¹ Baŋa ero no orru to marwani, ati itigolo inyia iyya monye, ojo etigolo hiyyo ilo hitiŋi iyya halasirak, ² Itigolo maruak inno ŋoruo iyya hotonye, iko ŋoruo inno hitiŋi iyya hanasirak to hikoi no olibo. ³ Itibaŋa ihidahi, ihidahi hunna dede. ⁴ ati owuon ihidak ho durre kuyya hidofe durre inno onyi honye kuyya ŋani honye, anyar etihutek isia to baŋi ta haŋitek hosie ojo ho etidumak to monyie iko hotonyie, nyo etimuno inna Hollum. ⁵ Ati edehini ihidahi hunna dede daŋ hame ojo ehumak higiemita inno honyie to Hollum, odule inyia hitila to hosiere honyie te iluahiti ojo imojiti ta tari ojo ta far daŋ. ⁶ Ati, oye iso hiito no ŋoruo na manya te ibariti, iyya ida hido ho larasa inyia wuaran. ⁷ Ojo itiyanai hirro hunna anyar mahati obe isia ho hitipalita. ⁸ Ati enyie lobo tuŋani he esio to hilahaŋ nohonyie, no no to lia ara woyyo honyie, orisai inyia hiruk ojo orru to hiyyo illo obe ara heruhok. ⁹ Esiara ihidak hatara ihidak no obe ŋasi inno honyie ara tomwuana ile, oŋoruo tuŋoani lobotie. ¹⁰ No eyyen hiyyo inyia to higiemita inno olibo, kuya ara iyya eriria inyia durre, kuya ojo olibo to lufajak, kuya ellilla hejek inno heruhok, kuya etihutek to hetabanak, kuya lejufuta igiem no olibo. ¹¹ Ati te ihidahi inno hitiŋi, baŋa etigiorok isia to hiji hosie, iyya nafa afanu isia he iwahiti to wati innohosie to Yesu, awak isia yama. ¹² To hikoi inna arrumu isia hipalita iyya obe isia ottoŋita itieriti innohosie. ¹³ Hidofe, atta isia afanu hittole ania. Loton ta huluta haŋ ahaŋ. Obe ara nia hame owuana hidofe isia ania, ati atta hira hidofe telerok ojo arra heitiharak, ero hirro inno obe isia eremik hiro. ¹⁴ Teyya awak nayya ŋoruo inno hittiŋi hatayamai anyar esiu durre, anyar eniefita haŋitek, hotobiaŋa esio to hetirijak furusa ne etisiahari to hosie to higiemita inno sitan. ¹⁵ Ati oyite illak halas ade ta halu ho Sitan. ¹⁶ Owuon nobo hiito oŋoruo no eruk he ihidahi, isiara inyia hotoluak isia, anyar obe ikelesia etaban, anyar eremik mahati huluak ihidahi hunna dede. ¹⁷ Isiara maruak illo edihita no olibo hotorrumek baŋi nettok, no no to lia olot ho hisiŋita ojo ho hitiyienita. ¹⁸ Ati ojo higierita hijo, "Hotobiaŋa iyye efit hiteŋ tamot ille ahafita ŋama," ojo "Hegiamak orrumek arobiyaha innohosie." ¹⁹ Baŋa eruk to hitisiahita inno maruani ille owuon mahati ho sutin ohorik kuya lohunik. ²⁰ Itihutek heyyak to hosiere ho hiyyo daŋ anyar mahati abaŋ baŋi illo hosie. ²¹ Elimak nayya ta hatai to hosiere ho Hollum, to Kristo Yesu, ojo to anjilohien onyimot, iniafa hitimanyita hunna to biaŋan no teler, ojo hidofe itai iso obe eticio. ²² Ibaŋa ehumak has inno orru to lobo, kuyya ebuan hiyyata inno arra inno lobo. Ihumak wan nohoi atuŋani dede. ²³ Hotobiaŋa iyye enyiak mata hifioŋ, ati amat lobo balu kai to hosehe nohoi iko to ŋwai nohoi no odule. ²⁴ Eyyen iyyohoi luŋa hiyyata inno illak hiyyo, ojo isia ofu iko isia, ekumori. Ati ejufari illak innak hiyyata iso ta halu. ²⁵ Iyya hidofe, oyyen hiyyo higiemita inno olibo daŋ, ati obe innak oremik eŋofohini.