¹ Ihalu erre huna iddiddaha Yesu itwa misik huno Galilea. Obeŋ inyi awak adaha imisik Yudea nyo awahi Yudea ’tohoro inyi. ² Ihwania ilyaha eyom ono Yudea, inyi eyom ono asik. ³ Ojori illarak honyi jihonyi, Heduhati tene efwo Yudea, jo oŋida leyiyanak hoi igonyuni egyama an ihanio iye. ⁴ Nyo obeŋ obo atulo idimak erre hun ihanio inyi, al awak inyi laati omijani inyi. Al ihanio iye etamijanita, itahutak ahwan hoi jyo aati. ⁵ Nyo ara dwo bu illarak honyi obeŋi iruhi jihonyi. ⁶ Itarraŋ Yesu jihosi, Hobeŋ asaa hoŋ ottu ati ara asaa hatai ihwania. ⁷ Obeŋi aati itai oswarik ati oswarik ani, nyo eramyo ni etamijanita jihosi jo orrohoji ehanita hosi. ⁸ Ifwatta iyom ta ahwattek hatai. Habeŋ ni alo jyo eyom ania nyo hobeŋ asaa hoŋ ottu. ⁹ Ikyana inyi erre huna ette inyi rasa Galilea. ¹⁰ Ihalu afwoi illarak honyi eyom ette inyi leten bwo fe, ati obeŋ aleten honyi oleyo ihomomite wati. ¹¹ Ottifyai Yudea inyi to maji ono eyom ania ette ifiyo ojori, Tali inyi? ¹² Omwaŋai eluluŋ wati inyi bebe. Ojori omuk, Oyyu atulo alya. Bwo omuk ojori, Obeŋ, itipalyo inyi laati. ¹³ Obeŋ obo ikyana on okwat to Yesu nyo abaŋi isi Yudea. ¹⁴ Ati al ara ehiji ono neyom olo Yesu ihaji imojit eneittok ittiyeniere. ¹⁵ Illillihai Yudea ojori, Aŋai omijak atulo olo egyerita huno Hollum bwo hobeŋ iyiyana? ¹⁶ Itarraŋ Yesu jihosi ojo, Ettiyenio hoŋ obeŋ ara onoŋ ati ara ono lya al ifahu’to ani. ¹⁷ Al awak obo ihanio awahan ono Hollum, omijak adi inyi jo, arai ettiyenita hoŋ ahuno Hollum kuyya ani ekyana ta ahwan hoŋ. ¹⁸ Al ikyana’to ta ahwan honyi ottifya inyi etahwo honyi. Ati atulo ol ottifya’to etahwo jyo alya al ifahu’to inyi ikyana inyi ahode, bwo fe obeŋ inyi inyobyo. ¹⁹ Obeŋ nya Mose isyo itai efahita? Ati obeŋ obo alatai ifaha efahita. Nyo iwahata tai ’tohoro ani? ²⁰ Itarraŋi neluluŋ ojori, Iwon iye iko ajok on orroho. Ngai iye ejo ettoho? ²¹ Itarraŋ Yesu jihosi ojo, Ehanio nya ni obo ariŋ ittata tai daŋ illilliha. ²² Ikemijata, isyo nya Mose jihatai aŋotou ati obeŋ ara Mose itteryo, hohonyok hatai nya itterye. Bwo imohina tai ŋoco leito dwadi to oloŋ sabato. ²³ Kuyya ifwotu leito aŋoto to sabato jo oŋida efahi Mose obeŋ opwak, nyo iloŋojitati tai jihoŋ te etaŋidaryo hoŋ atulo to noloŋ sabato? ²⁴ Heŋocete hebyaŋata tai imijana awoyo hiram, ati oŋototo on obis.'' ²⁵ Tania ojori omuk hulo Yerusalem jo, Obyaŋara atulo olo ol ojori ottohori? ²⁶ Ikemijyete, ikyana inyi oŋerejai bwo tulo obeŋ ikyana jihonyi. Omijani adi eleittaha jo inyi alya Kristo? ²⁷ Emijak hohoi tai ottu atulo olo ati al ottu Kristo obeŋ adi tulo omijak tai ottu inyi. ²⁸ Tania itakwat Yesu nekyana al ittiyenio inyi itwa haji imojit eneittok ojo, Itai, imijana tai ani bwo fe tai attu ni. Ati abeŋ ni attu ta ahwan hoŋ. Lya al ifahu’to ani inyi elahode bwo fe ibyaŋata tai imijana inyi. ²⁹ Ati amijak ni inyi nyo attu ni jihonyi bwo ifahu inyi ani. ³⁰ Ottifyatye isi inyi inefuniere ati obeŋ tulo ottirok ahas jihonyi nyo hobeŋi oŋitek honyi ottubai. ³¹ Ati iruhi hutteluluŋ arryai jihonyi bwo ojori, Al attu Kristo ihanio adi inyi etamijanita agalihini huno atulo olo? ³² Ikikyanai eluluŋi wati te ehanita Yesu ette Farisei itaniŋuna, tania ifahini eleittaha iko Farisei surukali inefuniere inyi. ³³ Attati Yesu jaran jihosi, Harasa ni wanan ikatai kai bwo alo adi ni jyo lya al ifahu’to ani. ³⁴ Ittifyati adi itai ani bwo ibyaŋata adi itai irumana ani. Jyo amaji an alari ni ibyaŋata adi itai ifwanna. ³⁵ Ikikyanai Yudea ta ahwattek hosi ojori, Aja ojo atulo olo alo inyi jo oŋida hohoi ebeŋ erumak inyi? Olo ’tadi inyi jyo laati hohoi hul isarrahini’to huttehiji paganohyen bwo fe ittiyeniere laati Grik? ³⁶ Ojo inyi jo, Ittifyati adi itai ani bwo ibyaŋata adi itai irumana ani, bwo fe, Jo amaji an alari ni ibyaŋata adi itai ifwanna. Anyo ati nekyanita huna? ³⁷ To oloŋ eneittok on otuhuniere eyom, owotya Yesu bwo ikyana on okwat ojo, Kuyya ibwoto obo atulo ijara hettu jihoŋ imatari. ³⁸ Ihwa igyoroni igyerita jo, “Totwa alya al iruk’to jihoŋ, odulori aari hun isui’to ŋettyo.” ³⁹ Ojo inyi ana to Oloyiri ol Olibo al ifwotuni adi eruhok. Nyo hobeŋi nya bu inyi isyarani Oloyiri ol Olibo nyo hobeŋ Yesu ifwotu etahwo honyi. ⁴⁰ Omuk hutteluluŋ hul itaniŋye’to ekyanita huna ojori, Ahode atulo alya inyi eyani sayyo. ⁴¹ Bwo omuk ojori, Inyi Kristo. Ati ojori omuk, Ottu Kristo to Galilea? ⁴² Ojori egyerita jo, “Odetuno adi Kristo to woyo Davide to miji ono Betlehem inya amanyari Davide.” ⁴³ Tania owon abwanya ihiji wati tenyi. ⁴⁴ Awahi omuk hulosi inefuna inyi ati obeŋ tulo ottir inyi. ⁴⁵ Tania ette surukali caharu jyo eleittaha iko Farisei. Ifiye isi surukali ojori, Nyo ibyaŋata tai iyaŋuniete inyi? ⁴⁶ Itarraŋi surukali ojori, Hobeŋ tulo ikyana ihwa atulo lya. ⁴⁷ Itarraŋi Farisei jihosi ojori, Itai bwo fe, linyob bwo fe inyi itai? ⁴⁸ Iruhi omuk eleittaha iko hulo Farisei jihonyi? ⁴⁹ Ati eluluŋ wati hulya obeŋi omijani efahita tania iha Hollum isi. ⁵⁰ Obo olosi Nikodemo linya olo’to mijo Yesu, ojo jihosi, ⁵¹ Oremehini efahita hohoi iŋot atulo ahosyere hobeŋi ekyanita honyi itaniŋunie bwo fe hebeŋ emijak anyo an ehan inyi? ⁵² Itarraŋi isi jihonyi, Iye ta ahwan hoi, ira iye olo Galilea? Ottifyai bwo fe ilo imijye, hobeŋ obo eyani sayyo ottu to Galilea. ⁵³ Tania ofwoi aati daŋ ihaŋitek hosi.