¹ Aŋai ofwonni erremiti iko ebahita ihiji hatai? Obeŋi isi ofwonni t’ewahiti hutto ŋaco hwattek hatai hun aŋalafai? ² Iwahata tai erre ati ibyaŋata tai inyurana, tania ittohyete tai laati. Idayati tai erre ati ibyaŋata tai inyurana, tania iŋalafati tai bwo ibahyete laati. Ibyaŋata tai iwanata iko erre nyo ibyaŋata tai ifiyete. ³ Ifiyete tai ati ibyaŋata tai ifwotuna, nyo ifiyete tai on orroho, nyo iwahata tai tuhoro isi te ewahiti hwattek hatai. ⁴ Itai arotok, ibyaŋata tai imijana jo hul omunoi’to afau arai isi amyorok hulo Hollum? Lya al awak’to ratan amotte olo afau ara inyi amyotononi olo Hollum. ⁵ Igigiloti tai jo ikyanai negyerita asai al ojori isi jo, “Oloyiri al amanya’to itwajin hohoi, omuno inyi hohoi ta awahan an ara’to ahaini?” ⁶ Ati isyo inyi amehino an agalik. Tania ojori egyerita jo, “Iha Hollum etadarak ati omehino inyi jyo anyalamak.” ⁷ Oniŋyete Hollum, ihara etisyahani bwo ofuho adi inyi addi jihatai. ⁸ Ihutonia olyahai jyo Hollum, bwo ihutu adi Hollum jihatai aŋati. Italiboroto ahas hatai itai leyyak, italiboroto atajya hatai itai hul irryahai tajya. ⁹ Itajiriŋata atajya, atarihati, bwo oyyoti; oŋida asuhotyo hatai oyito atariha, bwo amuno hatai oyito ataji on odiŋ. ¹⁰ Itamutarata ahwattek hatai ihosyere Hobu bwo itabolo adi inyi itai. ¹¹ Illarak hoŋ, hemwaŋati obo atulo. Lya ol omwaŋa’to illanyi kuyya oŋot inyi, ikyana inyi on orroho te efahita bwo oŋot inyi efahita. Ati kuyya iŋot iye efahita ibeŋ iye ira ahehanani ifahita ati ira iye ahaŋotoni hosi. ¹² Owon esyarani ifahita abotye al ara’to ahaŋotoni, inyi alya ol oremik’to italahuna bwo oremik ’tohoro. Ati, ŋai iye al ira’to ahaŋotoni hutto lonyihari hoi? ¹³ Igigiloti ihwania itai hul ijatta’to jo, Ahana kuyya motye efwo adi hohoi jyo obo amiji, bwo emanya adi hohoi dia eŋa abotye itinyyaŋaniere erre bwo fe ipocouniere. ¹⁴ Ati ibyaŋata tai imijana anyo adi ottu motye. Ara nesu hatai ihwa anyo? Ara inyi ihwa eriri on oleyo’to kai ette ihalu byaŋarana. ¹⁵ Oŋida ijatta tai jojo, Kuyya awak Hollum esu adi hohoi bwo ehanio adi hohoi ihwa ana kuyya ihwa nya. ¹⁶ Ati ihwania itadarati tai te erre hun ihaniete tai; orroho etadara ihwa ana. ¹⁷ Tania alya ol omijak’to ehanio on oyyu ati obeŋ inyi ihanio, iyyau inyi.