¹ Iyyania, ewuon iyyohoi iko igem inna, iyya nafa efwotuni iyyohoi amehini no Hollum, ebe iyyohoi ehalan ejio hidofe elafuho. ² Ati ebusak iyyohoi hirro hunna heiri ojio hunaŋ eŋofohini. Ebe iyyohoi enyiaba hiyyo, ebe hidofe iyyohoi eloit hiro no Hollum ateler. Ati etiyana iyyohoi to bisan to hosiere ho Hollum anyar etuhutek iyyohoi libe nohoi ta tajia ho hiyyo bidaŋ to hosiere ho Hollum. ³ Ati le eŋofohini sayye innohoi, eŋofohini to hullo oye wati. ⁴ To nyo etiŋodo jiok la fau inna higigilita inno hiyyo man obe isia eruk hijio anyar obe isia egonyu cialai inna ha sayye hunna olibo wati hunna ho lohuo no Kristo, ille ocialari wan ho Hollum. ⁵ Ebe iyyohoi etiyana hirro innohoi ati etiyana iyyohoi Yesu Kristo ille ara Habu, ejio iyyohoi era apiti ta hatai to hiram no Yesu. ⁶ Hollum ifa lia ojio, "Isiara cialai hoto cialai te idumele,"eticiala inyia tajia innohoi anyar esiarari cialai inna eyyanari iyyohoi kwatan no Hollum to hosiere ho Yesu Kristo. ⁷ Ati ewyon iyyohoi he ibariti inne efut to mocio no oyyeuni to modie, anyar oliew hijo ara golon no Hollum obe ara te iyyohoi. Ewuon iyyohoi ho hitigiemita ta ŋacio bi daŋ, ati obe isia etihita iyyohoi. ⁸ Ewuon hidofe iyyohoi iko hikuyya obolo heyyik te iyyohoi; ⁹ Etigiama isia iyyohoi ati obe Hollum obusak iyyohoi; Ollum isia iyyohoi ati ebe iyyohoi ethara. ¹⁰ Elocie iyyohoi ye no Yesu holoŋitek daŋ to wati innohoi, hijo anyar olieu hidofe wuaran no Yesu to wati innohoi. ¹¹ Iyyohoi hullo ewuar, ehafita iyyohoi ta wati innohoi ye no Yesu Kristo, anyar hidofe oliew manya no Yesu to wati innohoi. ¹² Ati egiama ye to wati innohoi ojio wuaran egiama ta wati innahatai. ¹³ Ati ewuon iyyohoi ho Oyiri no hiruk iyya nafa egiorohini hijio: ''Eruk nayya, atta nayya hiro.'' Eruk hidofe iyyohoi, ati ero iyyohoi. ¹⁴ Eyyen iyyohoi hijio lia lafa etubuhu Habu Yesu, etubuhu iso hidofe iyyohoi daŋ arik ho Yesu, atta iso inyia eyari iyyohoi daŋ hatai ahosiere honyi. ¹⁵ Ara hirro bi daŋ te itai, hijo iyya esarrik hamehini to hiyyo arria, anyar hidofe obolo hitahuo nohosie to Hollum. ¹⁶ Ati hotobiaŋa iyyohoi etidiek tajia. Emaruak ida hido iyyohoi ta bali, ati etiŋejuho inyia tajia innohoi holoŋitek daŋ. ¹⁷ Nyo oduhoco hitigiemita innohoi to holoŋ tena, ati egiama isia tohoi kwatan inna obolo agalik, ojio hidofe obe oremik hisid. ¹⁸ Nyo ebe iyyohoi egigilo to hirro hunna erriŋa iyyohoi ati egigilo iyyohoi to hirro hunna obe tuŋani egonyu. To nyo, hirro hunna egonyu tuŋani ofu esohini iso, ati hunna obe tuŋani egonyu ofu ŋadule iso man tulaŋ.