¹ Bwo Yesu olo idoŋe Oliveto. ² Ta amotye hanyik ocohuno inyi ihaji imojit eneittok bwo fe ofwonni aati daŋ jihonyi. Itoŋo inyi ette ittiyenio isi. ³ Bwo fe legyorokv iko Farisei iyaŋunie aŋotte an inefuni orotoi iko obo atulo, ette isi itawojihina inyi ihosyere wati. ⁴ Ojori isi jyo Yesu, Hettiyanani, aŋotte ana orumani oroto. ⁵ Ihwania ojori efahita huno Mose jo oŋida hohoi erwoŋyo inyi ta amorwoi. Bwo iye, ijo iye aŋai tenyi? ⁶ Ikyanai isi ana ikemyere Yesu jo oŋida isi errasak inyi. Tania irrafa Yesu ifau bwo itteryo igyoro ta afyalai honyi. ⁷ Odulori isi ifiyo inyi bwo inyi ette itabisana ahwan honyi bwo omijo jihosi ette jaran, Ijara lya ol hobeŋ’to iyyau heterwoŋo inyi ahosyere. ⁸ Tania inyyak inyi irrafa ifau ette inyyak igyoro ta afyalai honyi. ⁹ Itaniŋuni isi nekyanita hunia, itterye isi jyo amarwak adaha daŋ addi. Ette busaro Yesu iko aŋotte hama. ¹⁰ Itadet Yesu ahwan honyi ette jaran jihonyi, Ŋotte tahyai aati hulo? Obeŋ tulo oŋot aye jihoi? ¹¹ Itarraŋ aŋotte jihonyi, Hobu, obeŋ tulo. Ojo Yesu jihonyi, Abeŋ bwo fe ni aŋot iye. Ilo, ati henyyak iyyauna. ¹² Tania inyyak Yesu ikyana jihosi ojo, Ani afaŋan ono afau. Lya al ijifatyo’to ani obeŋ adi adaha idumele ati owon iko afaŋan ono nesu. ¹³ Tania ojori Farisei jihonyi, Iramaru iye etamijanita ta ahwan hoi. Obeŋi etamijanita hoi arai ahode. ¹⁴ Itarraŋ Yesu jihosi, ara dwo bu eramyo ni etamijanita ta ahwan hoŋ, obisi etamijanita hoŋ nyo amijak ni tai attu ni bwo aja alo ni. Ati ibyaŋata tai imijana attu ni tai bwo alo ni aja. ¹⁵ Iŋocete tai to ofyoro wati. Abeŋ ni aŋot obo atulo. ¹⁶ Ara dwo al aŋoco ni obisi dwo eŋotiti hoŋ nyo obyaŋara ani hama ati Monye al ifahu’to ani ewon ikoŋ. ¹⁷ Bwo te efahita hatai igyoroni jo obisi etamijanita huno laati arrihai. ¹⁸ Ani abotye eramyo ni etamijani ta ahwan hoŋ bwo Monyoŋ al ifahu’to ani iramyo etamijanita toni. ¹⁹ Ifiye isi inyi ojori, Tali Monyohoi? Itarraŋ Yesu ojo, Ibyaŋata tai imijana ani ara dwo bu Monyoŋ. Kuyya dwo imijana tai ani imijana dwo itai Monyoŋ bwo fe. ²⁰ Ikyana inyi ekyanita huna jyo amaji an isyoryerek agurusi hettiyenio inyi ihaji imojit eneittok. Bwo obeŋ tulo inef inyi nyo hobeŋi oŋitek honyi ottubai. ²¹ Inyyak Yesu jaran jihosi, Alo adi ni addi bwo fe ittifyati adi itai ani ati iyeti adi itai iyyata hatai. Jyo amaji an alari ni ibyaŋata adi itai ifwanna. ²² Tania itarraŋi Yudea ojori, Ottoho ’tadi inyi ahwan honyi? Nyo ojo inyi jo, Jyo amaji an alari ni ibyaŋata adi itai ifwanna? ²³ Ojo inyi jihosi, Irata tai huttowor bwo ni ottohide. Irata tai hulo afau ana bwo ni abeŋ ara olo afau ana. ²⁴ Inyi an ajari ni jo, iyeti adi itai iyyata hatai. Nyo al ibyaŋata tai iruhoto jo ani Kristo, lonyimot olo Hollum, iyeti adi itai iyyata hatai. ²⁵ Ojori isi jihonyi? Iye ŋai? Itarraŋ Yesu jihosi ojo, Eramak dwo ni itai t’etteri. ²⁶ Owoni erre jihoŋ arryai ikyanari bwo fe iŋocere tetai. Lya al ifahu’to ani obis inyi, bwo ekyana ni jyo laati erre huna hun etaniŋu ni jihonyi. ²⁷ Ati obeŋi isi itaniŋuni jo ikyana inyi to Monyonyi. ²⁸ Tania ojo Yesu jihosi, Al ikafana tai Lonyi tulo ahide, imijana adi itai jo ani alya, bwo fe abeŋ ni ehanio obo ariŋ ta awahan hoŋ, ati ekyana ni ihwa ittiyenak ani Monye. ²⁹ Bwo lya al ifahu’to ani ewon ikoŋ. Obeŋ inyi ani obusak hama nyo oŋitek daŋ ehanio ni erre hun itamunoi’to inyi. ³⁰ Al ikyana inyi ihwa ana, ette Yudea arryai iruk jihonyi. ³¹ Tania ikyana Yesu jyo Yudea hul iruhi’to jihonyi ojo, Al igolihina tai likyana hoŋ, irata tai aheyiyanak hoŋ ahode. ³² Bwo fe imijana adi itai nelahode bwo ohohi adi itai nelahode. ³³ Itarraŋi isi ojori, Edetuno hohoi to woyo ba Abramo bwo fe hebeŋ hohoi epito jyo obo atulo. Anyo an ijo iye jo ihohiniete adi itai? ³⁴ Itarraŋ Yesu ojo, Ahode ahode eramak ni itai jo, Aati daŋ eyyak arai apiti jyo neyyau. ³⁵ Obeŋ apit arasa ihaŋ tulaŋ, ati arasa lonyi tulaŋ. ³⁶ Al ohohi itai Lonyi, ohohini adi itai ahode. ³⁷ Amijak ni idetuniete tai jyo Abramo ati iwahata tai ani ’tohoro nyo obeŋi nekyanita hoŋ oyiji jihatai. ³⁸ Eramyo ni erre hun egonyu ni jyo Monyoŋ bwo fe imohoti tai te erre huno monye hatai. ³⁹ Itarraŋi isi jihonyi ojori, Ara Abramo monye hohoi. Itarraŋ Yesu ojo, Kuyya itai lonyirok Abramo oŋida ihaniete ehanita huno Abramo. ⁴⁰ Ati ihwania ijatta tai ani ettoho al eramyo ni itai nelahode an etaniŋu ni jyo Hollum. Obeŋ nya Abramo ihanio ihwa ana. ⁴¹ Ihaniete tai ehanita huno monyatai. Ojori isi jihonyi, Ebeŋ hohoi era olonyirok harotok. Ewon hohoi iko Monye abotye inyi Hollum. ⁴² Ojo Yesu jihosi, Kuyya ara Hollum Monyatai imunoti dwo itai ani nyo abusak ni Hollum ittuniere dini. Abeŋ ni attu ta awahan hoŋ ati Hollum ta ahwan honyi inyi ani efahu. ⁴³ Aŋai ibyaŋata tai itaniŋuna ekyanita hoŋ? Nyo ibyaŋata tai iremehina itayiryo ekyanita hoŋ. ⁴⁴ Itai lonyirok monyatai Sitan bwo iwahata tai ihanio ewahiti monyatai. Ara nya inyi ahattohoni t’etteri bwo obeŋi omuk ekyanita honyi obisi nyo obeŋ nelahode jihonyi. Al ogesem inyi, ogesem inyi ta ahwan honyi nyo ara inyi ologesem bwo fe amonye gesemi. ⁴⁵ Ati ibyaŋata tai iruhoto ani nyo ekyana ni nelahode. ⁴⁶ Omijak obo alatai jo ara ni aheyyani? Nyo ibyaŋata tai iruhoto ani al ekyana ni nelahode? ⁴⁷ Alya al ara aholo Hollum itaniŋu inyi ekyanita Hollum. Tania te eram to nya ibyaŋata tai itaniŋyete nyo ibyaŋata tai irata ahulo Hollum. ⁴⁸ Itarraŋi Yudea jyo Yesu ojori, Ebeŋ hohoi ettenu al ejo hohoi jo ira iye Asamaratanani bwo fe iwon iye iko ajok on orroho? ⁴⁹ Itarraŋ Yesu ojo, Abeŋ ni awon iko ajok on orroho. Etahabuyo fe ni Monyoŋ bwo itai imoryete nani. ⁵⁰ Abeŋ bu ni attifya etahwo hoŋ ati owon obo ol ottifya’to bwo inyi adi aŋotoni. ⁵¹ Ahode ahode ajo ni jihatai jo al ogotyere’to ettiyenita hoŋ obeŋ adi inyi oye ’tuŋ. ⁵² Bwo fe Yudea ette jaran jihonyi jo, Ihwania emijak hohoi jo iwon iye iko ajok. Oye nya Abramo, oyei nya eyak sayyo, ati ijo iye, Al ogotyere’to nettiyenita hoŋ obeŋ adi inyi oye ’tuŋ. ⁵³ Igalik iye hohonyi hohoi Abramo linya oye’to? Bwo fe eyak sayyo hinya oyei’to? Igigilo iye jo ira iye ŋai? ⁵⁴ Itarraŋ Yesu ojo, Al etahworo ni ahwan hoŋ, ara etahwo hoŋ asai. Monyoŋ fe inyi al itahuyo nani al ijatta tai jo ara a Hollum hatai. ⁵⁵ Bwo hebyaŋata tai imijana inyi, nani ati amijak inyi. Al ajo ni abeŋ ni amijak inyi ara fe ni ehenyabani ihwa itai. Ati amijak ni inyi bwo agotyere ni nekyanita honyi. ⁵⁶ Omuno nya monyatai Abramo igonyuniere oloŋ hoŋ. Ligonyu inyi oloŋ hoŋ ette inyi muno bebe. ⁵⁷ Ojori ati Yudea jihonyi, Hobeŋi aŋasi hoi ottubai atomwana miet. Aŋai igonyu iye Abramo? ⁵⁸ Ojo Yesu jihosi, Ahode ahode ajo ni jihatai, hobeŋi isiuni Abramo, awon nya ni. ⁵⁹ Ohuruni isi namorwoi irwoŋyere inyi ati idima Yesu ette jiŋara to haji imojit eneittok alet.