¹ Ihalu erre huna itahutak anjelo ani olowore hari huno nesu hun opipyahi’to ihwa amiraya. Ottu inyi to kurus Hollum iko Lonyo ker, ² ette ŋetyo ettehiji hikoi miji an alat’to. Ta aŋati ana iko tole owon ayyani ono nesu on oŋiju aŋer ’tomon harrihai hun olufaji, bwo oŋiju inyi ayafajin daŋ. Oremehini abene ’yani ania itaŋida eŋwati wati hutta fauhyen. ³ Obeŋ obo arrohoji teyya ati owon akurus Hollum iko ono Lonyo ker imiji ania. Itahabuye adi apiti honyi inyi. ⁴ Igonyuni adi isi omom honyi bwo igyoroni afure honyi ihomomite hosi. ⁵ Obeŋ obo arwe inyyak wanan dia bwo fe obeŋi laati awahi afaŋan ono allomo kuyya bu ono oloŋ nyo itafaŋ adi Hobu Hollum jihosi bwo ilettohorik adi isi fur fur. ⁶ Ojo inyi jihoŋ jo, Obisi nekyanita hunia bwo fe arai isi ahode. Ifak Hobu anjelo honyi itahutaniere jyo apit honyi erre hun ofwonni adi ihalu kai. Hobu alya inyi Hollum olo eyak sayyo. ⁷ Imijye, attu adi ni kokwak. Ijara lya al ogotyere’to nekyanita huttotwa buk ana hotomunoi. ⁸ Ani Yoane alya al etaniŋu’to erre huna bwo fe egonyu isi, ette ni ruboho ihejek anjelo itahabuyere inyi linya itahutak’to erre hunia jihoŋ. ⁹ Ojo inyi jihoŋ, Hehanio ihwania. Nyo ani apit ihwa iye iko illarak hoi eyak sayyo, bwo hya hul ogotyerek’to nekyanita huno abuk ana. ¹⁰ Ojo inyi bwo fe jihoŋ ojo, Hemwanak nekyanita huno ekiluna huttotwa buk ana, nyo ilyaha asaa an itasirunierek adi isi. ¹¹ Lya ol orroho’to ijara inyi odulo ihanio arrohojita. Lya al ibot’to ijara inyi odulo ibot. Lya ol obis’to ijara inyi odulo ihanio abisan. Lya ol olibo’to ijara inyi odulo itoŋo ol olibo. ¹² Imijye, attu adi ni kokwak bwo fe eyauno ni edumiti idumari jyo laati ababo ihwa osiruni ehanita hosi. ¹³ Ani Alafa iko Omega, ani losyere iko lehalu, ani etteri iko esidi. ¹⁴ Ijara hya hul illillai aboŋojin hosi hotomunohi nyo osiru jihosi ifwonniere jyo ayyani ono nesu bwo oremehini isi jiŋana ekatin miji. ¹⁵ Owoni aŋohe ilet iko amurok, asomok, attok, etahabwok ’rijorihyen, iko laati daŋ hul omunoi agesemita bwo ikyanarik tesi. ¹⁶ Ani Yesu alya al efak’to anjelo hoŋ jihoi itahutaniere erre hunia jihoi ihiji klesyahyen. Ani Addeti olo Davide, ani bwo fe lonyi honyi. Ani bwo fe elelyef otto taŋatyo motye an afaŋ’to bebe. ¹⁷ Ojo Oloyiri, Ijara inyi hettu; bwo odwoti an ayamai adi ojo, Ijara hettu. Ijara lya al itaniŋu’to hejara, Waŋ. Ijara lya al iboto’to hetettu dini bwo fe lya al awak’to ijara inyi hatamata naari huno nesu ta abyaŋan idumit. ¹⁸ Eramyo ni laati daŋ hul itaniŋuni’to nekyanita huno nekiluna huttotwa buk ana jo, kuyya ofonik obo atulo omuk erre jyo nekyanita hunia, ofonik adi bwo fe Hollum jihonyi ettigemita hun igyoroni ibuk ana; ¹⁹ kuyya bwo fe iya obo atulo omuk nekyanita addi huno nekiluna huttotwa buk ana, iya adi Hollum aŋati honyi addi to ’yani ono nesu iko to miji on odwa’to;b isi erre hun igyoroni ibuk ana. ²⁰ Ojo lya al ikyana’to erre huna jo, Ahode, attu adi ni kokwak. Amen. Waŋ Hobu Yesu. ²¹ Ijara amehino ono Hobu Yesu hatawana jihatai daŋ. Isi hunia.