Angati 8

1 Ihwania laŋa inyi arodonyi etahattarihi odwahinie erre daŋ hutte dou ta anus saa. 2 Egonyu ni anjelohyen hattarik hul owotyai ihosyere Hollum bwo fe isyori jihosi aforojohyen hattarik. 3 Ottu anjelo obo ette wotya iger itityek bwo owon inyi iko akos an ara ayyel bwo isyori jihonyi ottogoŋ iharwahiniere iko emojiti liborok hutto hide tityek on orrohini ta ayyel on owon’to ihosyere kurus. 4 Iharutoi emojiti liborok iko ottogoŋ ette afuro hosi dahan to hani anjelo jyo Hollum. 5 Attati anjelo iduhuna akos ette itafutana inyi iko eema otto tityek ette lwahara inyi afau. Teyya teyya owon etitta hide iko nekyanita iko emedehita hilai bwo ekikiro fau. 6 Ihwania owoni anjelohyen hattarik iko aforojohyen hosi hattarik bwo itterye isi ahuta. 7 Ohut anjelo etabotye aforojo honyi bwo fe ilwahari ifau afalaŋa iko eema hun iharutoi’to iko nooto, ette aŋati etahunihi ono afau swaharo iko aŋati etahunihi ono ayyanio, oswaharo bwo fe amiaŋ daŋ. 8 Ohut anjelo etarrihi aforojo honyi bwo ibironi ihari obo ariŋ an ara’to ihwa adoŋe on owulo’to, ette aŋati etahunihi ono aari rahan ahoto. 9 Oye aŋati etahunihi ono aham hun isui’to hun owoni’to ihari bwo fe itatturi aŋati etahunihi ono ababuri. 10 Ohut anjelo etahunihi aforojo honyi ette elelyef on obolo’to bebe on owulo’to ihwa arwa douna t’edou. Odohi inyi jyo aŋati etahunihi ono aryak iko olotilihi. 11 Anya afure elelyef ania Hiyyeri ette aŋati etahunihi ono aryak rahan ahiyyeri bwo oyei laati arryai hul amatai’to aari hwa nyo odwari isi. 12 Ohut anjelo etaŋwani aforojo honyi bwo fe itaye aŋati etahunihi ono oloŋ, iko aŋati etahunihi ono ayafa, bwo fe aŋati etahunihi ono elelyefi. Iryohi aŋaco hosi hunia; iryok aŋati etahunihi ono oloŋ bwo fe ono attari. 13 Amijo ni bwo etaniŋu ni akilir an idarra’to idou an amala ojo, Orroho, orroho, orroho adi bebe jyo laati hul amanyai’to ifau al ohutai anjelohyen hunihoi hul arasai’to.