¹ Ihwania oŋwai obo atulo al ifurani Lasaro. Inyi olo Betania amiji ono ba Maria iko hanionyi Marta. ² Inyi Maria inya iyal’to Hobu Yesu te eyali bwo ifufus ejek honyi to ofir. Illanyi Lasaro ol oŋwai’to. ³ Ifahini haniarak honyi neram jyo Yesu ojori, Hobu imijye, lya al imuno iye, lioŋwai. ⁴ Itaniŋu Yesu eram ana ojo inyi, Obeŋ adi bu nyi naŋwai ottoho inyi, ati itahuye adi Lonyi Hollum tenyi. ⁵ Ihwania omuno Yesu Marta iko hanionyi bwo Lasaro. ⁶ To ninya itaniŋu inyi jo oŋwai Lasaro arasa inyi oŋitek arrihai jyo amaji ninya awanari inyi. ⁷ Ihalu ana ojo inyi jyo leyiyanak honyi, Hafata hacahati Yudea. ⁸ Ojori leyiyanak honyi, Hettiyanani, hetehi iye Yudea jaran ettoho, bwo fe inyyak iye caharu dia? ⁹ Ojo Yesu, Obeŋi asahyen arai ’tomon harrihai hutto fanni? Kuyya adaha obo atulo ta afanni obeŋ adi ikosoro, nyo igonyu inyi nafaŋan ono afau. ¹⁰ Ati al adaha obo ta attari ikosoro inyi, nyo obeŋ afaŋan jihonyi. ¹¹ Ojo inyi erre huna bwo lihalu ojo, Lasaro orryahat hohoi lyo ojoto. Halo ni itahenyuna inyi. ¹² Itarraŋi leyiyanak honyi ojori, Hobu, kuyya ojoto inyi ohenyu adi yo. ¹³ Ihwania ikyana Yesu ta aye honyi ati igigiloi isi jo ikyana inyi eram joto ahode. ¹⁴ Tania iramak inyi isi, Aye Lasaro. ¹⁵ Bwo fe nyo te eram hatai amuno ni ta abyaŋan hoŋ teyya jo oŋida itai iruhoto. Ifwanna efwo jihonyi. ¹⁶ Tania Tomaso, al ifurani aturoti ikyana jyo leyiyanak, Hafata bwo fe oŋida efwo ye ikonyi. ¹⁷ Lafany Yesu orumak inyi Lasaro anuha itwa ilume oŋitek aŋwan. ¹⁸ Ilyaha nya Betania Yerusalem. ¹⁹ Tania aati arryai hulo Yudea ofwoi itwari jyo Marta iko Maria ta aye illa hosi. ²⁰ Al itaniŋu Marta jo attu Yesu ette inyi leten irwaŋaniere ikonyi. Ati arasa Maria itoŋo itwa haji. ²¹ Ojo Marta jyo Yesu, Hobu iwon ŋole iye dini, obeŋ ŋole bu nyi illaŋ oye. ²² Ati ihwania amijak ni to obo ariŋ an ifiyo iye jyo Hollum, isyo Hollum jihoi ²³ Ojo Yesu jihonyi, Ibuhu adi illa hoi. ²⁴ Itarraŋ Marta ojo, Amijak ni jo ibuhu adi inyi iholoŋ isidi fau an ibuhunierek aati. ²⁵ Ojo Yesu, Ani nebuhuna iko nesu. Alya al iruk’to jihoŋ dwadi oye inyi, isu adi. ²⁶ Bwo al isu’to iruk jihoŋ obeŋ adi oye. Iruk iye ana? ²⁷ Ojo Marta, Afe Hobu, eruk nya ni jo iye Kristo Lonyi Hollum al ittu’to ifau. ²⁸ Al ikyana Marta huna olo inyi iloŋuno hanionyi Maria bwo iramak inyi hama ojo, Afany ettiyanani bwo iloŋo inyi iye. ²⁹ Tania itaniŋu Maria odyoto inyi kwak ette leten jihonyi. ³⁰ Nyo hobeŋ Yesu afany itwa miji, harasa inyi jyo amaji odwo orwaŋanierek Marta ikonyi. ³¹ Ati Yudea hyodwo owoni’to itwari, al igonyuni isi Maria adyoto kwak ette leten, bwo fe isi ette jifaro inyi. Igigiloi isi ojo olo adi inyi ilume iyyori. ³² Al ottu Maria jyo amaji odwo awanari Yesu bwo igonyu inyi, ette inyi kwahino ihejek honyi bwo omojo inyi ojo, Hobu iwon ŋole iye dini obeŋ ŋole illaŋ oye. ³³ Al igonyu Yesu inyi oyyo bwo fe Yudea hul iniemunie’to inyi oyyoi ette ataji honyi mijan bebe ta amehino. ³⁴ Ojo inyi, Aja inuhana tai inyi? Itarraŋi isi ojori, Hobu, waŋ imija. ³⁵ Ette Yesu ’yo. ³⁶ Ojori Yudea, Imijyete omuno dwadi Yesu inyi bebe. ³⁷ Ati ojori omuk hulosi, Isyarak nya atulo olo oloŋodo amijo. Tania obeŋ ati inyi oremik itihuna Lasaro to ye?'' ³⁸ Tania inyyak ataji Yesu mijan bebe ette leten ilume an ara ahinom on ottuhoni ta amorwo. ³⁹ Ojo Yesu, Itabororo amorwo addi. Ojo Marta hanie hayani jo, Hobu ihwania amuyak nyo owon inyi ilume oŋitek aŋwan. ⁴⁰ Ojo Yesu jihonyi, Abeŋ dwo ni iye eramak ojo, al iruk iye igonyu adi iye etahwo Hollum? ⁴¹ Teyya itaborori isi amorwo addi bwo Yesu ette mijo ahide bwo ojo, Monyoŋ ajo ni jihoi humo nyo itaniŋyo iye jihoŋ. ⁴² Bwo amijak ni jo itaniŋyo iye jihoŋ oŋitek daŋ. Ati te eram ono eluluŋ wati hul owotyai’to dini ekyana ni ihwania oŋida isi iruhi jo ifahu iye ani. ⁴³ Ihalu honyi ikyana ana, iloŋo inyi on okwat ojo, Lasaro, waŋ addi. ⁴⁴ Ette ayani ’tuna ol obubunani ahas, ejek, omom iko ahwan honyi daŋ ta aboŋo. Ette Yesu jaran, Ohoto inyi, ijara hetelo. ⁴⁵ Iruhi hulo Yudea arryai hyodwo ofwonni’to jyo Maria, al igonyuni isi ariŋ an ihanio Yesu. ⁴⁶ Bwo omuk afwoi jyo Farisei iramaniere ehanita huno Yesu. ⁴⁷ Attubanie ehumak eleittaha iko Farisei iko aŋotok hirre. Ojori isi, Efwo adi hohoi ihanio anyo? Nyo ihanio atulo olo etamijanita arryai. ⁴⁸ Al ebeŋ hohoi etik inyi jyo ehanita huna iruhi adi aati daŋ jihonyi. Ofwonni adi aati Roma ilettohori amiji hohoi iko laati hohoi. ⁴⁹ Ati obo olosi afure honyi Kaifa al ara nya eleittok te eŋa ania ojo jihosi, Ibyaŋata tai imijana obo ariŋ ’tuŋ. ⁵⁰ Ibyaŋata tai igigiloti jo oyyu dwo aye ono atulo abotye ta aati daŋ agalik etatturyo ono namiji? ⁵¹ Obeŋ inyi ikyana ekyanita huna ta ahou honyi, ati nyo ara inyi ehumani ol obolo’to te eŋa ania, ifwotu inyi ekyana ana jyo Hollum ojo, oye adi Yesu ta aati Yudea daŋ. ⁵² Obeŋ ara ta aati hya hama ati oŋida inyi ottubak eluluŋ duri Hollum hul isarrahini’to. ⁵³ Teyya to oloŋ to nya iwwahai isi aŋai ottohori adi isi inyi. ⁵⁴ Tania obeŋ Yesu inyyak daha ol oleyo ihiji Yudea ati olo teyya addi ilyaha imur jyo obo amiji an ifurani Eprimo ette rasa dia iko leyiyanak honyi. ⁵⁵ Tania ilyaha eyom ono Yudea an ifurani Allaŋan ono Anjelo. Ofwoi aati arryai to misihi Yerusalem ihosyere eyom ania ihuhumyere ahwattek hosi. ⁵⁶ Odulori isi attifya Yesu bwo fe ikikyanai ta ahwattek hosi hetoŋoi isi ihaji imojit eneittok ojori, Igigiloti tai jo ottu adi inyi iyom? ⁵⁷ Ihwania eleittaha iko Farisei ifahini eram ojori, Al omijak obo owon inyi aja oŋida iramak jihohoi inefuniere inyi.