¹ Tuŋani leruk hijo ara Yesu a Kristo, esiuni tara Hollum. Ojo hidofe tuŋani lomuno lobo lafa ottu tara Monye, anyar omuno daŋ durre innohonyie. ² To nia eyyen iyyohoi hijo emuno iyyohoi durre inno Hollum-Lemuno iyyohoi Hollum, att iyyohoi egiamari hifahita innohonyie. ³ Ara mune to Hollum hijo anyar eduloi iyyohoi hujufuta hifahita innohonyie nyo obe hifahita innohonyie erosi. ⁴ Lesiuni tuŋani tara Hollum, odule iso inyia ŋagalik fau. Golon nyia nia no oremik ŋagalik fau, inyia huruk nohoi. ⁵ ŋai lia oremik agalik fau? Inyia tuŋani leruk hijo ara Yesu Lonyi Hollum. ⁶ Inyia lia lesiuni to hifioŋ ojo to hoto- Yesu Kristo, Obe inyia esiuni to hifioŋ hamai, ati esiuni inyia to hifioŋ iko to hoto. Oyiri lo libo inyia hamai etuhutak, nyo ara Oyiri habisani. ⁷ Owuon hirro hunik inne etuhutek: ⁸ Owuon Oyiri, ojo hifioŋ ojo hoto; Ojo hirro hunik inne emwara daŋ anobotie. ⁹ Lefwotu iyyohoi hutuhuti no hiyyo, agalik ati no Hollum hutuhuti no Hollum, ara inna hutuhuti netuhutari Hollum hirro inno Lonyi honye. ¹⁰ Leruk lobo tuŋani to Lonyi Hollum owuon inyia ho hutuhuti to wan nohonye. Lobe lobo eruk Hollum ehumak inyia Hollum loteler, nyo obe inyia eruk hutuhuti nelero Hollum hirro inno Lonyi honye. ¹¹ Ara inna ahutuhuti hijo eisio Hollum dohoi waran no losio fur, ojo wuaran nolosio fur inna owuon to Lonyi honye. ¹² Lia lo owuon ho Lonyi honye, owuon ho wuaran; ojo tuŋani lobe owuon ho Lonyi Hollum obe owuon ho wuaran. ¹³ Egiorok naŋ ta hatai hirro inne hijo anyar leyyen itai hijo lewuon itai ho wuaran no losio fur. Ta hatai ille eruk to fure no Lonyi Hollum. ¹⁴ Owuon huruk nohoi to honyie tiji, hijo oyremik inyia hisio iyyohoi innak hirro inne lefia iyyohoi to honyie lara to wahan nohonyie, etira inyia iyyohoi. ¹⁵ Leyyien iyyohoi hijo etira inyia iyyohoi, esio inyia hirro inne ewak iyyohoi lefia iyyohoi inyia. ¹⁶ Lewolo lobo tuŋani ilasi honyie lehuma hiyyau no lobe oremik eyyani ye, isiara inyia hotomoje ojo Hollum att hisio to honyie wuaran. Ero naŋ te illia lobe hiyyau nohose oremik eyyani ye. Owuon iyyau no oremik eyyani ye. Abe naŋ ajo anyar lomojo inyia ania. ¹⁷ Ara ibwotita daŋ tamai iyau. Ati owuon iyyau nobo nobe oremik eyyani ye. ¹⁸ Eyyien iyyohoi hijo obe tuŋani lesiuni tara Hollum odule hiyya. Nyo eriria lafa esiuni tara Hollum inyia, obe heturruoni oremik eriafu inyia. ¹⁹ Nyo eyyien iyyohoi hijo era iyyohoi illo Hollum eijo hidofe iyyohoi leyyen hijo owuon fau daŋ ta has ho heturruoni. ²⁰ Ati, eyyen iyyohoi hijo awoŋ Lonyi Hollum atta hisio toohoi hiyyen, hijo anyar eyyen iyyohoi inyia lara habisani anyar ewuon iyyohoi to honyie lara habisani-ojo to Lonyi honyie Yesu Kristo. Inyia lara Hollum dede ojo wuaran no losio fur. ²¹ Durre hanaŋ, ibusak rijoriehien.