¹ Ihaniete ihwania itai abarak, oyyoti bwo ilulwoti te ettigemita hun ofwonni adi jihatai. ² Amuyahi ebariti hatai bwo fe atuk neyyu aboŋojin hatai. ³ Ilarryoŋoloq nayyel iko agurusi hatai, bwo elarryoŋolo hosi ara etamijani jihatai bwo oŋiye adi ahwattek hatai ihwa eema. Ittunana tai ebariti hatai to oŋitek huno nesidi. ⁴ Imijyete, oyyoi legyamak hul odyoŋoi’to amatta hatai te edumiti hosi, nyo idumati tai isi ta ahoho, bwo afany ayyo ono adyoŋok many jyo Hobu olo alwajak. ⁵ Imanyati tai ta nemuniti hutta fau bwo ijifatyete ewahiti hwattek hatai, itaŋiyete tai atajya hatai many iholoŋ ono attohyo. ⁶ Iŋototo tai aye jyo abisani ittata tai ’tohoro inyi bwo obeŋ inyi iha itai. ⁷ Illarak hoŋ, itilati ta adihan attuna ono Hobu. Imijyete, itila aromoni adyoŋo, itila inyi ta adihan aŋer hun awak inyi bebe many ottu ahide etteri iko ette halu. ⁸ Itai bwo fe odihuna bwo itagoloto atajya hatai nyo ilyaha attuna ono Hobu. ⁹ Illarak hoŋ, hemwaŋati obo atulo iko obo, ŋadi aŋoco ottu jihatai. Imijyete, aŋotoni ol owotya ikat. ¹⁰ Illarak hoŋ, imijyete adihan ono eyak sayyo hulo Hobu hinya odihuni’to ettigemita. ¹¹ Imijyete, ejo hohoi jo omunoi laati hinya odihuni’to ettigemita. Itaniŋuna tai adihan ono Yobu bwo igonyuna tai esidi an iyaŋuno Hobu jihonyi, nyo ifut Hobu iko anyalami bwo amehino. ¹² Illarak hoŋ, eram an agalik’to daŋ ana jo, hettuŋoti; kuyya te edou, kuyya ta afau, kuyya bu to obo ellama. Ati al ijatta tai Afe, ijatta Afe, kuyya al ijatta tai Obeŋ, ijatta Obeŋ, nyo ŋadi aŋoco ottu jihatai. ¹³ Owon obo alatai ol odyaha? Ijara inyi hotomojoi. Owon obo ol omuno? Ijara inyi hetedoloi afureta. ¹⁴ Owon obo alatai ol oŋwai? Ijara inyi heteloŋo eleittaha hulo eklesya, bwo omojoi adi isi tenyi ette iyal inyi ta eyali ta afure Hobu. ¹⁵ Attadi amojo ono neruk italahuna aŋwani, bwo itadet adi Hobu inyi to loŋwari, bwo kuyya owoni eyyata jihonyi ohohinie adi isi. ¹⁶ Tania iramana eyyata hatai jyo illarak hatai bwo omojoti tesi jo oŋida itai iŋidarata. Igyama amojo ono abisani bebe, al omojo inyi te efiriwa. ¹⁷ Owon nya Elija iko ewahiti ihwa hohoi, ati omojo inyi te efiriwa itihyere ahide, bwo ta aŋasi hunihoi iko ayafajin ille obeŋ nya ahide asayo ifau. ¹⁸ Attati inyi inyyak mojo, bwo ette ahide asayo bebe, attati afau ŋijuna aŋer. ¹⁹ Illarak hoŋ, kuyya ipal obo alatai t’ekoi ono nelahode, bwo inyyahu obo atulo inyi, ²⁰ oŋida inyi omijak jo, lya al inyyahu eyyani t’ekoi an ipalari inyi, italahu adi inyi oloyiri honyi to ye, bwo imuhok inyi eyyata arryai.