¹ Ero naŋ te eittaha illo owuon to hiji hatai, ille etiyana iluluŋ no heruhok, nayya, ara hidofe nayya daŋ ettok ojo hidofe ara asut inno hitigiemita inno Kristo, ajo hidofe ara lobo lohu iso egonyu ohuo no ohu aliew. ² Iyyania, ero naŋ ta hatai, ettaha, ihuma riŋa iluluŋ no kioro no owuon to hiji hatai. Itirriŋe to hosie, obe ojio hijo, anyar erriŋa itai to rosso, ati to wahan nahatai, iyya awak Hollum. Itirriŋe to hosie, hotobiaŋa ara to wahan na arobiya, ati wahan to bolioŋ. ³ Ibaŋa ehuma iyya ettok to hiyyo illa ara illahatai. Ati anyar era itai a hutuhuti to kioro. ⁴ Lalieu herribitani lo kioro, efotu iso itai ohuo na tamu nobe wule nohonyie oremik hissaha. ⁵ Iyyania, ero ta hatai nyarhalu, anyar eruk etira itai to hiyyo illo hittaha. Isiara heruhok daŋ hehuma te hilak hiyyo ta nyalami iyya egiama to hosie. Nyo ebo Hollum hetidarak, ati esiara inyia hamehini ta hanyalamak. ⁶ Iyyania, inyaha wati innahatai ahalu to golon na hani no Hollum hijo anyar ahaf inyia itai ahide to okit nohonyie. ⁷ Isiara daŋ hilafuhita innahatai to honyie, nyo eriria inyia itai. ⁸ To holoŋi daŋ, ihuma riŋa, nyo oreta sitan heturuoni, iyya emie aŋati, osiaha hijo anyar etihar isieja lobo. ⁹ Ituwetai no ogolo hefuhari inyia. Itigolo huruk nahatai. Itiyyen hijio odi halasirak illahatai ilia owuon ta fau hitigiemita inia daŋ. ¹⁰ Le esaha hitigiama nahatai, ehuhumak iso Hollum la hamehini, lafa ellilloŋu itai to ohuo nohonyie nobe hucuŋi no owuon to Kristo, atta iso essihok itai, ojio hidofe etigol itai. ¹¹ Amojo naŋ hijio hatara golon nohonyie ahosiere man fuur. Amen. ¹² Ayyen naŋ hijo ara Silvano a tuŋani le elim binno, egiorok ifa naŋ ta hatai te inyia. Ero naŋ ta hatai ajo hidofe etuhuta itai hijo ara rori innafa egiorok naŋ ta hatai hamehini no obis no Hollum. Ituwetai te innia. ¹³ Nyie lowuon ta Babilonia, nafa onyimuni he itai, efonya itai iko Marko, lonyi hanaŋ, efonya itai. ¹⁴ Ifonya wati innahatai daŋ to mune. Isiara mune daŋ hotowuana ta hatai ille ewuon to Kristo.