¹ Illarak hoŋ, hotobyaŋahi hulatai arryai arai ahettiyanak nyo imijana tai jo ifwotuni adi ettiyanak aŋoco on obolo. ² Nyo epal hohoi daŋ te erre arryai. Kuyya owon obo atulo ol obeŋ’to ipal ta nekyana honyi, ara inyi atulo ol obis bwo fe oremik inyi itihotyere ewahiti hwan honyi daŋ. ³ Imijyete, kuyya efitak hohoi ofi imuto husuŋ oniŋye isi hohoi bwo eremik hohoi iloit ahwattek hosi daŋ. ⁴ Ikemijyete bwo fe atogol, dwadi obolo inyi bebe, bwo ohutaro oyyami on ogol’to inyi ati te eguri on omuta bebe iloiti inyi ihwa awak eguroni iyaro inyi. ⁵ Tania bwo fe ara aŋadyef aŋati hwan on omuta’to bwo ikyana inyi erre hun obolori’to. Imijyete, otuk eema ol omuta’to adoŋe on obolo. ⁶ Bwo fe ara aŋadyef ihwa eema. Orroho aŋadyef bebe agalik aŋaco hwattek hohoi daŋ, bwo itarroho inyi ahwan daŋ. Inak inyi eema on oswahyo’to laati te lesiuniere many oyerik isi, bwo oswak eema on obeŋ’to odunya inyi. ⁷ Oremehini laati itamohuna awoi caŋi daŋ iko aheny ojo erre hun oretyai’to iko erre huttotwa hari, bwo itamohye nya aati isi beryen, ⁸ ati obeŋ obo atulo oremik itik aŋadyef. Orroho inyi bebe nyo obeŋ itoŋo dee bwo fe ifut inyi iko eyyeri ono naye. ⁹ Tenyi etahabuyo hohoi Hobu Monye bwo tenyi epico hohoi aati hul oyyeuni itiyyalaruniere Hollum. ¹⁰ Ofwonni etahabuyo iko epico to hutuk abotye. Illarak hoŋ, oŋida erre huna obeŋi arai ihwo nya. ¹¹ Oŋeruni aari hun odwari’to iko hun ilihi’to to lotilik abotye? ¹² Illarak hoŋ, oremik aŋaboli ŋijuna acahai, kuyya ajalaŋi oremik ŋijuna aŋaboli? Obeŋ bwo fe olotilik on odwa oremik itaŋeruna aari hun ilihi. ¹³ Ŋai ol owon’to iko ofyoro bwo amijana hirre ihiji hatai? Ta amanya honyi on obis itahutak inyi egyamita hun oyiji ta abiji taji iko ofyoro. ¹⁴ Ati kuyya iwanata tai iko adaya hirre iko ahaini an itadwa’to atajya hatai, hetadarati bwo hegesemoto jyo nelahode. ¹⁵ Obeŋi erre huna ofwonni t’edou, ati arai isi ofyoro huno afau, ofwonni isi ta awahan ono ahwan iko ono etisyahani. ¹⁶ Nyo al awon ahaini iko adaya hirre owon bwo fe eharuto iko egyamita hun orrohoji’to. ¹⁷ Ati ofyoro hun ofwonni’to t’edou, ahosyere olibori isi bwo ihalu owoni isi iko nelik tajya, anyalami, etaniŋuna kwak, ifuti isi iko amehino, bwo aŋer hun oyiji’to, obeŋi isi ikuyyai, bwo fe obeŋi inyobye. ¹⁸ Lya ol owon’to iko nelik taji oyehi adi inyi aŋer huno nelik tajya bwo ette adi inyi deŋuna abisan.