¹ Ohut anjelo etamieti aforojo honyi bwo egonyu ni elelyef on odou t’edou ifau bwo isyori jihonyi eŋanyit ono ewure on obeŋ iko esidi. ² Ette inyi ŋa ewure ania bwo odok afuro teyya ihwa eema hiti. Itiryok afuro ania oloŋ iko oyyami. ³ Ottu namaa to furo ania ifau bwo isyori jihosi adwaran ihwa eŋorit hitoni. ⁴ Bwo fe iramani jihosi jo oŋida isi obeŋi itarrohoji amiyaŋ otto fau kuyya erre hun isuruni’to, kuyya bu ayyani. Oremehini isi itarroho laati hama hul obeŋi’to iko aridinyi ono Hollum to homomite hosi. ⁵ Obeŋ adwaran jihosi ittohyere laati ati ittigemye isi laati ta adyaha on obolo bebe ta ayafajin miet. Bwo ara adyaha hosi ihwa eŋorit hitoni. ⁶ To oŋitek hunia ottifyai adi laati naye ati obeŋi isi onyurani, bwo awahi adi isi iyeri ati olito naye jihosi. ⁷ Arai namaa hunia ihwa akusani hun ihuhumani ta arrem. Owoni erre ihosi hosi hun arai ihwa agoryai huno nayyel bwo iyyalarai omomite hosi ihwa laati. ⁸ Owoni isi iko ofir ihwa huno aŋorwo bwo fe iyyalarai alla hosi iko huno elemyo. ⁹ Owoni bwo fe abilat hun ogoli’to bebe isuhyara hosi. Ara netiri ono ewa hosi ihwa atoromilehyen iko akusani arryai hun oŋeri’to irrem. ¹⁰ Owoni amaa hunia iko alisajin ihwa huno atone bwo fe owoni ayilita jihosi. Owon adwaran ilisajin hosi ittigemyere laati ta ayafajin miet. ¹¹ Owon hobu jihosi, inyi anjelo olo ewure on obeŋ iko esidi. Afure honyi te ekyana Ebrei anya Abadon bwo te ekyana Grik anya Apolon on ojo Etatturoni. ¹² Atuhuno arrohoji etabotye. Imijye, bwo ofwonni adi arrohojita arrihai. ¹³ Ohut anjelo etaleji aforojo honyi bwo etaniŋu ni etuk on ottu’to to mwarrak aŋwan huno etityek ono nayyel ottohosyere Hollum. ¹⁴ Ette inyi jaran jyo anjelo etaleji ol owon’to iko aforojo ojo, Ohohi anjelohyen aŋwan hul ifitani iger hari eneittok an anya’to Efarate. ¹⁵ Tania ohohini anjelohyen aŋwan hul itilai te eŋa iko oloŋ bwo asaa honyi on onyimuni ittohyere aŋati etahunihi ono laati. ¹⁶ Etaniŋu ni ehenio ono oseŋer hul adahai’to ta akusani, arai isi alif ’tomon enyyahita alif ’tomon iko omuk arryai. ¹⁷ Egonyu ni akusani iko hya hul itoŋoi’to ihorwoŋite hosi hul owoni iko alibat hun ibuyai isuhyara hosi; odo obo iko obo an egara, bwo obo ihwa ayyel. Iyyalarai osi kusani ihwa osi lemyo bwo to hutuhye hosi ottu eema iko afuro bwo anahan. ¹⁸ Ottohori aŋati etahunihi ono laati te ettigemita huna hunihoi, isi eema iko afuro bwo anahan, hun ofwonni to hutuhye kusani. ¹⁹ Owon adwaran ihutuhye kusani iko ilisajin hosi. Arai alisajin hosi ihwa amunok hun owoni iko osi hun itarrohojye’to laati. ²⁰ Ati laati hul obeŋi ottohori te ettigemita hunia, ihari isi iloicere atajya hosi addi to hirre hun ihuhumani isi ta ahas hosi. Ihari abusana etahabuyo ono ajok, iko arrijorihyen hun ihuhumani ta nayyel, ta abilat, ta amorwoi, iko ta neyyek. Obeŋi arrijorihyen hunia omijye, bwo obeŋi isi itaniŋye, obeŋi bu adahai. ²¹ Ihari isi iloicere atajya hosi addi jyo ettohiti hosi, amurotye hosi, esomiti hosi, iko jyo ahoholita hosi.