¹ Ihalu erre huna egonyu ni abuk ihani iŋet ono lya al itoŋo’to ikurus, inyi abuk an igyoro itwa iko ihorwoŋ honyi bwo ihyana inyi ta arodonyita hattarik. ² Egonyu ni anjelo olottir al ikyana on okwat ojo, Ŋai ol osiru’to iŋayere abuk iko arodonyita honyi hattarik? ³ Bwo obeŋ obo atulo te dou kuyya to fau kuyya bu towoyo fau oremik ŋa abuk dwadi bu imijyere inyi. ⁴ Ayyo ni bebe nyo obeŋi onyurani obo ol osiru iŋayere abuk kuyya bu imijyere inyi. ⁵ Attati amarwani obo jaran jihoŋ ojo, Heyyo, imijye Elemye otto woyo ba Yuda, inyi Addeti olo Davide, iyyala inyi erre daŋ tania oremik inyi ŋa abuk iko arodonyita honyi hattarik. ⁶ Bwo ihiji kurus iko eyyeti aŋwan hun isui’to egonyu ni Lonyo ker ol owotya iger marwak. Ara inyi ihwa aker ol ottohori te ehuma bwo owon inyi iko amwarrak hattarik bwo oŋite hattarik hun arai’to oloyirihyen hattarik hulo Hollum hul ifahini ifauhyen daŋ. ⁷ Ottu inyi iduhuniere abuk to hani iŋet ono lya al itoŋo’to ikurus. ⁸ Al iduhu inyi abuk orubohoi eyyeti aŋwan hun isui’to iko amarwak atomwana arrihai haŋwan ihosyere Lonyo ker. Owoni isi daŋ ababo iko adori bwo asahani hun ara’to ayyel hun ifuti iko arya hun arai’to emojiti huno aati Hollum. ⁹ Ette isi dolo afure aŋejuk ojori, Isiru iye iduhuniere abuk, Bwo iŋayere arodonyita honyi hattarik Nyo ottohori nya iye bwo fe ta nooto hoi Inyyaŋak iye aati jyo Hollum. Ofwonni isi to woi wati daŋ, t’ekyanita wati daŋ gele gele, to lobyehyen daŋ iko to fauhyen daŋ. ¹⁰ Ihuhumak iye isi olobye iko ehumak hulo Hollum hohoi Bwo itamanyaye adi isi laati hutta fau. ¹¹ Amijo ni bwo etaniŋu ni edolita anjelohyen arryai hul ikoloni akurus bwo eyyeti hun isui’to iko amarwak. Arai isi alif ’tomon bwo omuk arryai, arryai. ¹² Ikyanai isi on okwat bebe ojori, Osiru Lonyo ker linya ottohori Ifwotuniere adwaran iko ebariti, ofyoro, agolon, Etahabuyo, akwatan iko namuno. ¹³ Etaniŋu ni bwo fe nekyanita huno neyyeti daŋ hun owoni’to idou iko ifau, bwo fe hun owoni’to iwoyo fau iko erre daŋ hun owoni’to ihari ojori, Ijara amuno iko etahabuyo, akwatan iko adwaran Hatawana jyo lya al itoŋo’to ikurus Bwo fe jyo Lonyo ker fur. ¹⁴ Ette eyyeti aŋwan hun isui’to jaran, Amen. Orubohoi amarwak ifau itahabuyere lya al amanya’to fur.