¹ Durre hanaŋ, egiorok naŋ ta hatai hijo hotobiaŋa itai eyau. Ati leyau lobo, ewuon iyyohoi iko hetumwarani lowuon ho Monye, inyia Yesu Kristo lara habisani. ² Odumak inyia hiyyata innohoi, obe ara innohoi hame, ati to inno hiyyo daŋ ta fau. ³ Te innia, lejufuta iyyohoi hifahita innohonyie, atta iyyohoi hiyyen hijo eyyen iyyohoi inyia. ⁴ Oteler tuŋani lojio, "Ayyen naŋ Hollum," ojo inyie obe ejufuta hifahita inno Hollum, ojio hilahode obe tara honyie. ⁵ Ottuba mune no Hollum do tuŋai lejufuta hiram nohonyie. Etuhutak nia hijo ewuon iyyohoi to honyie. ⁶ Hotodule tuŋani lowuon to Hollum atta hidofe loton daŋ iyya nafa olotori Yesu Kristo. ⁷ Motiarak, abe naŋ egioro hifahi ŋejuk ta hatai, ati nafa maruani nafa etiru itai beren. Hiram maruani nafa etiru itai. ⁸ Ati egioro naŋ hifahi ŋejuk ta hatai, no bis to Yesu ojo ta hatai, nyo ellaŋ idumele ojo iyyania awoŋ cialai inna dede. ⁹ Lojo lobo awuon inyie to cialai ojo inyia arasa aliwari ilasi honyie, harasa inyia te idumele man iyyania. ¹⁰ Lia lomuno ilasi honyie, odule inyia to cialai, obe nobo far noremik inyia ŋahuye. ¹¹ Ojo loliwari lobo ilasi honyie, harasa inyie te idumele ojo hidofe odule loton te idumele; obe inyia oyyen mai nolowuye inyia, nyo etiŋodo idumele honyehite innohonyie ¹² Durre hanaŋ, egiorok naŋ ta hatai, nyo ŋebusahini hiyyata innahatai to fure nohonyie. ¹³ Monyie, egiorok naŋ ta hatai nyo eyyen itai inyia man to hitieri. Egiorok naŋ ta hatai nyarhalu, nyo emirai itai heturruoni. Egiorok naŋ ta hatai, durre hullo hitiŋi, nyo eyyien itai Monye. ¹⁴ Egiorok naŋ da hatai, monyie, nyo eyyien itai inyia man to hitieri. Egiorok naŋ da hatai, nyarhalu, nyo hegol itai, ojo hiram no Hollum harasa ta hatai, amirai itai heturruoni. ¹⁵ Ibaŋa omuno fau iko hirro hunno owuon ta fau. Lomuno lobo fau ho hirro inno owuon daŋ ta fau, obe mune no Monye owuon do honyie. ¹⁶ Hirro inno owuon ta fau- daya no hirro inno wan, daya no hirro to honyehite, ojo hitidara no manya. ¹⁷ Esaha iso fau he iwahiti innohonyie, ojo tuŋani lehuma wahan no Hollum odule iso man fur. ¹⁸ Durre hullo hitiŋi, ara hucuŋi na sa, iyya nafa etiru itai hijo ottu iso mereni lo Kristo, iyane, obore miorok illo Kristo to hiji hohoi, eyyen iyyohoi hijo ara hucuŋi no sa. ¹⁹ Ofu ifa isia ade tara hohoi, ati obe ifa isia ara illohooi. Lara ifa isia illohooi, nodule ida isia wuana he iyyohoi. Ati hefie nohosie tara hohoi, etuhutek hijo obe isia ara illohooi. ²⁰ Ati arrumu itai golon tara Oyiri Haliboni, eyyen itai daŋ tamai hilahode. ²¹ Abe naŋ egiorok ta hatai hijo ibe itai eyyen hilahode, ati eyyen itai nyo obe hilahode awak teler. ²² ŋai ara loteler, ati lia lorisa hijo obe Yesu ara Kristo? aAa tuŋani lia mereni lo Kristo to risa nohonye Monye iko Lonyi. ²³ Obe lobo lorisa Lonyi ojo inyia Owuon ho Monye. Leleruk Lonyi owuon iso ho Monye. ²⁴ Ati ta hatai, isiara innafa etiru itai hotodule ta hatai. Larasa lafa etiru itai ifa beren da hatai, eijo iso itai erasa to Lonyi ojo to Monye. ²⁵ Ara inna itierit nesio inyia te iyyohoi: wuaran nosio fur. ²⁶ Egiorok naŋ ta hatai hirro hunna to hiram no ilia illo oremik etipalai itai ade. ²⁷ Ojo ta hatai, arasa Oyiri nafa efwotu itai tara honyie, obe itai ewak lobo hetiyanai itai. Ati iyya etiyana Oyiri itai hirro daŋ, ara dede obe ara to teler, iyya etiyen inyia itai, itudule to honyie. ²⁸ Iyyania, durre hanaŋ, itudule to honyie, laliew inyia, anyar honyie efu wueta to hiŋere to hosiere honyie obe irri laciohini inyia. ²⁹ Leyyen itai hijo ara inyia habisani, eyyen itai daŋ hijo legiama lobo nolobis, nyo ara esini inyia tara Hollum.