¹ To hitigiama nafa orrumu Yesu to wan nohonyie, iciofok ta wati innahatai higigilo ne erri iyya nohonyie. La arrumu lobo hitigiama ta wan, owueta inyia tara hiyyau. ² Enyiei tuŋani ille hamanya te iwahiti inno wan, ati te iwahiti inno Hollum- to hicuŋi na manya nohonyie. ³ Ajo naŋ ta hatai ania nyo obolo manya nahatai ta fau inni iyya hiyyo hullo obe ara heruhok- ara iwahiti hunna hirro inno somon, daya, ruma, hijoria, hiŋiŋalafa ta masik inno hiyyom, hitihabuo no rijorihien. ⁴ Elafuho isia binno hijo no nyo ebe itai ehuma hirro inne daŋ hosie, atta isia hirro ne ebuot te itai. ⁵ Ofu iso isieja etuhutek to Hollum haŋotoni la hayyok iko hiyyo hullo amanya. ⁶ To hiram to ne etiyenari hiyyo sayye no Hollum to hiyyo illafa oye, oŋot ida hido Hollum isia to wati innohosie to hira nohosie hiyyo, hijo hatamanyai isia to Hollum to oyiri nohonyie. ⁷ Awoŋ hucuŋi no hirro. Iyyania, igigile na anyar, anyar egigilo itai to hiram no mojo nahatai. ⁸ Holobe hinak hirro, itumune watie innahatai, nyo obe mune awak etileu hiyyata inno hilak. ⁹ Ituhutek himorot to mune, hotobiaŋa itai elahana. ¹⁰ Iyya efwotu itai hisiori gele gele, igiamari ejio hidofe eluahari watie innahatai iyya era itai hattunak illo hisiorita inno Hollum arria. ¹¹ Lero lobo, isiara hatara iyya Hollum ero, lara lobo a hegiamani, isiara igem nohonyie hawoŋ tara golon ne esiara Hollum, to hirro inne daŋ ohu iso fure no Hollum to Yesu Kristo. Nyo ara ohuo iko golon innohonyie mak man fur. Amen. ¹² Halasira, ibaŋa eyari iciemiti inno owulo ahima hunna afanu hicem itai to hikoi no olufa, iyya ara mahu nobo sihin no olufa edoŋ ta hatai. ¹³ Ati iyya eba hirro inne arria ta hatai iyya eba ifa to Kristo, itumune, anyar honyie emuno la lieu ohuo nohonyie. ¹⁴ Lemor hiyyo itai to fure no Kristo, arrumu itai jaha, nyo owuon Oyiri no ohuo iko Oyiri no Hollum da hatai. ¹⁵ Ati hotobiaŋa lobo lahatai orrumu hitigiama iyya hattohoni, iyya lohoho, iyya lorrute, iyya hetiharani. ¹⁶ Ati larrumu lobo hitigiama to hira nohonyie a heruhoni, hotobiaŋa inyia eloriri, ati isiara inyia hetihabuo Hollum to fure nyia. ¹⁷ Ottubai to holoŋ no ohuye Hollum aŋotori, etiara ta haji no Hollum. Letiara he iyyohoi, heidoŋ iso nyo to luha illo obe etira sayye inno Hollum? ¹⁸ Ojo "letilohini tuŋani lo olibo to hitigiemita, heidoŋ iso nyo to tuŋani lobe oyyen Hollum iko heyyani?" ¹⁹ Iyyania, isiara ilia illo orrumu hitigiama iyya awak Hollum hesiara oholioho innohosie to Hayyani lo olibo ojo isia odule higiama ilibiti.