¹ Isiara iluluŋ ho hepitok hejufari halu no hegiamak ilo hekumok illohosie obe ara to hilohitok inno hosie inno hiruk no baŋi daŋ, anyar obe fure no Hollum ho hitiyana nohonyie etihara . ² Hotobiaŋa hekumok lia owuon ho hiruk to etaha etifiak watek inno hosie, iyya nia aracie isia ahalasirak. Ati anyar egiama isia tohosie daŋ, iyya te ettaha ilia ohoru arobiyaha inno hosie ara to mune ojo hidofe ara to hiruk. Itiyanai atta iyye elimak hirro inia. ³ Etiyana lobo tuŋani ilufuti ojo obe eruk hirorita inno olibo tara iyyohoi, hirorita inno Hobu lohoi Yesu Kristo, ojo to hitiyenita inno hiruk, ⁴ etidara inyia ojo obe oyywn innak hirro, oŋuai inyia he irijiti iko iŋalafiti, inno eyiani dayia, irijiti, imoriti, hitisiahita, ⁵ ojo iŋalafiti inno hiyyo ho tajia inno orru. Oyite isia ade tara hiruk. Egigilo isia hijo hiruk to Hollum inyia ara hikoi no harrumehini ibariti. ⁶ Ati baŋi no Hollum iko mune hira irumut nettok. ⁷ Ati enyie iyyohoi ho eyyani innak hirro afau inna, ojo kuya eremik mahu iyyohoi eyari ade innak hirro. ⁸ Ati, oremik iso ŋiria iko boŋojin iyyohoi. ⁹ Iyyania ahuyik hiyyata to lia awak wati hirra habarak, to hitigiemita, to hibolit ojo to higiemita inno emonya, ojo to innak hirro hidofe inno etijiŋak hiyyo ho effi to hitisiahita ojo to hitiharita. ¹⁰ Ara mune na arobiya hadeti no irruti. To hiyyo illa lawak arobiyaha efie ade tara hiruk ojo obe oremik hitir watik innohosie iko hijiriŋa arriai. ¹¹ Ati to hoi, tuŋani lo Hollum, ibusak hirro inia. Tosiehai ibisiti, hirro inno Hollum, bisan, mune, dihan, iko nyalami. ¹² Irribe hirribo nalanyar no huruk. Ijufari hikoi no wuaran iyya nafa ellilloŋori nayya itai, ojo to hetihutek nohoi sutin to hosiere ho sutin arriai iyya to libe. ¹³ Elimak naŋ ta hatai to hosiere ho Hollum, le ehumak hirro daŋ ha amanyari, ojo to hosiere ho Yesu Kristo, le ero ilibiti dede to hosiere Pontio Pilato. ¹⁴ Iniafa hifahita dede, inno agalik hitimorita, man olieuni Habu lohoi Yesu Kristo. ¹⁵ Eyyani iso halieu no honye iyya holoŋ no obis no ehumahini te ille eruk, to golon, ta habollok ille ekumo, ojo Habu la ara ettok. ¹⁶ Owuon inyia ho wuaran hame ojo amanya hititifita inno obe aciala. Obe lobo tuŋani lo owolo inyia ojo obe eremik egonyu inyia. Isiara baŋi iko golon nohonyie no odule obe hucuŋi. Amen. ¹⁷ Ilimak habarak illo fau inna hotobiaŋa etidara, kuyya anyar egigilo te ibariti inno eremik litai. Ati anyar egigilo isia to Hollum, le esio te iyyohoi daŋ ibariti hunna dede inne emanyari iyyohoi. ¹⁸ Ilimak isia ho egiame ilibiti, anyar abara to higiemita inno olibo, anyar emorot, ojo hidofe eremik hubwan. ¹⁹ To hikoi nia, atta isia arrumu manya to wati innohose manya no olibo to nyio iso ottu, ojo hidofe isia eremik hinief manya inna dede. ²⁰ Timoteo, tottoŋ sihin nafa esiarahini tohoi. Baŋa ero hirorita inne ebolit ojo hititihara inno irijiti te iteleriti inne ellilloŋo hiyyo ofioroho. ²¹ Ero illak hiyyo hirro inia ojo hidofe ofu ade tara hiruk. Hotowuana hamehini he itai daŋ.