¹ Ihalu erre hunia egonyu ni anjelohyen aŋwan hul owotyai’to jyo aŋaco aŋwan huno afau bwo inefi isi oyyami hutto ŋaco aŋwan huno afau, jo oŋida oyyami obeŋ ohuco ifau, kuyya ihari, kuyya bu iyyanio. ² Egonyu ni anjelo obo ol ottu’to t’ettedwoŋi holoŋ ol owon iko aridinyi ono Hollum leswoni. Itakwat inyi etuk honyi ette loŋuna anjelohyen aŋwan hun owoni iko adwaran itarrohojyere afau iko aari: ³ ette jaran jihosi ojo, Hetarrohojata afau kuyya aari, kuyya bu ayyanio many eridinyaniere hohoi apiti hulo Hollum hohoi aridinyi ihomomite hosi. ⁴ Etaniŋu ni ehenio huno hya hul oridinyi, arai isi alif esiha abotye iko atomwana aŋwan haŋwan. Oridinyuni isi to woi Israele daŋ; ⁵ alif ’tomon harrihai to woyo Yuda; alif ’tomon harrihai to woyo Rubena; alif ’tomon harrihai to woyo Gada; ⁶ alif ’tomon harrihai to woyo Asera; alif ’tomon harrihai to woyo Nafatali; alif ’tomon harrihai to woyo Manasa, ⁷ alif ’tomon harrihai to woyo Simeona; alif ’tomon harrihai to woyo Levi; alif ’tomon harrihai to woyo Isakara; ⁸ alif ’tomon harrihai to woyo Sebuluna; alif ’tomon harrihai to woyo Yosefo; alif ’tomon harrihai to woyo Benjamino. ⁹ Ihalu erre hunia egonyu ni eluluŋ wati arryai bwo ittallik obo atulo ihenuna isi. Ottubanie isi to fauhyen daŋ, to woi wati daŋ, to lobyehyen daŋ iko t’ekyanita wati daŋ gele gele. Attati isi wotya ihosyere kurus iko ihosyere Lonyo ker. Iyyafani isi aboŋojin hun obwori bwo fe iniafatie isi atanata ’yanio ihas hosi. ¹⁰ Iwuwoŋitai isi on okwat bebe ette jaran, Ottu etalahuna jyo Hollum hohoi al itoŋo’to ikurus bwo fe iko jyo Lonyo ker. ¹¹ Owotyai anjelohyen daŋ iger kurus bwo fe iger marwak iko eyyeti aŋwan hun isui’to, attati isi ruboho ihosyere kurus ette itahabuyo Hollum, ¹² ette jaran, Amen. Ijara amuno iko akwatan, ofyoro, ahumo, etahabuyo, adwaran bwo fe agolon hatawana jyo Hollum hohoi fur tulaŋ. Amen. ¹³ Efiyo ani obo amarwani ojo, Haŋai hulo hul iyyafani’to aboŋojin hun obwori bwo ofwonni isi tai? ¹⁴ Ajo ni jihonyi jo, Hobu, imijak iye. Ette inyi jaran jihoŋ ojo, Ofwonni hulo t’ettigemyo on obolo bebe bwo fe illillai isi aboŋojin hosi italiboryere isi to nooto ono Lonyo ker. ¹⁵ Tania owoni isi ihosyere kurus Hollum bwo fe igyamai isi jihonyi ihaji honyi ta afanni iko ta arwe daŋ. Imuhok adi lya al itoŋo’to ikurus isi ta abali honyi. ¹⁶ Obeŋi adi isi inyyahi niama, kuyya bu ibwotoi, obeŋ adi oloŋ oswak isi kuyya bu obo anahan. ¹⁷ Ara adi Lonyo ker ol owotya’to ihosyere kurus aheyyahani hosi bwo fe orihoro adi inyi isi jyo olotilihi huno naari hun isui’to. Bwo fe ifufuso adi Hollum neyyo daŋ addi to hoŋite hosi.