¹ Ihalu erre huna egonyu ni edou aŋejuk iko afau aŋejuk nyo atuhunie edou iko afau etterita. Atuhuno bwo fe aari eneittok. ² Egonyu ni amiji on odwa’to inyi Yerusalem aŋejuk an isuru t’edou jyo Hollum. Olibo inyi ihwa odwoti an ilaman an itila habi honyi. ³ Etaniŋu ni etuk on okwat bebe to kurus on ojo, Imijye, owon aji ono Hollum ihiji wati bwo amanya adi inyi ikosi. Arai adi isi awati honyi bwo itoŋo adi inyi ta ahwan honyi ikosi ette inyi rahan a Hollum hosi. ⁴ Ifufus adi inyi neyyo daŋ to hoŋite hosi. Obeŋ adi naye inyyak wanan. Bwo fe obeŋi adi laati inyyahi tariha kuyya bu oyyoi bwo fe obeŋi omijani adyaha, nyo allaŋi erre etterita. ⁵ Ojo lya al itoŋo’to ikurus ojo, Imijye, etaŋejuk ni erre daŋ. Ojo inyi bwo fe ojo, Igyoroi, nyo oyiji nekyanita huna bwo fe arai isi ahode. ⁶ Ojo inyi bwo fe jihoŋ, Atuhunie erre daŋ. Ani Alafa iko Omega, ani etteri iko esidi. Esyo adi ni jyo lya al iboto’to aari asai. Isi aari hun oŋeruni to tilik ono nesu. ⁷ Lya al iyyala’to ara adi aharutani hirre hunia bwo fe ara adi ni a Hollum honyi bwo inyi olonyi hoŋ. ⁸ Ati ta laati hul abaŋi’to bwo hul obeŋi’to iruhi, iko arrohojak, lattok, asomok, amurok, etahabwok ’rijorihyen iko agesemok daŋ; owon adi amaji hosi iwure ono eema on owulo’to an ara’to naye etarrihi. Yerusalem Aŋejuk ⁹ Ihalu erre huna ottu anjelo abotye olo hulo hattarik hunya owoni iko asahani hattarik hun ifuti iko ettigemita hattarik esidita. Ette inyi ikyana jihoŋ ojo, Waŋ dini bwo etahutak adi ni iye odwoti an ara’to aŋotte Lonyo ker. ¹⁰ Attati inyi iyaro ani to Oloyiri jyo adoŋe on obolo bwo fe ohodo, bwo itahutak inyi jihoŋ amiji on odwa’to, inyi Yerusalem an isuru’to t’edou jyo Hollum. ¹¹ Owon inyi iko akwatan ono Hollum. Afaŋ inyi bebe ihwa onoro on opipyak’to on ogol te enyyaŋa bwo opipyak ihwa amiraya. ¹² Owon inyi iko ohitir on obolo bwo ohodo, bwo fe owoni ekatin ’tomon harrihai iko anjelohyen hosi ababo. Igyoroni afureta dia huno awoi wati ’tomon harrihai hulo lonyirok Israele. ¹³ Ta aŋati edwoŋi holoŋ owoni ekatin hunihoi; ta aŋati ottowor owoni ekatin hunihoi; ta aŋati ottohide owoni ekatin hunihoi; ta aŋati eddorro holoŋ owoni ekatin hunihoi. ¹⁴ Owoni awoi ’tomon harrihai ilohitiri miji. Igyoroni dia afureta ’tomon harrihai huno lefahat ’tomon harrihai hulo Lonyo ker. ¹⁵ Owon jyo lya al ikyana’to jihoŋ ekemit ono nayyel ikemyere amiji iko ekatin honyi bwo fe ohitiri. ¹⁶ Ara ahodori honyi ihwa alatan honyi. Okemyo inyi amiji te ekemit bwo arai amail honyi esiha ’tomon homiet. Bwo fe orrijori ahodori honyi iko alatan honyi. ¹⁷ Okemyo inyi olohitiri bwo ara ahodori honyi ayardahyen atomwana hattarik harrihai te ekemit ono atulo an ara’to ekemit an ikemyere anjelo. ¹⁸ Oduhoni ohitiri honyi ta amorwoi hun opipyahi’to bwo fe oduhoni amiji ta nayyel on olibo’to bwo fe opipyak ihwa amiraya. ¹⁹ Itilamani awoi lohitiri miji to onoroi arryai hun olufaji, hun opipyahi’to bwo fe ogoli te enyyaŋa. Opipyak onoro etabotye ihwa amiraya, ara etarrihi emoli, ara etahunihi aboŋ, ara etaŋwani egara on opipyak’to, ²⁰ obwor etamieti iko aŋati honyi en emoli, ara etaleji aryet, ara etahattarihi asura, ara etahottohunihi egara, ara etahottoŋwani asura kai, ara etattomoni egara kai, ara etattomoni habotye emoli on opipyak’to, ara etattomoni harrihai emoli an afaŋ’to ihwa akarajaja. ²¹ Arai ekatin honyi ’tomon harrihai onoroi ’tomon harrihai hun obwori. Ihuhumi ekatin daŋ to onoroi ababo. Ara ekoi miji ayyel on olibo’to an afaŋ ihwa akarajaja. ²² Abeŋ ni egonyu obo aji imojit imiji ania nyo Hobu Hollum Adwarani al agalik’to daŋ iko Lonyo ker arai isi aji imojit honyi. ²³ Obeŋ amiji ania awak afaŋan ono oloŋ kuyya bu ayafa nyo ara akwatan ono Hollum afaŋan honyi bwo ara Lonyo ker allomo honyi. ²⁴ Adahai adi laati hutta fauhyen ta afaŋan honyi bwo iyaunie hobwok hutta fauhyen akwatan hosi dia. ²⁵ Ta afanni obeŋi adi ihyanani ekatin miji ania bwo fe obeŋ obo arwe teyya. ²⁶ Iyaŋunie adi akwatan iko etahabuyo huno olobyehyen jyo amiji ania. ²⁷ Bwo fe obeŋ adi obo al ibot’to ojiŋak dia, kuyya bu lya al ihanio’to on orroho bwo fe ogesem. Ati ojiŋani adi hya hama hul igyoroni ibuk ono nesu ono Lonyo ker.