¹ Ahode ahode eramak ni itai ojo, Ol obeŋ’to ojiŋak itwa hidye ta akol hidye ati odok to obo ekoi on obeŋi odohitarik, ara inyi olohoho. ² Ati ol ojiŋu’to ta akol hidye inyi monye hidye. ³ Aŋahi adi eyyahani akol jihonyi. Iruhi akyoro eloŋo honyi bwo ahaco inyi akyoro honyi ta afureta hosi ette inyi ’yaharu isi. ⁴ Al irribu inyi nedye honyi totwa, ikyomoro inyi to osyere hosi bwo akyoro ette jifaru inyi nyo omijani isi etuk honyi. ⁵ Obeŋi isi ijifarai atamononi ati ofuhoi isi addi jihonyi nyo obeŋi isi omijani etuk tamononi. ⁶ Iramak Yesu isi arryamara ana ati obeŋi isi itaniŋuni erre hunia. ⁷ Ojo Yesu jihosi, Ekyana ni jihatai ahode ahode, ani akol kyoro. ⁸ Hul ofwonni’to ahosyere hoŋ arai ahahalak ati obeŋi akyoro itaniŋye jihosi. ⁹ Ani akol. Ol ojiŋu’to totoloŋ italahuni adi. Ojiŋak ati inyi itwa bwo ojiŋuta addi irumaniere amaji ŋiyo. ¹⁰ Ottu ahahalani ihoholyere bwo ittohyere iko itarrohojyere. Attu ni jo oŋida isi owoni iko nesu en ifut bwo nemuniti daŋ. ¹¹ Ani leyyahani ol oyyu. Isyo leyyahani ol oyyu nesu honyi ta akyoro honyi. ¹² Ati lemahani ol obeŋ ara aheyyahani ol obeŋ bu ara amonye kyoro igonyu elemye attu bwo inyi idehi akyoro ette fuho attati elemye honyaru bwo fe itisarraru akyoro. ¹³ Ofuho lemahani nyo odumai inyi bwo fe obeŋ bu inyi igigilo ta akyoro. ¹⁴ Ani leyyahani ol oyyu. Amijak bu ni akyoro hoŋ, bwo fe isi omijani nani. ¹⁵ Ihwa on omijaniere Monyoŋ nani, bwo fe ni amijak Monyoŋ, esyo bwo fe ni nesu hoŋ ta nakyoro hoŋ. ¹⁶ Owoni bu omuk akyoro hoŋ huno hobeŋi ottubanie libore ana. Oŋida osuduhanie isi daŋ jihoŋ bwo itayirye adi isi netuk hoŋ, oŋida ara abore abotye iko leyyahani abotye. ¹⁷ Inyi ana on omunori Monyoŋ ani nyo esyarak ni nesu hoŋ jo oŋida ani enyyak inyyahuna. ¹⁸ Obeŋ obo ohororo nesu addi jihoŋ. Esyo ni ta awahan hoŋ. Owon adwaran jihoŋ isyoryere bwo inyyahuniere. Efwotu ni adwaran ana jyo Monyoŋ. ¹⁹ Te ekyanita huna owon abwanya inyyak ihiji wati Yudea. ²⁰ Ojori omuk arryai, Isita inyi bwo fe owon iko ajok on orroho’to. Nyo itaniŋyete tai jihonyi? ²¹ Hul omuk ojori, Obyaŋara nekyanita huno ajok huna. Oremehini ajohin iŋa oŋite aŋodok? ²² Tania owon nya oloŋ ono eyom an ajaharik aji imojit eneittok imiji Yerusalem. ²³ Ara nya ahameyu. Adaha Yesu idafata haji imojit eneittok. ²⁴ Tania ikoloni Yudea daŋ inyi bwo ifiye inyi, Many baya iwak iye itawojo hohoi dini? Iramak hohoi kuyya ira iye Kristo. ²⁵ Itarraŋ Yesu jihosi ojo, Eramak dwo ni itai bwo ibyaŋata tai iruhoto. Ehanita hun ehanio ni ta afure Monyoŋ itamijaniere ani. ²⁶ Ati ibyaŋata tai iruhoto nyo ibyaŋata tai irata akyoro hoŋ. ²⁷ Itaniŋye akyoro hoŋ ekyana hoŋ bwo amijak ni isi bwo isi ette ijifuno ani. ²⁸ Esyo ni jihosi nesu on osyo’to fur bwo obeŋi adi oyei jyo ’tuŋ. Obeŋ obo atulo ohoru isi to hani hoŋ. ²⁹ Monyoŋ al isyarak’to isi jihoŋ ogol inyi agalik daŋ bwo fe obeŋ tulo ohoru isi to hani Monyoŋ. ³⁰ Ani iko Monyoŋ era hohoi abotye. ³¹ Inyyahi Yudea huruna amorwoi irwoŋyere inyi. Ojo Yesu jihosi, ³² Etahutak ni itai ehanita arryai hun oyiji huno Monyoŋ. Ta anani ehani iwahata tai irwoŋyo ani? ³³ Itarraŋi Yudea jihonyi ojo, Ebeŋ hohoi iye erwoŋyo te ehanita hun oyiji, ati te emorit nyo ira iye atulo ati ijo iye jo, ira iye Hollum. ³⁴ Itarraŋ Yesu jihosi, Obeŋi igyoroni ifahita hatai, “Ojo Hollum, Irata tai ajohin”? ³⁵ Emijak hohoi jo arai nekyanita huno Hollum ahode, bwo iloŋo inyi hya hul ifwotuni ekyanita ajohin. ³⁶ Ati onyimu Monye ani ette ifahuna ani ifau. Tania aŋai ijatta tai jo amoryo ni al ajo ni jo ani Lonyi Hollum? ³⁷ Al abeŋ ni ehanio nehanita huno Monyoŋ, heruhoto ani. ³⁸ Ati kuyya ehanio ni isi dwadi ibyaŋata tai ani iruhoto, iruhoto ehanita jo oŋida ifwanna tai mijana bwo fe iduloti etaniŋuta jo, owon Monye itwa hoŋ bwo fe ni itwa Monyoŋ. ³⁹ Tania ojori isi enyyak iniafaru inyi ati iris inyi addi to has hosi. ⁴⁰ Ette inyi leten ’laŋan aari Yordano tole jyo amaji inya ibatisyere Yoane ahosyere. Ette inyi itoŋo dia. ⁴¹ Ofwonni laati arryai jihonyi ette jaran, Obeŋ nya bu nyi Yoane ihan obo etamijani. Ati erre daŋ hunya ikyana inyi ta atulo olo, obisi. ⁴² Teyya ette aati arryai iruk jihonyi.