¹ Iyyania ojo Loyiri hijo ta halu edek iso illak hiyyo hiruk atta hitira to hinyiebita inno oyiri no orru ojo to hitiyenita inno Sitan to ² hinyebita inno hitipalita, te ibaŋiti inno hosie egiorohini. ³ Etuwet iso isia yama atta hiyumo ŋiria nafa oyyek Hollum te ibwanyiti iko hisiorita inno humo to heruhok illafa afanu hiyyen dede. ⁴ Ati olibo hirro inno oyyeu Hollum daŋ, ojo hidofe inyia obe ebo nia eyari iyyohoi ahisiorita inno humo, ⁵ iyya nia aracie inyia to hirorita inno Hollum ojo imojiti. ⁶ Le etiyana iyye hirro inia to hosiere ho halasirak, era iso iyye hegiamani lo olibo lo Yesu Kristo iyya etiyenini iyye to hirorita inno hiruk ojo to hitiyenita inno olibo innafa ejufak iyye. ⁷ Ati hotobiaŋa iyye eruk hiyebita hipalita inno omuno maruak inno ŋoruo, ati itiyana wan nohoi to hiruk. ⁸ Ati elahaman hitiyana no wan kai, ati elahaman hiruk to hirro daŋ ojo hidofe ottoŋ itieriti inno manya nia iyyania ojo to manya no ottu. ⁹ Ara sayye hunna dede ojo hidofe efut ho hiruk. ¹⁰ Ara iyya nafa etufari iyyohoi ejio hidofe egiama no no, iyyania ewuanari iyyohoi ho hiruk to Hollum lo amanya iko hoi, lo ara hetilahani lo hiyyo daŋ, ati no no to heruhok. ¹¹ Ilimak atta iyye hitiyanai hirro hunna. ¹² Hotobiaŋa lobo omiana iyye ta ŋasi ilia hatai, ati anyar efanu itai hira hutuhututa illo hiruk to hirorita, to higiemita, to mune, ojo te ilibiti. ¹³ Man attuni nayya, itire to hihienita, to hitigolita, ojo to hitiyenita. ¹⁴ Baŋa ebusak hisiorita inno owuon tohoi, innafa esiarahini tohoi to hikilita, iko to ifieriti inno has inno maruak. ¹⁵ Iririe hirro hunna, itiwuana iko isia, anyar efu itai ahosiere to hirro daŋ. ¹⁶ Ihuma riŋa wan nohoi iko to hitiyana nohoi. Todule to hirro hunna iyya egiem iyye daŋ ania etuluak iso iyye wan nohoi iko ilia ille etira tohoi.