¹ Ajo anaya, abe nayya aremik hiro ta hatai iyya hiyyo illo owuon iko oyiri, ati ero nayya ta hatai iyya hiyyo hullo owuon iko higigilita ino fau, iya era itai idoliaha to Kristo. ² Etimata nayya itai to lee, abe ara ŋiria nologol, tahati ebe itai ewak, hata inyania olobe itai adaha ŋiria. ³ Nyo helerasa itai iko higigilita inno fau. Lo owoun hayini iko ŋalafa to hiji hatai, ebe mahu itai ewuon iko higigilita inno wan? Ebe mahu itai elot iyya hiyyo? ⁴ Nyo ojo lobo hijo ejufa naya Paulo, ojo hidofe lobo ojo nayya Apolo, ebe iso itai ara iyya hiyyo illo fau? ⁵ ŋai ati Apolo? Ojo ŋai hidofe Paulo? Ara iyyohoi hegiamak hidofe egiama iyyohoi to wati te innohoi iyya esio Habu to hohoi ojo to hitiyenita innohoi eruk itai. ⁶ Edula ifa nayya ojo Apolo ejuho hifioŋ, ati ara Hollum le etibolo isia. ⁷ To nia obe hitihabuo owuon to hedulani, kuya hidofe to lia hejuhoni ho hifioŋ, ati owuon to Hollum lia etibolo isia. ⁸ Iyyania hedulani iko hejuhoni ho hifioŋ egiama nobotie, ojo iso isia daŋ omoju idumuti innohosie to higiama nohosie. ⁹ Ara iyyohoi hegiamak ilo Hollum. Era itai mana no Hollum, itai haji no Hollum. ¹⁰ Iyya esio Hollum hamehini ta hanaŋ, ara ifa nayya ahaduhoni le etiarak hitieri no ohitiir, ojo lobo atta aduhok to hide honyie. Ati itai hiyyo daŋ ihuma riŋa hijo efu iso itai eduhok to hide honyie. ¹¹ Nyo obe lobo tuŋani oremik aduhok hitieri no ohitir aracie nafa oduhohini. Ara ifa Yesu Kristo iyya hitieri no ohitiir. ¹² Iyania loduhok lobo tuŋani to hide holohitiir to yeli, kuyya to bilet, kuyya to honoron hunna opipiak kuyya to bau, kuyya to hujuti, kuyya to bahala. ¹³ To holoŋ hoŋoto oliew iso ilibiti inno higiemita inno hiyyo, oliew iso isia to hima, nyo ociem iso hima higiemita inno hiyyo nobotie nobotie harriŋari hijo ara iso isia iyya nyo. ¹⁴ Kuyya arasa higiema nolobo tuŋani le egiama tohide ho lohitir hitieri omoju iso inyia idumut. ¹⁵ Kuyya lasuwahari higiama no lobo tuŋani olita iso idumut nohonyie, ati etilohini iso inyia to hima. ¹⁶ Holobe itai eyyen hijo ara itai haji no Hollum ojo hidofe Oyiri no Hollum amanya ta hatai? ¹⁷ Letattur lobo tuŋani haji no Hollum, etattur iso Hollum inyia. Nyo olibo haji no Hollum ŋai ati itai. ¹⁸ Hotobiaŋa lobo tuŋani enyieb wan nohonyie. Kuya egigilo lobo to hiji hatai hijo elefere taŋasi hunna, isiara inyia hatara lobolit. ¹⁹ Erifaha ofioroho inno fau inna to honyehite inno Hollum. Nyo egiorohini hijo, "Enief inyia leferejok to ofioroho innohosie. ²⁰ Egioro hidofe hijo, "Oyyen Habu higigilita inno leferejok hijo ara isia asai.'' ²¹ To nia hotobiaŋa lobo tuŋani etidara to hiyyo! Nyo esio Hollum hirro daŋ innahatai, ²² Kuya inyia Paulo iko Apolo ojo Kefas, kuya fau daŋ iko wuaran ojo ye iko hirro hunna iyyania, kuyya hido inno afanu iso, ara isia daŋ innahatai, ²³ era itai Kristo, ojio Kristo ara Hollum.