¹ Ihalu erre hunia etaniŋu ni etuhe huno eluluŋ wati arryai hutte dou ojori, Aleluya. Owon etalahuna iko adwaran bwo akwatan jyo Hollum hohoi; ² Obisi eŋotiti honyi bwo arai isi ahode, Nyo oŋot inyi asomoni eneittok ninya itarroho’to afau te esomiti honyi, Bwo inienu Hollum nooto ono apiti honyi jyo aŋotte ania. ³ Inyyahi isi jaran, Aleluya. Nyo adok afuro ono aswaharo honyi tulaŋ. ⁴ Orubohoi amarwak atomwana arrihai haŋwan iko eyyeti aŋwan hun isui’to ifau ette isi itahabuyo Hollum al itoŋo’to ikurus ette isi jaran, Amen, aleluya. ⁵ Ottu nekyana to kurus on ojo, Isyatta etahabuyo jyo Hollum hohoi itai apiti honyi daŋ, itai hul ibaŋata’to inyi, hul imutarata’to iko hul iboloroto’to. ⁶ Bwo etaniŋu ni etuhe huno eluluŋ wati arryai hun arai ihwa etiri haryak arryai iko etitta hide ojori, Aleluya, nyo ara Hobu Hollum hohoi Eleittok bwo fe Adwarani al agalik’to daŋ. ⁷ Ijara hohoi ewon iko amuno on obolo bebe bwo fe esyo akwatan jihonyi. Nyo attu asaa an ayamari Lonyo ker bwo ihuhum aŋottea honyi ahwan honyi. ⁸ Iyyafak aŋotte aboŋo an ilaman, on opipyak bwo fe olibo. Itahutak aboŋo honyi ehanita hun obisi’to huno aati Hollum. ⁹ Ette anjelo ikyana jihoŋ ojo, Igyoroi, ijara hya hul iloŋuni jyo alomone ono Lonyo ker hotomunohi. Ojo inyi bwo fe jihoŋ, Nekyanita Hollum huna ahode. ¹⁰ Aruboho ni ifau ihosyere hejek honyi itahabuyere inyi. Attati inyi jaran jihoŋ, Hehanio ihwania nyo ani apit ihwa iye iko illarak hoi hul owoni’to iko etamijani ono Kristo. Itahabuye Hollum. Nyo ara etamijani ono Yesu ihwa ekiluna ono erre hun ofwonni’to. ¹¹ Imijye, egonyu ni edou aŋa, bwo ottu akusan on obwor teyya bwo ifurani lya al itoŋo’to ihorwoŋ honyi Olobijo iko Lahode, bwo ta abisan oŋot inyi bwo irrumita inyi. ¹² Arai oŋite honyi ihwa aŋadyefa hima hun owulori’to bwo owoni agoryai arryai ihou honyi. Igyoroni afure jihonyi on obeŋ tulo omijak arari inyi hama omijak. ¹³ Iyyafak inyi aboŋo an ibuyai ta nooto, bwo afure honyi anya, Nekyana Hollum. ¹⁴ Ijifatye oseŋer hutte dou inyi hul itoŋoi ikusani hun obwori’to bwo iyyafani isi aboŋojin hun ilamani, hun obwori bwo fe opipyahi. ¹⁵ Ottu ademi on ofi’to to hutuk honyi bwo tenyi agalik adi inyi laati hutta fauhyen, bwo ilettohori adi inyi isi ta agolon. Omoco adi inyi aari ajalaŋi iwure an ara’to ihwa ajore on obolo’to ono Hollum Adwarani al agalik’to daŋ. ¹⁶ Igyoroni afure iboŋo honyi iko ilohuya honyi on ojo, Hobu al agalik hobwok daŋ bwo Eleittok al agalik eleittaha daŋ. ¹⁷ Egonyu ni anjelo owotya iholoŋ ette inyi iloŋo on okwat jyo aheny hun idarrai’to idou ojo, Ifwanna, ottubaniete arabotye jyo akarama on obolo’to ono Hollum. ¹⁸ Ifwanna iŋiyete ahiri hwattek hobwok, ahiri hwattek leittaha oseŋer, ahiri hwattek wati hul obolori’to, ahiri hwattek kusani iko laati hul itoŋoi’to ihorwoŋitek hosi, ahiri hwattek wati daŋ hul ifitani iko hul obeŋi ifitani, ojo bwo fe hul omutari iko hul obolori. ¹⁹ Egonyu ni acaŋ iko hobwok hulo afau iko oseŋer hosi. Ottubanie isi irryomoniere iko lya al itoŋo’to ikusan iko oseŋer honyi. ²⁰ Attati isi inef acaŋ iko ebwanani enyabani linya ihanio’to etamijanita ihosyere caŋ inyobyere laati hul ifwotuni aridinyi honyi iko hya hul itahabuye’to arrijori honyi. Ibironi isi arrihai iwure ono eema leswoi; owulo eema ania bebe bwo fe onok. ²¹ Ottohori laati hul arasai’to ta afere ono lya al itoŋo’to ikusan, inyi dwo afere on ojiŋu’to to hutuk honyi. Attati aheny ifoŋ ta ahiri hwattek hosi.