¹ Ninya lidwoŋ oloŋ ono Pentikoste, ottubanie eruhok daŋ eluluŋ imaji abotye. ² Teyya kwak ottu netiri oyyami on obolo t’edou ette itufut aji ninya itoŋorik isi. ³ Ojo teyya otte aŋadyef hima leyo jihosi, ette wulori lihosi hosi ababo. ⁴ Tania ette isi ifut iko Oloyiri ol Olibo otte isi daŋ itteryo ikyana omuk ekyanita hun olufaji ihwa aharak Oloyiri ol Olibo isi ikyanari. ⁵ To ninya amanyai lomuk hulo Yudea Yerusalem, arai isi awati hul omijani eram Hollum hul ofwonni to fauhyen daŋ. ⁶ Ninya litaniŋuni isi etiri ania ofwonni eluluŋ wati bwo illillihai isi bebe nyo itayiruni isi lefahat ikyanai te ekyanita hosi gele gele. ⁷ Illillihai isi bebe bebe ette jaran, Obyaŋara adi hulo Galilea hul ikyanai’to hulo? ⁸ Ati aŋai eremik hohoi itaniŋuna ta nekyanita hutto misihi hohoi? ⁹ Bwo amisik hohoi huna daŋ, Partia, Media, Elama, Mesopotamia, Yudea, Kapadosa, Ponto, iko Asia, ¹⁰ Frigia, Pamfilia, Masir, Libia, Cirene, bwo hulo Roma, Yudea iko paganohyen hul iruhi emohiti huno Yudea, ¹¹ hulo Kreto, iko Arabia; ikyanai laati hulo jihohoi ehanita Hollum hun obolori’to ati etaniŋu hohoi daŋ te ekyanita hohoi gele gele. ¹² Illillihai isi daŋ bwo fe ayadari ette ifiyo illarak hosi ojori, Anyo eram dia? ¹³ Ati omorye omuk ojori, Kuyya orumai adi isi. ¹⁴ Teyya owotya Petro iko hulo ’tomon habotye bwo ikyana jyo eluluŋ wati on okwat ojo, Itai laati hulo Yudea iko laati lamanyak Yerusalem, itaniŋyete jyo ekyanita hoŋ, bwo oŋida imijana erre huna. ¹⁵ Obeŋi laati hulo orumai ihwa ijatta tai nyo hara saa hottoŋwan otto motye. ¹⁶ Ati inyi eram ninya ikyana eyani sayyo Jole ojo, ¹⁷ “Ihwa ojo Hollum, Ejuhok adi ni Oloyiri hoŋ iwati jyo noloŋi nesidita. Tania ikikilai adi onyirok hatai iko ŋarryok hatai. Bwo fe monyomiji igonyuni adi neleyiti hun ofwonni’to jyo Hollum, Bwo irigyai adi lamarwak hatai arigyai. ¹⁸ Jyo laati legyamak hoŋ iko aŋorwo egyamak hoŋ To oŋitek hwa ejuhok adi ni Oloyiri hoŋ, Bwo ikilai adi isi erre hun ofwonni’to. ¹⁹ Tania etahutak adi ni ellillihita hutto hide idou Bwo etamijanita hutta fau Ihwa nooto iko eema bwo afuro. ²⁰ Hobeŋ noloŋ eneittok’on ono Hobu ottu, Oyito adi oloŋ emoli Bwo nayafa ahoto. ²¹ Bwo fe al iloŋo’to afure ono Hobu italahuni adi.” ²² Itai aati hulo Israele, itaniŋyete ekyanita huna. Yesu olo Nasaret, inyi latulo al itahutaniere Hollum adwaran honyi te ellillihita iko etamijanita bwo egyamita hun obolori’to ihiji hatai ihwa imijana tai ta ahwattek hatai. ²³ Isyarana tai inyi ihas wati hul orrohoji’to isihonierek inyi bwo fe ette ’tohoro ihwa oŋot nya Hollum to ofyoro honyi. ²⁴ Ati itubuhu Hollum inyi bwo fe ohohi inyi to ye nyo obeŋ naye oremik gotyere inyi. ²⁵ Ihwa ojo nya Davide tenyi, “Egonyutta ni Hobu oŋitek daŋ ihosyere hoŋ, Nyo owon inyi ihani iŋet hoŋ tania abeŋ ni ajo elafuho. ²⁶ Tania omuno ataji hoŋ bebe bwo fe ikyana aŋadyef hoŋ etahabuyo. Bwo owon adi ahwan hoŋ iko eyihina. ²⁷ Nyo ibeŋ adi iye ibusak oloyiri hoŋ imaji hayak, Bwo fe ibeŋ adi iye iŋatak lya ol olibo’to omuyak. ²⁸ Iye ani itahutak ekota huno nesu. Ta awanan hoi ikoŋ itufutak adi iye ani ta namuno.” ²⁹ Hotto hulo, ekyana ni jihatai ahode jyo hohonyi hohoi Davide ol oye nya ette nuhana bwo fe many jyo oloŋ ana ahana owon elume honyi ikohoi. ³⁰ Ati ara Davide aheyani sayyo bwo omijak inyi jo ocorok nya Hollum te ellama jihonyi jo etadetu adi inyi obo lobu jyo lonyirok honyi. ³¹ Omijak Davide neram ana bwo ikyana inyi te ebuhuna ono Kristod al ojo inyi, “Obeŋ nya inyi arasa imaji hayak bwo fe obeŋ nya ahwan honyi omuyak.” ³² Yesu inyi alya inya itubuhu Hollum to ye bwo era hohoi ahetamijanak honyi. ³³ Itubuhuni inyi litoŋori ihani iŋet ono Hollum bwo fe ette ifwotuna Oloyiri ol Olibo jyo Monye ihwa inya ocoronierek. Inyi Oloyiri al isyarani ihwania jihohoi ihwa iremehina tai igonyuna bwo itaniŋuna. ³⁴ Nyo obeŋ nya Davide odok idou ati ojo inyi ta ahwan honyi jo, “Ojo Hobu Hollum jyo Hobu hoŋ, Itoŋoi oŋyatai hoŋ, ³⁵ Many ehananiere ni amyorok hoi ebalori hejek hoi.” ³⁶ Ijara laati Israele daŋ omijani ahode jo, Yesu olo, linya isihonia tai, ihanak Hollum inyi a Hobu bwo fe a Kristo. ³⁷ Ninya litaniŋuni aati nekyanita huna omiji atajya hosi ette ijiriŋa bebe ette ifiyo jyo Petro iko lefahat hul omuk jo, Hotto hulo, ehan ’tadi hohoi aŋai? ³⁸ Ojo Petro jihosi, Oŋida itai iloitoto atajya hatai ette ifwotuna batisimo ta afure ono Yesu Kristo. Tania obusak adi Hollum eyyata hatai ittata adi itai ifwotuna esyoryo ono Oloyiri ol Olibo. ³⁹ Nyo ara ecorit ana tetai iko aduri hatai bwo fe to hya hul alamaji’to iko to hya hul iloŋu Hollum ahulonyi. ⁴⁰ Bwo fe itamijanak Petro isi te ekyanita arryai ette ittittoyo isi ojo, Italahuna ahwattek hatai to ’rohoji on ottu adi jyo laati hulo. ⁴¹ Tania hinya iruhi ekyanita honyi ifwotuni batisimo, arai nya isi laati esiha atomwana hunihoi. ⁴² Attati isi golihina jyo ettiyenita huno lefahat, ette ’ryahino ikosi ta abenyo imunio iko ta namojo. ⁴³ Ottu abaŋi on obolo jyo laati daŋ nyo ihanie efahat etamijanita iko ellillihita arryai. ⁴⁴ Amanyai nya eruhok eluluŋ bwo fe ette ’tubana asaŋ hosi arabotye. ⁴⁵ Itinyyaŋari isi asaŋ hosi daŋ lihohoryere jyo eruhok daŋ ihwa awahi isi. ⁴⁶ Adahatye isi oŋitek daŋ ihaji imojit eneittok bwo fe oŋiyetye isi arabotye lihaŋitek hosi ta namuno on obolo, ⁴⁷ litahabuyere Hollum, ette laati daŋ muno isi. Attati Hobu fonihita jihosi oŋitek daŋ aati lomuk hul italahuni.