¹ Egonyu ni anjelo obo ol ogol bebe isuri t’edou. Ilurok edis inyi ihwa aboŋo bwo fe owon atolohe ihou honyi. Iyyalaro omom honyi ihwa oloŋ bwo arai ejek honyi ihwa eema on owulo’to. ² Inef inyi abuk on omuta’to bwo aŋa ihani honyi. Oryehi inyi eju iŋet honyi ihari bwo eju ihorroŋ ilotifor. ³ Okwat neloŋo honyi bebe ihwa elemye al amala’to. Illilloŋo inyi ette etitta hide hattarik itir. ⁴ Al itiri etitta hide hattarik ajo ni egyoro, ati etaniŋu ni etuk t’edou ojo, Idimak erre hun ikyanai etitta hide hattarik, hegyoro isi. ⁵ Ihalamak anjelo odwo egonyu ni owotya ihari iko ilotifor aani honyi idou, ⁶ ette inyi illama to lya al isu’to fur; inyi lya ol oyyeu’to edou iko erre daŋ hun owoni’to dia, oyyeu inyi bwo fe afau iko erre honyi daŋ, oyyeu inyi aari iko erre honyi daŋ. Ojo inyi attuba asaa nyo ⁷ to noloŋ on ohut adi anjelo etahattarihi aforojo honyi itafutani adi erre hunya idimani huno Hollum ihwa itahutak nya inyi jyo apiti honyi leyak sayyo. ⁸ Inyyak etuk odwo etaniŋu ni t’edou ikyana jihoŋ ette jaran, Owon abuk an aŋa’to ihani anjelo ol owotya ihari iko ilotifor; ilo, iduhu inyi. ⁹ Ette ni leten jyo anjelo ette mojo jihonyi abuk on omuta’to. Ojo inyi jihoŋ, Hibe, olumok abuk ana. Ofifil adi inyi to hutuk hoi ihwa nesyo ati odwa adi inyi to hohe hoi. ¹⁰ Efwotu ni abuk to hani anjelo ette lumonia inyi. Ofifil inyi bebe to hutuk hoŋ ihwa nesyo, ati adilo ni inyi odwa inyi to hohe hoŋ. ¹¹ Attati isi jaran jihoŋ jo, Oŋida inyyak iye ikiluna to olobyehyen arryai, ta afauhyen, ta nekyanita wati daŋ gele gele iko to hobwok.