1
Ara hirorita hunna dede: La awak lobo tuŋani hira hegiamani, awak inyia igiem no olibo.
2
Ati obe iso inyia enyiak hitipala, oliawa hiito oŋoruo nobotie, herrirriani, lelofere, habisani, la anyalam, lo eremik hitiyana,
3
lo obe ara hamatani la balu, lo obe ara hetiŋalafani, ati ille ara hiito oliawa lo ogol, anyalam, lo obe orru to arobiyaha.
4
hotottoŋ haŋ nohonyie nalanyar, ojo durre inno honyie abaŋ inyia ho baŋi daŋ;
5
ati le enyie tuŋani ho oyyen toŋita haŋ nohonyie, hotoŋ iso inya ikelesia no Hollum jai?
6
Hotobiaŋa inyia ara heruhoni ŋejuk, anyar obe eremik hira hetidarani hijo hotobiaŋa ohuyik to hikumuta iyya hetisiahani.
7
Anyar owuon hidofe ho higigilita iko lia owuon ade, anyar obe inyia ohuyik ho irri ojo to hikoi no Sitan.
8
Ettaha, iyya nyia, anyar owuon ho baŋi, lo obe ara herarani ho rori arriai, lo obe amata balu no no, ojo hidofe obe ara orrute.
9
Anyar owuon isia ho hituhututa dede inno hiruk iko baŋi no olibo.
10
Hotociem hiyyo isia to hosiere, attati isia higiama nyo obe isia owuon ho nobo hipali.
11
Anyar hidofe abaŋ ŋorwo daŋ to hikoi to nia, obe ara to hipalita, hotobiaŋa egiama no no, ojo hidofe ara heruhoni to hirro daŋ.
12
Isiara hegiamani le ikelesia hotowuana ho hiito noŋoruo nobotie ojo hidofe hotottoŋ durre iko haŋ nohonyie no olibo.
13
Lia egiem no olibo orrumek to wati inno hosie hilohittok iko to wahan no hiruk to Kristo Yesu.
14
Egiorok Nayya ta hatai hirro hunna ajo naŋ awak hidofe awoŋ ta hatai kkuak.
15
Ati elliŋa nayya, egiorok naŋ anyar eyyen mahati iyye hijo hegiamai hiyyo jai ta haji no Hollum, inna ara ikelesia no Hollum lo owuon iko hoi, anyar etihutek, ikotin ojo iluahiti inno hiruk.
16
Dede obolo hiyyen binno hiram no hiyye Hollum nafa eŋofohini: "Oliew ifa Kristo ta wan no tuŋani. Etuhutak Loyiri libe nohonyie, egonyu ifa anjilohien inyia, etiyana hiyyo hiram nohonyie to hiji ha paganohien, eruk hiyyo illo fau hiram nohonyie, ojio hidofe efwotu inyia te ido to kwatan.''