¹ Adahatye nya Petro iko Yoane ihaji imojit eneittok imojori ta asaa hunihoi otto otoryai nyo inyi asaa ono amojo. ² Owon nya obo atulo ol oŋura many t’esiuniere. Oŋitek daŋ iyaŋutai isi inyi ihaji imojit eneittok jyo ekat an ifurani Ilaman, ifiyere agurusi jyo hul ojinani’to dia. ³ Igonyu inyi Petro iko Yoane hul ojori ojiŋani ihaji imojit eneittok ette inyi ifiyo isi to obo esyoryo. ⁴ Ette Petro iko Yoane yadari jihonyi ette jaran, Ikemijye jihohoi. ⁵ Otte inyi mijo jihosi ta neyihina ifwotuniere obo ariŋ jihosi. ⁶ Ojo Petro jihonyi, Obeŋi omuk agurusi jihoŋ ati ariŋ on owon’to jihoŋ esyarak adi ni jihoi. Ta afure Yesu olo Nasaret, tadahai. ⁷ Ette Petro inef inyi ta aani iŋet ette itadet ahide. Teyya kwak ette ellohi hejek honyi golon. ⁸ Bwo ollwa inyi ahide ette wotya ette itteryo adaha. Teyya ojiŋari isi ikonyi ihaji imojit eneittok. Olluta inyi ’luta ta adaha honyi itahabuyere Hollum. ⁹ Igonyuni aati daŋ inyi adaha bwo arasa itahuyo Hollum, ¹⁰ omijani isi jo inyi alya lemimojoni al itoŋotyo’to ikat an ifurani Ilaman, ette isi illilliha bebe ta naŋidari hwan honyi. ¹¹ Henef inyi Petro iko Yoane, ette aati daŋ hinya illillihai’to bebe ŋyoron jihosi ihiloŋoni an anya’to eloŋoni ono Solomone. ¹² Ligonyu Petro nellilliha hosi ette jaran jihosi ojo, Itai laati hulo Israele, nyo illillihati tai jyo atulo olo? Nyo iyadarata tai jihohoi?Ijatta tai ta nadwaran hohoi kuyya bu ta ayiji hohoi adaha atulo olo? ¹³ Hollum olo Abramo iko Isako bwo Yakobo, Hollum olo hohonyok hohoi, inyi alya al itahabu’to apit honyi Yesu, inya isyatta tai jyo Pilato, ittata tai ihara dwadi awak Pilato hohina inyi. ¹⁴ Ihara nya itai lya ol olibo’to bwo fe obis, ittata igula ta attohoni oŋida ohohini jihatai. ¹⁵ Bwo ittohoro tai Hobu olo nesu. Ati itubuhu Hollum inyi to ye. Tania era hohoi ahetamijanak honyi. ¹⁶ Ta neruk ifure honyi itaŋidari atulo olo ihwa igonyuna tai bwo fe imijana. Ahode ahode, ara ta neruk jyo Yesu an isyarak aŋidari jyo atulo olo ihomomite hatai daŋ. ¹⁷ Ihwania illarak amijak ni jo ihaniete tai on orroho jyo Yesu ta abyaŋan mijana ihwa ihanie eleittaha hatai. ¹⁸ Ati itahutak nya Hollum te ekyanita huno eyak sayyo jo ittigemye adi lonyimoto honyi. Ihwania itasiruni egyerita. ¹⁹ Tania iloitoto atajya hatai bwo irwejata jo oŋida eyyata hatai ifufusunie addi ette Hollum isyarana jihatai egigilita aŋejuho. ²⁰ Bwo ifahu adi inyi Kristo linya onyimoni jihatai al anya Yesu. ²¹ el itoŋo’to lidou many ottubari asaa an ihuhumierek erre hutta fau. Ihwa ikyana nya Hollum te etuhe huno eyak sayyo hul olibori’to. ²² Ojo nya Mose, “Itadetu adi Hollum Hobu eyani sayyo t’ehiji illarak hatai ihwa inya itadetuniere inyi ani. Bwo oŋida itaniŋyete tai daŋ erre hun iramak inyi jihatai. ²³ Ottohori adi aati daŋ addi hul obeŋi’to itaniŋye jyo eyani sayyo alya.” ²⁴ Eyak sayyo hinya ikyanai’to, to oŋitek huno Samwele iko huttehalu honyi, iramye nya isi daŋ oŋitek huna. ²⁵ Itai laati hul itaniŋuna’to bwo fe irutana ecorit inya ocorok Hollum jyo hohonyok hatai, iramak nya inyi ahosyere jyo Abramo jo, “To woyo hoi itajahinie adi aati daŋ hutta fau.” ²⁶ Onyimu Hollum apite honyi ette ifahina inyi jihatai ahosyere itirwejere itai daŋ t’eyyata hatai ittata tai nyurana amuno.