¹ Egonyu ni anjelo isuru t’edou ol owon iko eŋanyit bwo aririk on obolo’to ihani honyi. Ara inyi eŋanyit ono ewure on obeŋ iko esidi. ² Inef inyi amunu inya owon’to beryen, inyi bwo fe etisyahani iko Sitan, ette anjelo ifitana inyi ta aŋasi alif abotye. ³ Ibirok anjelo inyi iwure ihyanari bwo igafulok inyi ewure jo oŋida Sitan obeŋ inyyak inyobyo laati hutta fau many ottubarik aŋasi alif abotye. Ihalu aŋasi hunia obusuni adi inyi ta asaa kai. ⁴ Egonyu ni akurusi iko laati hul itoŋoi’to dia hul owoni iko adwaran iŋocere laati. Egonyu ni bwo fe laati hunya oŋuti osi hosi ta neruk hosi jyo Yesu, bwo fe ta nekyanita Hollum. Isi hya hunya obeŋi’to itahabuye acaŋ iko arrijori honyi bwo obeŋi isi ifwotuni aridinyi honyi ihomomite hosi, dwadi bu ihas hosi. Inyyahi isi isu bwo ilettohi iko Kristo ta aŋasi alif abotye. ⁵ Ara ana nebuhuna etabotye. Obeŋi adi omuk layak inyyahi ibuhuna many ottubarik aŋasi alif abotye. ⁶ Ijara hulya hul ibuhuni’to ta nebuhuna etabotye hotomunohi. Obeŋ naye etarrihi owon iko adwaran jyo hulya, ati arai adi isi ehumak hulo Hollum iko Kristo bwo fe ilettohi adi isi ikonyi ta aŋasi alif abotye. ⁷ Al ottubai aŋasi alif abotye obusuni adi Sitan to babus honyi. ⁸ Ojiŋu adi inyi inyobyere olobyehyen wati daŋ hutta fau hul owoni iŋaco aŋwan huno afau hun iloŋoi Gog iko Magog ittuttubaniere isi irryomoniere. Ara ehenio hosi ihwa asuluŋayo otto otifor hari. ⁹ Ofwonni isi to fauhyen daŋ ikoloniere amaji ono aati Hollum iko amiji en emuno hohoi. Ati odou eema t’edou itatturyere isi. ¹⁰ Ibironi etisyahani al inyobyo’to isi iwure ono eema on onok’to bebe. Owon bwo fe acaŋ dia iko ebwanani lenyabani. Ittigemye adi isi bebe bebe ta afanni iko ta arwe daŋ fur fur. ¹¹ Ihalu egonyu ni akurus on obolo bwo fe obwor bwo fe egonyu ni lya al itoŋo’to dia. Olitohini afau iko edou to homom honyi bwo abeŋ obo amaji tesi. ¹² Egonyu ni bwo fe layak wati; omuk hul eittaha, bwo fe omuk awati asai hul owotyai ihosyere kurus attati Hollum ŋa abuhi. Aŋai bwo fe abuk obo an ara’to abuk ono nesu. Oŋoti layak te erre hun igyoroni ibuhi ihwa osiruni ehanita hosi. ¹³ Ofwonni layak addi to hari, bwo fe ofwonni isi to ye iko to Hadese, bwo fe oŋoti laati daŋ ababo te ehanita hosi. ¹⁴ Attati ibironia naye iko Hadese iwure ono eema. Ara ewure ono eema ana naye etarrihi. ¹⁵ Laati daŋ hul obeŋi afureta hosi igyoronie ibuk ono nesu ibironi isi iwure ono eema.