Hollum hiram no tuŋani ile tara hiyo bidaŋ to hetidietu nohonye inya ade tara hayok." ³² Ifa etiru hiyo ilo Athen hiram no hebuhu no hayok, ata ilak hitifitaŋ Paulo; ojo ilak ata hijo, "Ewak iyohoi etiru hiram nia tara hoi inyak.'' ³³ Ta halu, ata Paulo ediahari isia. ³⁴ Ata ilak hiyo ile eruk ejufari inya, iko lobo lafa le efurek isia hijo Dayonisio Arepagotani, iko nobo hito noŋorwo na ara fure nohonye Damaris daŋ he inak ŋoruo.