¹ Hojiŋu Yesu ette inyi igonyuna atulo ol oŋodo’to many t’esiuniere. ² Ifiye leyiyanak inyi ojori, Hettiyanani, ŋai nya iyyau, atulo olo, kuyya esyok honyi an isiunierek inyi ol oŋodo? ³ Itarraŋ Yesu ojo, Ara dwo bu inyi iko esyok honyi obeŋi iyyauni. Idwoŋi erre huna ihwa huna oŋida itahutanierek egyama ono Hollum. ⁴ Oŋida hohoi egyama egyama ono alya al ifahu’to ani hara aholoŋ. Ottu adi attari on obyaŋari tulo igyamari. ⁵ Hawon ni ifau ani afaŋan ono afau. ⁶ Hekyana inyi ette inyi mitana amilak ifau bwo ette nyutuna efwoto ta amilak ette yalana ihoŋite oŋodo. ⁷ Bwo ojo jihonyi, Ilo illillai itafar ono Silom (on ojo ifuhari). Tania olo atulo alya ette illilla oŋite honyi ette cohuno ol omijo. ⁸ Ihwania hutto onyihari honyi hul omijani’to atileŋita honyi ojori, Obyaŋara atulo olo ol otileŋita toloŋi? ⁹ Ojori omuk, Afe, inyi alya. Bwo omuk ojori, Obeŋ, ati iyyalu inyi lya. Ette inyi itarraŋ jo, Ani alya. ¹⁰ Ihwania ifiye isi inyi, Aŋai imijo iye? ¹¹ Itarraŋ inyi ojo, Atulo al anya’to Yesu inyutu efwoto bwo iyalak ihoŋite hoŋ, ette jaran jihoŋ, Ilo illillai itafar Silom. Teyya ette ni leten ette illilla, ette ni itteryo amijo. ¹² Ojori isi jihonyi, Tali inyi? Itarraŋ atulo alya, Abeŋ ni amijak. ¹³ Teyya iyaŋunie isi atulo linya oŋodo’to jyo Farisei. ¹⁴ Ihwania ara nya ta noloŋ sabato inyutu Yesu efwoto bwo isyarak amijo jyo atulo alya. ¹⁵ Teyya itterye Farisei ifiyo atulo alya, Aŋai imijo iye? Ojo inyi jihosi, Ihanak inyi efwoto ihoŋite hoŋ ette ni illillauna bwo ni ette mijo. ¹⁶ Ojori omuk hulo Farisei, Obeŋ atulo olo ottu jyo Hollum nyo obeŋ inyi itadwara efahi ono sabato. Ati ojori omuk, Aŋai ihanio eyyani etamijanita ihwa huna? Tania owon abwanya ihiji hosi. ¹⁷ Inyyahi isi ifiyo oloŋodo, Anyo adi ijo iye tenyi te etaŋidaryo honyi oŋite hoi? Itarraŋ inyi ojo, ara inyi aheyani sayyo. ¹⁸ Obeŋi ati Yudea iruhi jo oŋodo nya inyi ahode bwo inyi ette ifwotuna amijo. Iloŋuni isi esyok tulo ol oŋodo’to. ¹⁹ Ifiye isi ojori, Lonyi hatai olo, al ijatta tai oŋodo nya many t’esyori? Aŋai ati omijo inyi ihwania? ²⁰ Itarraŋi esyok honyi ojori, Emijak hohoi jo lonyi hohoi olo bwo fe isiuni nya inyi ol oŋodo. ²¹ Ati ebeŋ hohoi emijak aŋai omijo inyi ihwania, bwo fe ebeŋ hohoi emijak ŋai isyarak jihonyi amijo. Ifiyete inyi ta ahwan honyi. Obolo inyi, ikyana adi inyi ta ahwan honyi. ²² Ikyanai esyok honyi ihwania nyo abaŋi isi Yudea. Nyo oŋoti Yudea ojori, Al ojo obo jo Yesu inyi Kristo, oŋida ifuhari to haji imojit. ²³ Inyi on ojarik esyok honyi ifiyete inyi ta ahwan honyi nyo abolo inyi. ²⁴ Tania inyyahi Yudea iloŋ atulo inya oŋodo’to ojori jihonyi, Isyarak etahabuyo jyo Hollum nyo emijak hohoi ara atulo alya aheyyani. ²⁵ Tania itarraŋ atulo inya oŋodo’to ojo, Abeŋ ni amijak kuyya ara inyi aheyyani. Ariŋ abotye an amijak ni, ahosyere aŋodo ni, bwo ihwania amijo ni. ²⁶ Ojori isi jihonyi, Ihan dwo inyi anyo jihoi? Aŋai itaŋida inyi oŋite hoi? ²⁷ Itarraŋ inyi ojo, Eramak dwo ni itai bwo itai ibyaŋata itaniŋyete. Nyo iwahata tai inyyak itaniŋyo? Iwahata tai ratan aheyyiyanak honyi? ²⁸ Teyya ette isi itafoyoŋyo inyi ojori, Iye ati olo leyiyanak honyi. Hohoi leyiyanak hulo Mose. ²⁹ Emijak hohoi ojo ikyana Hollum jyo Mose, ati atulo olo ebeŋ hohoi emijak ottu inyi tai. ³⁰ 30 Itarraŋ atulo alya jihosi, Obo ariŋ ana an illillihai aati jo, ibyaŋata tai imijana tai ottu inyi, ati isyo inyi jihoŋ amijo. ³¹ Emijak hohoi jo, obeŋ Hollum itaniŋyo eyyak, ati itaniŋyo inyi jyo lya al itahabuyo’to inyi bwo fe ihanio awahan honyi. ³² T’etteri fau hebeŋ hohoi etaniŋu obo atulo al itaŋida atulo ol oŋodo many t’esyori. ³³ Kuyya dwo obeŋ atulo olo ottu jyo Hollum obeŋ dwo bu inyi ihanio ehanita huna. ³⁴ Itarraŋi isi jihonyi, Isihini nya iye iyyata, bwo iye ijo ittiyenio hohoi? Ette isi ifuhara inyi addi. ³⁵ Itaniŋu Yesu jo ifuhari inyi addi. Tania orumak Yesu inyi ette jaran jihonyi, Iruk iye jyo Lonyi Hollum? ³⁶ Itarraŋ inyi, ngai lya Hobu? Oŋida ani eruk jihonyi. ³⁷ Ojo Yesu, Igonyu dwo iye inyi bwo fe inyi alya al ikyana’to jihoi. ³⁸ Ojo inyi, Eruk ni Hobu, ette inyi itahabuyo Yesu. ³⁹ Ojo Yesu, Attu ni ifau iŋocere erre, jo oŋida hul obeŋi’to igonyuni, igonyuni, bwo fe itaŋodoyere hul omijye’to. ⁴⁰ Omuk hulo Farisei hul owoni’to ikonyi itaniŋuni huna ette isi ifiyo inyi ojori, Eŋodo hohoi bwo fe? ⁴¹ Itarraŋ Yesu jihosi ojo, Kuyya dwo iŋodoti tai obeŋi dwo omuk eyyata jihatai, ati ihwania ijatta tai emijo hohoi, tania arasai eyyata hatai.