¹ Eyyen iyyohoi hijo lo owuana manya inna ta fau netihara, ewuon iso iyyohoi iko haji nobo tara Hollum, haji inna obe ara tuŋani oyyeu ta has innohoyie, ati ara haji inna amanya tulaŋ te ido. ² Nyo to titi inna eyamitari iyyohoi, esiahari heciofok ne imanyiti inno ido ³ nyo le eciofok iyyohoi isia ebe iso iyyohoi eremik wuana aŋatturre. ⁴ Nyo iyya ewuon iyyohoi to titi, ara iyyohoi hayamitak, ojo hidofe ho hitigiama- no obe ojo anyar owuon iyyohoi obe etihok boŋojin, ati ewak iyyohoi boŋojin, nyo te innamuk hunna odwa anyar eyari inno wuaran. ⁵ Lia ille eyyani iyyohoi to hiryo hunna iyya Hollum, lesio iyyohoi Oyiri no lia ille owu awoŋ. ⁶ Tonia odule iso wuana iko heyiyik; todule hiyyen hijo lewuon iyyohoi ta haŋ to wati innohoi, toyyen hijo elama iyyohoi ade tara Habu. ⁷ Nyo elot iyyohoi to huruk, obe ara to riŋai. ⁸ Tonia ewuon iyyohoi iko heyiyik; anyar ida leruk iyyohoi wuana alamarai to wati innohoi ojo to hotwai haŋ iko Habu. ⁹ Tonia emak iyyohoi nia ahikoi nohoi, ewuon ida hido iyyohoi ta haŋ kuyya ade, anyar emuno inyia. ¹⁰ Nyo efanu iso iyyohoi daŋ ahosiere ho Kristo holobe ŋoto, anyar mahati errumek iyyohoi hirro innamuk inia hunna eremik wan higem, kuyya ta nyaru kuya hidofe to run. ¹¹ Tonia, anyar eyyen ejio hidofe ebaŋ Habu, hejufak hiyyo. Inia aracie iyyohoi ahaliborok egonyu Hollum, aje hidofe nya etilaw iyya olibo te imanyiti innahatai. ¹² Obe iso iyyohoi inyiak hisio wati innohoi ta hatai hidas, ati esiara iyyohoi ta hatai hitimanyita anyar emuno kuya mahati eyita itai hitiraŋi no ilia hullo etidara to wati ati obe ara to hirro inno tajia innohosie. ¹³ Nyo lobe iyyohoi ewuon ho higigilo to wati innohoi, ara nia bi to Hollum; ojo le ewuon iyyohoi iko bisan no ho higigilo, ara nia bi ta hatai. ¹⁴ Nyo to mune no Kristo ne efuhak iyyohoi, tia eyyen iyyohoi nia hijo: ara inyia loye te iyyohoi bidaŋ, ojio hidofe tonia eye daŋ. ¹⁵ Ojio Kristo oye daŋ, nyo iyya to ilia hullo amanya anyar obe amanya to watie innohosie ati te inyia lia lafa oye atta ebuhu. ¹⁶ Nyo to ofioroho, man iyyania iko ahosiere ebe iyyohoi eŋot lobo te imanyiti inno owuanari tuŋani, owuon ida hido hijo erriŋa iyyohoi to Kristo iyya nia. Ati iyyania ebe iyyohoi eŋot lobo to nobo hikoi inyiak. ¹⁷ Tonia, lo owuon lobo to Kristo, ayyeuni inyia aŋejuk. Ellaŋ hirro innafa ho beren. Towolo, enyiak isia hira ŋejuho. ¹⁸ Ara hirro bidaŋ tara Hollum. Lafa etimorik iyyohoi to honyie to Kristo, atta hisio iyyohoi igem ne imor; ¹⁹ nafa owuon to Kristo Hollum anyar etimwarahini fau tp honyie, obe ehianak hiyyata innohosie to hosie ojo hidofe esio tohoi igem no sayye ne imor. ²⁰ Tonia ohutu ifa inyia iyyohoi anyar iyyohoi ewieta to fure no Kristo, inyia nia esiarari Hollum te iyyohoi hiram nohonyie te iyyohoi, efia iyyohoi to wati innohoi, nyo to hiram no Kristo: "Imwarai iko Hollum! " ²¹ Oyyeu inyia Kristo anyar ara ahisiori no hiyyata innohoi- lia ille obe oremik eyyau, nyo to Kristo anyar mahati era iyyohoi habisak to Hollum.