¹ Itiwolo to mune nelesio Monye toohoi, hijo era iyyohoi durre illo Hollum, era iyyohoi ania. To hiram nia, obe fau oyyen iyyohoi, nyo obe fau oyyen inyia ² Motiarak, iyyania era iyyohoi adurre illo Hollum, holobe ati etuhutahini hijo ewuon iso iyyohoi jai. Eyyen iyyohoi hijo era iso iyyohoi iyya inyia laliew inyia egonyu iso iyyohoi inyia. ³ Tuŋani lehumak hittila nohonye to mwoi nyie ojo hidofe oriŋa do honye, etilibo iso wan nohonye iyya inyia. ⁴ Lodule tuŋani hiyya, odulo inyia miasa hifahi no Hollum. Nyo ara hiyyau miasai no hifahita. ⁵ Eyyen ifa itai hijo oliew ifa Kristo hijo anyar eyari hiyyata ade. Obe nobo iyyau to honye. ⁶ Obe lobo lowuon to honye odule hiyya. Obe tuŋani lodule hiyya egonyu inyia kuyya hidofe oyyen inyia. ⁷ Durre hanaŋ, hotobiaŋa lobo etipal itai. Lia legiama ibisiti ara habisani, iyya ara Kristo habisani. ⁸ Lia legiama hirro inno hiyyau ara inyia a sitan, nyo eyyau ifa sitan man beren. To hiram nia, ottu ifa Lonyi Hollum hitihar igem no sitan. ⁹ Obe lafa esiuni tere Hollum odule hiyya nyo arasa hinyomoti no Hollum to honye. Obe inyia odule hiya nyo era inyie a hiito lo Hollum. ¹⁰ To nia, oliew durre illo sitan ojo durre illo Hollum. Lobe lobo egiama ibisiti ojo hidofe obe omuno ilasi honiye obe ara lo Hollum. ¹¹ Hiram nyia nia nafa etiru itai man to hitieri, hijo itumune wati innahatai, ¹² nobe ara iya nafa ho Kaino lafa ottohoi ilasi honyie. No nyo ottohe inyia ilasi honyie? Nyo orru ifa igemita innohonyie, ojo inno ilasi honyie obis. ¹³ Ibaŋa ati eliliha halasira hanaŋ loliwari fau itai. ¹⁴ Eyyen iyyohoi hijo ellaŋ iyyohoi to ye awuaran, nyo emuno iyyohoi halasira. Lobe lobo omuno, odule iso inyia to ye. ¹⁵ Loliwari lobo ilasi honye, ara inyia a hattohoni. Nyo eyyen itai hijo obe wuaran nolosio fur owuon to hattohoni. ¹⁶ Eyyen iyyohoi mune nyo esio Kristo wan nohonye to mune nohonye iyyohoi. Hesiara hidofe wati innohoi to halasira. ¹⁷ Ati lewolo lobo lowuon ho ibariti inno fau inna atta egonyu olociaŋ letaban atta enyie holwak inyia, obe mune no Hollum do honyie, Howuon iso mune no Hollum, jai iso lowuon mune no Hollum do honyie? ¹⁸ Durre hanaŋ ibaŋa omuno to hiro iko to ŋadief ati to igem ojo to bisan. ¹⁹ Eyyien iyyohoi hijo era iyyohoi illo habisani eijo iyyohoi esio tajia innohoi to hosiere honyie. ²⁰ Nyo leŋot tajia innohoi iyyohoi, agalik Hollum tajia innohoi nyo oyyen inyia hirro bi daŋ. ²¹ Motiarak, lobe tajia innohoi oŋot iyyohoi, atta iyyohoi eyyik to Hollum. ²² Ojo lefia iyyohoi hirro tara honyie, eremik iso iyyohoi ŋamoju tara honye. Nyo ejufuta iyyohoi hifahita innohonyie atta iyyohoi hihuma hirro inno olibo do hosiere honye. ²³ Hifahi nohonye innaŋ, hijo anyar eruk iyyohoi to fure no Lonyi honye Yesu Kristo eijo hidofe emuno wati innahatai iyya nafa esiarari inyia hifahi nohonyie. ²⁴ Lejufuta lobo ifahita inno Hollum, odule iso inyia to Hollum. Te innia, atta iyyohoi hiyyen hijo arasa inyia te iyyohoi to Oyiri lafa esio inyia toohoi.