¹ Oremik tuŋani hijo tohoi tiji, ara iyyohoi piti illo Kristo ojo hidofe herrirriak no hiŋofo no dede no Hollum. ² To hiram nia, awak anyar osiru herrirriak te igem nohosie. ³ Ati ta hanaŋ ara sihin letiŋ no ta hatai haŋotori hiram nanaŋ kuyya to okiko holobo tuŋani. Abe naŋ aŋot towan nanaŋ. ⁴ Abe nayya egonyu nobo hiloito ne ehumahini ta nayya, ati obe nia etuhutek hijo abe naŋ ara hepalani. Hollum lia oŋot nayya. ⁵ Ati baŋa lo ŋoto innak hirro holobeŋ far nyia awoŋ, holobeŋ Habu awoŋ. Ohu inyia eyyani ciala hirro innafa eŋofo te idumele ojo hidofe etiliew hiram no taji. Ati orumu iso hiyo daŋ hitahuo nohonyie tara Hollum. ⁶ Iyyania, halasirak, ehuma naŋ higiemita hunna to wan nanaŋ ojo Apolo to hiram nahatai, hijo anyar etiyenu itai hijo hero hiyebita hunna nyo tara hohoi, "Ibaŋa agal hirro inne egiorohini." Anyar obe lobo ojo agalik inyie lobo ⁷ tuŋani. ŋai egonyu ilufuti innohoi to hiji ha baŋai? Hara nyo nia owuon to honye ino obe iyye erumek asai? Lemoju iyye asai, nyo ati etidara iyye iyya ebe iyye emoju asai? ⁸ Awuana itai ho hirro bi daŋ inne ewak itai! Asaman itai! Etiara iye toŋita ahabwe, attta itai hiwuoto tara hohoi! Dede, awak naŋ itai hotottoŋitai, anyar ettoŋita iyyohoi iko hoi ahabwe. ⁹ Ati egigilo naŋ hijo ehumak Hollum iyohoi efahat halu to hibili te igem ojo hidofe iyya hiyyo illo esio hiyyo to ye. Era iyyohoi bi iyya manaraha irriŋiti ta fau, illa anjilohien iko to hiyyo. ¹⁰ Era iyyohoi bolitok to hiram no Kristo, ati ejo itai elefere to Kristo. Elik iyyohoi, ejo itai egol. Abaŋ hiyyo itai, ojo hiyyo obe abaŋ ¹¹ iyyohoi. Man to holoŋ inna he ena ewodo iyyohoi ojo hidofe eboto, eciefita iyyohoi boŋojin inno orru, abak hiyyo iyyohoi no lorru, ojo ebe iyyohoi ewuon iko haŋitek. ¹² Egiama iyyohoi no, hegiamari ta has innohoi. Nafa omorori hiyyo iyyohoi, ejok iyyohoi. ¹³ Nafa etigiamari hiyyo iyyohoi, ejo iyyohoi edik. Nafa etifittaŋari hiyyo iyyohoi, ejo iyyohoi ero to nyalami. Afanu iyyohoi hira, ojo iyyohoi erasa hira hiyyo illo ebo fau iyya hirro inno omura agalik hirro bi daŋ. ¹⁴ Abe naŋ egiorok hirro hunna hetilorijori itai, ati hesiŋari itai iyya durre illallaŋ illo amuno naŋ. ¹⁵ Nyo ewuon ida hido tai ho hetiyanak alif tomon to Kristo, ebe itai ewuon ho monyie arria, ati ara naŋ monye hatai to Yesu Kristo to sayye inno olibo. ¹⁶ ati alia naŋ ta hatai hijo anyar ejufuta itai nayya. ¹⁷ Inyia nia efahak naŋ itai to Timoteo, durre illo amuno naŋ iko heruho illo Habu. Ara ida hido etiyana naŋ isia to masik bi daŋ iko te ikelesia. ¹⁸ Iyyania arasa illak illahatai tume hirro, hegiamari iyya abe ifa naŋ attu ta hatai. ¹⁹ Ati attu iso nayya ta hatai kwak, awak Habu. Attu naŋ hiye obe ara hiro no ele etidara, ati ahu naŋ huwolo golon no hosie. ²⁰ Obe obie no Hollum ara to hiro hame ati to golon. ²¹ golon. Hewak itai nyo? Anyar attu naŋ ta hatai ta hali kuyya to mune iko ta nyalami na taji?