¹ 1 Hekyanai Petro iko Yoane jyo laati ette ehumak iko eleittok olo oseŋer hutto haji imojit eneittok bwo Saducehyen fwanna jihosi. ² Nyo iloŋojitai isi te ettiyenio ono ba Petro laati te ebuhuna ono Yesu to ye. ³ Ette isi inef isi ette ihanana ibabus itilauniere amotye nyo ara nya akikai. ⁴ Ati iruhi lomuk arryai hinya itaniŋuni’to ekyanita, arai nya isi alif miet. ⁵ Nya motye ottubanie eleittaha hosi iko amarwak bwo egyorokf daŋ imiji Yerusalem, ⁶ iko Anas ehumani ol obolo’to bwo Kaifa, Yoane iko Alesandro bwo omuk hutta haŋ ba ehumani ol obolo’to. ⁷ Itawojihini isi lefahat hulya ihosyere hosi ette ifiyo isi jojo, Anaŋai adwaran kuyya anaŋai afure an ihaniete tai ariŋ ana?'' ⁸ Tania Petro el efut iko Oloyiri ol Olibo itarraŋ jihosi ojo, Itai eleittaha iko lamarwak, ⁹ kuyya ifiyete tai ta nayiji an ihani jyo latulo oloŋura olo, bwo fe aŋai oŋida atulo olo, asayyo ati huna tetai; ¹⁰ oŋida imijana tai daŋ iko laati hutto Israele jo ta afure ono Yesu Kristo olo Nasaret owotya atulo olo ihosyere hatai ol ogol. Inyi Yesu alya inya isihonia tai ikruce bwo itubuhu Hollum inyi to ye. ¹¹ “Ara inyi amorwog inya irwoŋori aduhok addi on ottu’to rahan amorwo etteri lohitir.” Bwo irata tai ihwa aduhok hya. ¹² Ati obeŋ etalahuna jyo obo, nyo obeŋ obo afure to fauhyen daŋ an isyori jyo aati en eremehiniere hohoi italahuniere. ¹³ Ninya litaniŋuni isi neŋere ono Petro iko Yoane bwo omijani isi jo arai isi laati hul obeŋi omijani awaraga illillihai isi ette mijana jo owoni nya lefahat hulya iko Yesu. ¹⁴ Ninya ligonyuni isi bwo fe atulo al itaŋidari owotyai ikosi obeŋi isi itarraŋi omuk erre. ¹⁵ Tania ifahini isi lefahat hulya ilet ette isi iwwaha hama. ¹⁶ Ojori isi, Ehan adi hohoi aŋai aati hulo? Nyo itaniŋuni aati daŋ hutto Yerusalem ehanio hosi nadwaran on obolo’to ana tania ettallik hohoi monio inyi. ¹⁷ Ati heramana isi hotobyaŋahi inyyahi ikyana ta afure Yesu nyo ŋadi eram ana isarrahi jyo laati. ¹⁸ Teyya iloŋuni isi lefahat hulya bwo ifahini isi hotobyaŋahi inyyahi ikyana, ara dwo bu ittiyenio ta afure ono Yesu. ¹⁹ Ati itarraŋi Petro iko Yoane jihosi jojo, Oŋocete ta ahwattek hatai, anani on oyyu’to ihosyere Hollum, oŋida hohoi efaha jihatai kuyya jyo Hollum? ²⁰ Ati jihohoi ebeŋ hohoi eremik busana ekyana te erre hun egonyu hohoi bwo fe etaniŋu. ²¹ Tania iŋerejanie isi jihosi ette hohina lefahat hulya hetefwahi nyo obeŋi isi oremehini rumana obo ekoi ibahyere isi, nyo itahabuye laati Hollum te eram ana. ²² Nyo arai aŋasi huno atulo al itaŋidari olo atomwana aŋwan. ²³ Ninya lahohini isi ette isi fwatan jyo mottyarak hosi ette iramana nerre daŋ hyodwo ojori ehumak eleittaha iko lamarwak. ²⁴ Itaniŋuni isi ana ette isi daŋ itakwat amojo hosi jyo Hollum jojo, Iye Hobu al igalik daŋ, iyyeu iye edou iko afau, aari iko erre daŋ hun owoni’to dia. ²⁵ To Oloyiri ol Olibo ikyana nya iye te etuk Davide apit hoi al ara’to hohonyi hohoi jo, “Anyo iloŋojitai paganohyen? Bwo fe nyo igigiloi laati erre hun obeŋi isi oremehini ihanio?'' ²⁶ Ottubanie hobwok hutta fau iko eleittaha Bwo irumitai ette iturumoro ahwattek hosi jyo Hollum iko jyo Kristo onyimoto honyi.” ²⁷ Jyo amiji ana ottubanie Erode, Pontio Pilato, bwo paganohyen iko laati hutto Israele jyo apit hoi ol olibo’to, inyi Yesu linya inyimu iye. ²⁸ Ottubanie isi ihaniere erre hunya iŋot iye ta adwaran iko awahan hoi. ²⁹ Ihwania Hobu, imijye jyo eŋerejita hosi bwo isyarak eŋere jyo apiti hoi ittittoyere asayyo hoi. ³⁰ Ijara aani hoi itaŋidaryo aati bwo fe hetehanie edwariti iko etamijanita ta afure ono apit hoi ol olibo, inyi Yesu. ³¹ Homojoi isi ette amaji an itoŋorik isi ikikiro. Ette isi daŋ ifut iko Oloyiri ol Olibo ette ittiyenio ekyana ono Hollum te eŋere. ³² To ninya to nya itoŋoi eluluŋ heruhok ta ataji abotye bwo fe egigilo hosi arabotye. Obeŋ obo olosi ojo asaŋ honyi arai ahunonyi hama, ati ottubani isi asaŋ hosi daŋ arabotye. ³³ Ta adwaran itamijanani lefahat nebuhuna ono Hobu Yesu ette amehino ono Hollum itoŋo ikosi daŋ. ³⁴ Obeŋ obo olosi awak obo ariŋ nyo hul owoni’to iko asik kuyya amatta itinyyaŋari isi erre hosi addi bwo isyarani agurusi hwa jyo lefahat. ³⁵ Ati aharatai lefahat oŋitek daŋ agurusi jyo hul iratai’to. ³⁶ Tania Yosefo, al iloŋoi lefahat Barnaba, on ojo etilihani, ³⁷ itinyyaŋak nya amana honyi ette iyaŋuno agurusi isyaraniere jyo lefahat. Ara inyi to woyo ba Levi bwo amiji hosi Ciporo.