¹ Motiarak, ibaŋa leruk innak oyirihien ati iticiem oyirihien anyar eyyen kuya hara mahu no Hollum, nyo esarai telerok illo hekilak a fau. ² Lehum itai ania eyyen iso itai Oyiri no Hollum-oyiri neruk tamai daŋ hijo eyari Yesu Kristo wan ara tara Hollum, ³ ojo oyiri nobe eruk Yesu obe ottu tara Hollum. Oyiri no haliwak illo Kristo illia, nafa etiru itai hijo ottu iso, ojo iyyania eba ta fau. ⁴ Era itai illo Hollum, durre hanaŋ, egalik itai i isia nyo lia lowuon ta hatai agalik lia lowuon ta fau inna. ⁵ Ara isia illo fau, nyo ara rori innia ero isia inno fau, ojo fau etira to hose. ⁶ Era iyyohoi illo Hollum. Lia loyyien Hollum etira te iyyohoi. Lia lobe etira te iyyohoi obe ara lo Hollum. Te innia, eyyen iyyohoi oyiri no bisan ojo oyiri no hipali. ⁷ Motiarak, hetumonoi wati, nyo ottu mune tara Hollum, tuŋani lomuno esiuni inyia tara Hollum ojo hidofe inyia oyyen Hollum. ⁸ Tuŋani lobe omuno, obe oyyen Hollum, nyo ara Hollum mune. ⁹ Oliew ifa mune no Hollum to hiji hohoi, nyo efahu ifa Hollum Lonyi honyie ille lobotie a fau hijo anyar emanya iyyohoi te inyia. ¹⁰ Etuhutek ifa Hollum te iyyohoi mune, obe ifa iyyohoi emuno Hollum, ati etier ifa inyia mune iyyohoi, atta ŋefahu Lonyi honyi hatara idumut no hiyyata innohoi. ¹¹ Motiarak hanaŋ, lomuno Hollum iyyohoi, anyar emuno hidofe iyyohoi wati innohoi. ¹² Holobe lobo tuŋani egonyu Hollum. Lemuno iyyohoi wati, odule iso Hollum iko hooi ojo mune nohonye atta hufut te iyyohoi. ¹³ To nia att iyyohoi hiyyen hijo erasa iyyohoi to honyie ojo hidofe inyia arasa toohoi, nyo esio inyia te iyyohoi Oyiri nohonyie. ¹⁴ Egonyu iyyohoi ejo hidofe era asuuti hijo ŋefahu Monye Lonyi hatara hetilahani la fau. ¹⁵ Tuŋani leruk hijo ara Yesu Lonyi Hollum, odule iso Hollum to honyie ojo inyia hidofe odule to Hollum. ¹⁶ Eyyen iyyohoi ejo hidofe eruk mune no Hollum nolowuon dohooi. Ara Hollum mune, lia lodule to mune, odule iso inyia to Hollum ojo Hollum to honyie. ¹⁷ Ehuhumahini mune nalanyar to hiji hohoi, hijo anyar ewueta iyyohoi ta far no ŋoto, iyya ne owuanari inyia, ewuon iso iyyohoi ta fau daŋ inna ania. ¹⁸ Obe baŋi to mune. Efuhai mune no olibo baŋi ade, nyo edia baŋi arik ho baha. Ati holobe tuŋani labaŋ arrumu mune nalanyar. ¹⁹ Emuno iyyohoi nyo omuno Hollum iyyohoi to hitieri. ²⁰ Lojo lobo hijo "Amuno naŋ Hollum" ojo inyia oliwari ilasi honyie, ara loteler. Lobe lobo omuno ilasi honye lo oliew lo riŋa inyie, jai horemik iso inyia mune Hollum lobe inyia egonyu. ²¹ Ara hifahi inna tiji: Lia lomuno Hollum, hotomunoi daŋ ilasi honye.