¹ Egonyu ni Lonyo ker al aŋayo arodonyi etabotye jyo huno hattarik bwo fe etaniŋu ni eloŋo ono eyyet abotye tehiji eyyeti aŋwan hun isui’to. Ara eloŋo honyi ihwa etitta hide on ojo, Waŋ. ² Amijo ni bwo egonyu ni akusan on obwor bwo inef lya al itoŋo’to ihorwoŋ honyi narraŋ. Isyori jihonyi egorya iyyafaniere ihou bwo olo inyi iyyalari laati. ³ Enyyak ni igonyuna inyi aŋayo arodonyi etarrihi ette ni itaniŋuna eyyet etarrihi an isu’to on ojo, Waŋ. ⁴ Ottu akusan obo on odo. Isyori adwaran jyo lya al itoŋo’to ihorwoŋ honyi iyari nelik tajya addi to fau jo oŋida laati ottohye illarak hosi bwo isyori jihonyi ademi eneittok. ⁵ Aŋa inyi bwo fe arodonyi etahunihi ette ni itaniŋuna eyyet etahunihi an isu’to on ojo, Waŋ. Bwo egonyu ni akusan en emoli bwo inef lya al itoŋo’to ihorwoŋ honyi ekemit ihani honyi. ⁶ Etaniŋu fe ni obo etuk ikyana ihiji eyyeti aŋwan hun isui’to ojo, Inyyaŋai arotol abotye ono ema ta arobia abotye, bwo fe inyyaŋai arotol hunihoi huno aful ta arobia abotye ati hetarroho eyali kuyya bu aari ajalaŋi. ⁷ Aŋa inyi arodonyi etaŋwani ette ni itaniŋuna eyyet etaŋwani an isu’to ojo, Waŋ. ⁸ Bwo egonyu ni akusan an iryok’to kai, bwo anya afure ono lya al itoŋo’to ihorwoŋ honyi Naye, bwo ijifatyo Hadese ehalu honyi. Isyori adwaran iko elaballok jihosi jyo aŋati etaŋwani ono afau ittohyere laati ta afere iko ta ahure, te eŋwati iko ta acaŋi hun ifiriwaji’to hutta fau. ⁹ Aŋa inyi fe arodonyi etamiete ette ni igonyuna iwoyo itityek laati hunya ottohori ta neruk hosi jyo nekyana Hollum, bwo fe te etamijana hosi erre huna. ¹⁰ Oyyoi isi on okwat ojori, Hobu hohoi, leittok, ololibo iko elahode, baya adi iŋot iye bwo inienu laati hul amanyai’to ifau ta attohoro hosi hohoi? ¹¹ Attati isyarana jihosi daŋ ababo aboŋojin hun obwori, bwo ojori jihosi jo oŋida isi odihuni kai many ottubanierek apiti hunya igyamai’to ikosi bwo illarak hosi, nyo ottohori adi bwo fe isi ihwo nya. ¹² Aŋa inyi arodonyi etaleji ette ni igonyuna afau ikikiro bebe nyo iryok oloŋ ihwa aboŋo en emoli bwo odo ayafa ahoto. ¹³ Okwahunie elelyefi hutte dou ifau, ihwa odouni aŋer ŋaboli hun hobeŋi’to odori al ohuco oyyami on obolo’to. ¹⁴ Itabuhoni edou ihwa aboŋo on obubunani, bwo ihuti adonyok daŋ iko nafuli daŋ addi to masik hosi. ¹⁵ Attati hobwok hulo afau iko eleittaha bwo eleittaha oseŋer idimana ahwattek hosi inomi iko ihiji morwoi hutto doŋyok. Idimai bwo fe abarak bwo olottiri bwo laati daŋ hul arai apiti iko hul obeŋi’to ipitoi. ¹⁶ Illilloŋoi isi jyo adoŋyok iko amorwoi ojori, Okwahuniete ihwattek hohoi bwo idimana hohoi to homom lya al itoŋo’to ikurus iko to jore ono Lonyo ker; ¹⁷ nyo afany oloŋ ono najore hosi bwo, ŋai adi oremik wotya?